Matthieu 22 - Nyanmien nde Ufle

Atonvle fale i alie dile'n i wun nyanndra

¹ Jésus bu nyanndra kun ékun kléé bé, o sé ke:

² Nyanmien siéle'n o fa famien kun b'o fa atonvle men i wa.

³ O sunmeen i swran mun ke bé kô fle bé b'o yiaa bé atonvle'n bô'n, sannge bé klô'a ke bé ba.

⁴ O sunmeen i swran ufle mun ékun, o sé bé ke: Anh kô sé bé nga n yiaa bé'n ke man wié yô, man kun n nannin nin n nnen lô'n, i kwlaa wa bé, anh bla atonvle'n bô.

⁵ Sannge ba bu'a flele so'n i akunndan, bé oo bé liké'm bé yôle, wié oo i fié su, ye wié kusu oo i aata dile.

⁶ Ye wié'm bé tre i swran so mun, bé yôô bé tete, nan ba kun bé.

⁷ Famien'n faa ya dan kpa, o sunmeen i sôndya mun ke bé kô kun swran kunfue so mun, nan bé wo bé klo'n nun.

⁸ Ye o sé i swran'm bé ke: Man wié atonvle fale ninngé'n yô, alie'n wa bé, sannge bé bo n yiaa bé'n ba baman.

⁹ I so'n ti, anh wo anngonda'm bé su, swran kwlaa nga an wun bé'n, anh fle bé man bé bla atonvle'n bô.

¹⁰ Ye i swran so'm bé faa atin'm bé suo, swran kwlaa nga nga bé wun bé'n, swran te ô, swran kpa ô, bé fle bé, nan swran'm ba yi sua nga bé fa atonvle nun'n.

¹¹ Ke famien'n wlu lo b'oh nianh bé b'o yiaa bé atonvle'n bô'n, o wuun swran kun le, wa wla'a trale nga bé fa ko atonvle bô'n wié.

¹² O use i ke: ?Dyanvue, o yô se ye a wla'a trale nga bé fa ko atonvle bô'n bo a wluu waa?

¹³ Bian so'n wa uké'e i nuan. Ye famien'n sé i minnien'm bé ke: Anh tyi i sa nin i dya'n, anh yii guasu lo aôsin nun, bo lo ye bé sun bé di bé dyé'n.

¹⁴ Ye Jésus sé ke: Bé fle bé nun kpanngban, sannge bé nun kaan sa ye bé fa béo.

César i l'impôt'n

¹⁵ Ye pharisifue'm (*f4*) bé kô wuun bé wun, bé kunnde ke béh tiéh Jésus nuan bô nan béh dyranh su fa tree.

¹⁶ Bé sunmaan bé sonnzonfue nin Hérodefue mun Jésus wun lo, bé wa sé i ke: Ndya, é si ke a di nanwle, a klé swran mun Nyanmien atin'n nanwle nun. A srô'a swran fi, afin a nia'an swran nyrun.

¹⁷ ?É su l'impôt man César, annze nanh man é su men? Nga bo a bu i su'n kan klé é.

¹⁸ Sannge Jésus si bé akunndan te bo bé bu'n, o usa bé ke: ?Gble tôfue mun, nzu ti ye an kan min niaan?

¹⁹ Anh fa l'impôt'n i nun dyete mma kun bla n nian. Ye bé fa denier (*f10*) kun meen io.

²⁰ O usa bé ke: ?Wan ye ng'o ô su ye'n? ?Ye wan sunuan yele ng'o kle su le'n?

²¹ Ye bé waan: César lieo. Ye o sé bé ke: Se o ti so'n, anh fa ng'o ti César lie'n men, ye ng'o ti Nyanmien lie'n, anh fah men.

²² Bé su tele b'o fa te bé'n, o bôô bé nuan, nan ba dyaô i wun le ba o.

