Matthieu 21 - Nyanmien nde Ufle

Jésus i Jérusalem klo'n nun wlule

¹ Ke bé wa dyu Jérusalem bo bé dyuu Bethphagé Olive Ôka'n i wun le'n, Jésus sunmeen i sonnzonfue'm bé nun nnyon,

² o sé bé ke: Anh wo klo'n bo ô amun nyrun le'n su. Ke an dyu lo'n, amunh wunh aflunmun kun ba minndee le, o nin i wa. Anh nyanndyii ble min.

³ Se swran wié usa amun sa'n, anh sé i ke: É Min'n i sa mien i wun, i waan é fa ble. Kpekuun oh yatyih bé nun ke an fa bé bla.

⁴ Sa so'n yôli so nan Nyanmien nuan idyofue'n i nde'n kpen su, o sé ke:

⁵ «Sé Sion (*f14*) wa bla'n ke: Nian, o famien'n su ba o sin. O ti weteefue dan kpa, o fu aflunmun su, Aflunmun gbanflen kun b'o ti nnen b'o sua tro'n i wa'n i su.»

⁶ Jésus sonnzonfue'm bé oli, nan ba yô i ke ng'o kan kléé bé'n sa.

⁷ Bé faa aflunmun'n nin i wa'n bali, bé fa bé tannin mun sesee bé su, nan bé man Jésus a tran su.

⁸ Swran kaka kpa bé sesee bé tannin mun atin'n nun ye wié'm bé kusu bé bubu nnya guegue atin'n nun.

⁹ Swran nga bé dun mmua Jésus nyrun'n o nin bé nga bé su i su'n, bé kpa sé ke: Hosanna David Anunman! «Swran ng'o ba é Min Nyanmien dunman nun'n mon o nyan nguan!» Man Hosanna'n te nyanmien su lo!

¹⁰ Ke o wluu Jérusalem klo'n nun'n, klo wunmuan'n kédyéli, ye bé usa ke: ?Waan?

¹¹ Swran nga bé su i su'n bé sé ke: Jésus Nyanmien nuan idyofue b'o fin Nazareth Galilée men'n nun nion.

Aata difue'm bé Nyanmien sua dan'n nun fuanle

¹² Jésus wluu Nyanmien sua dan'n nun, nan wa fuan bé kwlaa nga bé yô liké ate lo'n, nin bé nga bé tô liké'n, ye o su sika mma katyifue'm bé table'n nin bé nga bé yô ôkunmômô ate'n bé bia'm bé bô guali.

¹³ Ye o sé bé ke: Bé klelii ke: «Bé wa fle n sua'n lika bo swran nin Nyanmien bé kôkô yale,» sannge amuan fa katyi awiéfue'm bé fiawle.

¹⁴ Anyansifue nin tyetyewafue'm bé bee i wun Nyanmien sua dan'n nun le, nan wa yô bé dyuédyué.

¹⁵ Sannge abônuan sa bo Jésus yô bé'n, o nin ba kanngan bo bé kpan Nyanmien sua dan'n nun ke: Nyanmien man David Anunman'n tye é su'n!, o yôô Nyanmien nyrun dyranfue dandan nin mmla kléfue'm bé ya.

¹⁶ Bé usa Jésus ke: ?A ti nde nga bé kan'n? Jésus sé bé ke: N ti. ?Nde nga bé klee ke: «A fo o manmanle'n wlee ba kanngan nin bé nga bé te non'n bé nuan'n,» an nian kennge'en lé?

¹⁷ O yatyi bé le oo Béthanie, nan wa la lo.

Blofue aloma'n bo Jésus bôli i sannzan'n

¹⁸ Ke alie tyennin'n nglemun bo Jésus seh i sin Jérusalem'n, awé kunniin.

¹⁹ O wuun blofue aloma bô kun atin'n nun, o oo i bô lo, wa wu'an mma su, san nnya ye o ô suo. Ye o sé ke: O waka nga, a su su'a kun lé! Kpekuun aloma so'n wa wu bé ôsu kunngba nun le.

²⁰ Ke i sonnzonfue'm bé wuun sa so'n, o bôô bé nuan, ye bé usa ke: ?Ééé, o yô se ye man aloma nga wu i dya nun le soo? Nan Jésus a sé bé ke:

²¹ Nanwle, se an lafi Nyanmien su bo amun awlen'n ti'a nnyonnyon'n, nanh ke liké nga n yôô aloma nga kunngba ye amunh yôoh, sannge se an sé ôka ng'o ô ye'n ke o tu i bô le o kô to dyénvié'n nun, oh koh.

²² Liké kwlaa nga an kan klé Nyanmien ke o yô bo an lafi i su ke oh yôh'n, oh yôh man amun.

Jésus i atin b'o le'n

²³ Jésus oo Nyanmien sua dan'n nun lo. Ke oh kléh liké'n, Nyanmien nyrun dyranfue dandan nin men kpenngben'm bé wa use i ke: ?Wan dunman nun ye a yô sa nga muon? ?Ye wan ye o tuu o ke a yôo?