Swran'm bé tyenle'n i su sa usale

²³ I lé kunngba so'n Sadducéfue'm (*f5*) bo bé waan, se swran wuo o tyenman'n, bé baa Jésus wun le, bé sé i ke:

²⁴ Ndya Moïse waan: «Yasua kun b'o nin i yi ba wu'a ba'n, se o wu'n, man i niaan'n dye i angbôti'n, o nin i bé wu ba, nan i niaan'n i ôsu'n wa nunnunman.»

²⁵ Laa swran nsô bo bé ti niaan'n bé ô é nun wa. Bé nyrun kpen'n dyaa bla, o wuli. Ke o nin i ba nya'an ba b'o ke i ôsu'n, i angbôti'n kee i niaan'n sa nun.

²⁶ Bé nnyon su'n nin bé nsan su'n bé dyeli, bé wuli, lélé fa dyuu bé nsô'n su.

²⁷ Ke bé kwlaa bé wuli'n, i sin bla'n kusu o wa wuli.

²⁸ ?Ke swran'm béh tyenh'n, bla so'n oh yôh bé nun ônin lie, afin bé nsô'n bé dyelii?

²⁹ Jésus sé bé ke: Amuan fon, an wu'an Nyanmien Nde nga bé kleli'n i wle, ye kusu an si'a ke Nyanmien ti kpli.

³⁰ Afin ke swran'm bé kô tyen'n, yasua su dya'a bla, ye bla kusu su dya'a bian, sannge béh yôh ke ange'm bo bé ô nyanmien su lo'n bé sa.

³¹ ?Bé nga bé wuli'n bé tyenle'n i wun nde'n, amuan kannga'an nde nga Nyanmien kan kléli amun ke,

³² «o ti Abraham, nin Isaac, nin Jacob bé Nyanmien'n» i lé? Nyanmien ti'a bé nga bé wuli'n bé lie, sannge o ti bé nga bé ô nguan nun'n bé Nyanmien.

³³ Ke swran'm bé tii nde nga Jésus kan kléé bé'n, o bôô bé nuan.

Mmla'n i nun dan'n

³⁴ Ke Pharisifue'm (*f4*) bé tii i ke Jésus nde'n kwlali Sadducéfue (*f5*) mun'n, bé kô yiali.

³⁵ Nan bé nun kun b'o ti mmla'n i sifue'n wa use i sa kun ke oh fah se nian, o use i ke:

³⁶ ?Ndya, mmla'n i nun dan'n yele ônin?

³⁷ Jésus sé i ke: «Klô o Min Nyanmien'n kpa, fo o wla'n kwlaa gue i su, man wo akunndan'n kwlaa tren i su.»

³⁸ I ye o ti mmla klikli nin i nun dan nion.

³⁹ Ye nien i nnyon su b'o fe'n: «Klô o wiéngu ke a fa klô o bobo wun'n sa.»

⁴⁰ Mmla nnyon nga su ye mmla'n nin Nyanmien nuan idyofue'm bé nde'n kwlaa takaa.

?Christ ti David i Anunman?

⁴¹ Ke Pharisifue'm (*f4*) bé yiali'n, Jésus usa bé ke:

⁴² ?An bu Christ'n (*f1*) se? ?O ti wan wa? Bé sé i ke: O ti David i anunman.

⁴³ Ye Jésus sé bé ke: ?Se o ti so'n, wuun o yô se ye man Nyanmien Wawe'n fanngan nun David flee i Min, b'o séé ke:

⁴⁴ «É Min Nyanmien'n séli min Min lie'n ke: Tran asé n fama su, Lélé m man ah tioh o kpofue'm bé su» nion?

⁴⁵ ?Se David flee i Min'n, wuun o yô se man o kô yô i anunmaan?

⁴⁶ Bé nun wié fi a kwla te'e i su nin nde kpole kun. Ke o fin tyen so'n nun'n, swran fi a kwla use'e sa kun.