²⁴ Jésus sé bé ke: N kusu, m ma usa amun sa kun, se an te n su'n, nh kléh amun swran ng'o man min atin bo n yô sa so mun'n.

²⁵ ?Jean i baptême b'o yôli'n, Nyanmien ye o meen i atin, annze swran ye o meen i atin ye o yôo? Bé bu i akunndan, bé sé ke: ?Se o ti so'n, nzu ti ye amuan lafi'e i suo?

²⁶ Kusu, se é sé ke, swran ye o meen i atin'n, wuun é srô swran mun, afin bé kwlaa bé bu Jean Nyanmien muan idyofue.

²⁷ Nan ba sé Jésus ke: É si'a swran ng'o meen i atin'n. Ye Jésus kusu sé bé ke: N kusu, n su klé'a amun swran ng'o man min atin bo n yô sa so mun'n.

Ba yasua nnyon bé wun nyanndra

²⁸ Anh tié. Bian kun le ba yasua nnyon, lé kun o kô sé kpenngbenfue'n ke: N wa, nde ko n raisin (*f12*) fié'n su lo.

²⁹ O sé i ke: N koman. I sin o bu akunndan nan wa o.

³⁰ Ye o oli i sinma'n i wun lo, nan wa kan nde kunngba'n wa kléé, ye i waan: Baba, nh koh, sannge wa oman.

³¹ ?Ba nnyon so'n, ônin ye o yôô i si klun sa nion? Ye bé waan: Klikli nion. Ye Jésus sé bé ke: Nanwle, guabô sika défue nin téklé mmla'm béh dunh mmua fa bé wun man Nyanmien ke o sié bé amun nyrun.

³² Afin Jean wa kléé amun atin ng'o ti kpa'n, amuan lafi'e i su. Sannge guabô sika défue nin téklé mmla'm bé lafili i su, ye amun bo an wunnin sa so'n, amuan katyi'a amun nzuen'n ke amunh lafih i su.

Raisin fié sunianfue'm bé wun nyanndra

³³ Anh tié nyanndra kun ékun. Awlô bô kpen kun ô le, o dii raisin (*f12*) fié, o si i wun. O kpee raisin'n i nzué tyuenwle, ye o kplaan akpa fléiin kun, i sin o kunnde swran o fa fié'n wlaa bé sa nun, nan wa o nvlé wié nun.

³⁴ Ke raisin'n i tile mantannin'n, o sunmeen i swran mun raisin fié sunianfue'm bé sin ke bé kô fe i lie blee.

³⁵ Raisin fié sunianfue'm bé tree i swran mun, bé bôô kun, ye bé kuun kun, nan ba finfin bé nsan su'n yebue.

³⁶ O sunmeen i swran wié mun ékun bo bé sonnin kpa tra klikli lie mun, raisin fié sunianfue'm bé fa sa kunngba nga bé fa yôô bé.

³⁷ Ke o yôô so'n, i awiélie su, o sunmeen i bobo i wa'n bé wun lo, o sé ke: N wa'n lie'n, bé wa bui swran.

³⁸ Sannge ke raisin fié sunianfue'm bé wunnin i wa'n, bé sé bé wiéngu ke: I adya difue'n ye, anh bla man é kuin, nan é fe i ninngé mun.

³⁹ Bé tre fa oo raisin fié'n sin lo, nan ba kuin.

⁴⁰ ?Se fié ifue'n ba'n, an bu i ke o yô swran so'm bé se?

⁴¹ Bé waan: Oh kunh swran tete so mun nyrennennennen, oh fah fié'n wla swran ufle'm bé sa nun, bo i tile ble'n nun oh nyanh su liké.

⁴² Jésus usa bé ke: ?Nde nga bé klelii ke: «Yebue nga sua kplanfue'm bé yii blô'n, I ye wa katyi yebue kpa b'o tra sua'n i tyondyo'n i asé'n, I so'n fin é Min Nyanmien ye ke é wuin'n, o bô é nuan'n.» an nian kennge'en lé?

⁴³ I so'n ti, nh kanh klé amun ke, bé wa dé Nyanmien famien dile'n amun sa nun, béh fah man nvlé ufle bo bé wa yô sa kpa men.

⁴⁴ [Swran kwlaa ng'o to yebue so'n su'n, oh titih nun tritri, ye swran nga yebue so'n to i su'n oh kpotoh.]

⁴⁵ Ke Nyanmien nyrun dyranfue dandan nin Pharisifue'm (*f4*) bé tii nyanndra so mun'n, bé wuun i wle ke bé nde ye Jésus ken i so nion.

⁴⁶ Bé klô ke béh treh, sannge sre kun bé swran'm bé wun, yele ke bé bu Jésus Nyanmien nuan idyofue.