Matthieu 17 - Nyanmien nde Ufle

Jésus wunnen'n i katyile

¹ Ke o dii lé nsien'n, Jésus faa Pierre nin Jacques ye i niaan bian Jean, nan ba o bé ngunmin ôka nglônglô kun su.

² I wunnen'n katyii bé nyrun, i nyrun'n ti ke wia'n bo bô'n sa, ye i trale'n ti ufué nyennyennyen.

³ Moïse nin Élie bé fitéé bé nyrun, bé nin Jésus bé kôkô yale.

⁴ Pierre séé Jésus ke: Nannan, ke é ô wa ye'n, o ti kpa se a kplin su'n, nh kplanh kpata nsan wa, o lie kun, Moïse lie kun, ye Élie lie kun.

⁵ Ke i nuan te ô nde'n su'n, nyanmien ufué fuaii kun wa kataa bé su, bé tii swran kun nen nyanmien ufué so'n nun, o sé ke, Min awlen su ba ye, i su ye n wla'n kwlaa wôo, anh tié nde ng'o kan'n.

⁶ Ke i sonnzonfue'm bé tii nen so'n, sre dan kpa kuun bé, nan ba to a utu bé nyin asé.

⁷ Nan Jésus a wunngé bé wun le, wa fe i sa a fua bé wun, o sé bé ke: Anh dyaô, nanh sre kun amun.

⁸ Ke bé maan bé nyin su'n, ba wu'an swran fi le kun, san Jésus kunngba tye.

⁹ Ke bé fin ôka'n su lo béh dyrah'n, Jésus wlaa bé su nun kpa ke, nanh man bé kan liké nga bé wunniin'n klé swran fi, lélé sen i b'o katyii Swran'n wa wu wa tyen.

¹⁰ I sonnzonfue'm bé usee i ke: ?Nzu ti ye man mmla kléfue'm bé waan, san Élie ye oh dunh mmua ba nion?

¹¹ Ye o séé bé ke: O ti nanwle ke Élie bah, o wa yô ninngé'n kwlaa bé ufle ékun.

¹² Sannge nh kanh klé amun ke, Élie dun mmua bali, ba simen, nan ba yôé ke bé klun klô ke béh yôéh'n sa. I kunngba'n m bo n katyii Swran'n n kusu ke m ma wun nyrennen bé sa nun soo.

¹³ Ke o kaan so'n, i sonnzonfue'm bé wuun i wle ke Jean baptême yôfue'n i nde ye o su kan klé béo.

Jésus yôô gbanflen kaan kun bo asie usu satyilii'n i dyuédyué

¹⁴ Ke bé dyuu swran'm bé wun le'n, bian kun wa kôtôô Jésus bô o sé i ke:

¹⁵ Ndya, si n wa yasua'n i aunnvue. O ti ngbitiefue, wa fe kpa, o ta sin nzué'n nun to.

¹⁶ N fe blee o sonnzonfue mun, ba kwla yômen i dyuédyué.

¹⁷ Ye Jésus sé ke: ?Amun adyulisufue nyin kékléfue bo an lafi'a sa su'n, min nin amunh tranh lélé tyen ônin? ?Nh trah min awlen amun wun lélé tyen ônin? Anh fe ble min.

¹⁸ Jésus idyoo asie usu'n, o tu gbanflen kaan'n su, nan wa yô dyuédyué i ôsu kunngba so'n nun.

¹⁹ Ye i sonnzonfue'm bé wunngé i wun le bé usee blele ke: ?Nzu ti ye ya kwla fua'an asie usu so nion?

²⁰ Jésus sé bé ke: N su bo an lafiman'n tio. Nanwle, se an lafi n su bo kaan b'o dyu ke moutarde (*f9*) mma sa'n, an kwla sé ôka ng'o ô ye'n ke: Tu o bô wa ko lé sa. Oh tuh i bô, ye sa fi nu'an le bo an su kwle'e i yôo.

²¹ [Sannge liké ke nga sa'n, se bé kpe'a sre nun bé sé'a Nyanmien ke o fuen'n, bé kwla fuenmen.]

Jésus bôô i kunle'n su ékun

²² Ke béh wlanh Galilée men'n nun'n, Jésus sé i sonnzonfue'm bé ke: Bé wa fa m bo n katyii Swran'n man swran mun.

²³ Bé man béh kunh min, ye i lé nsan su nh tyenh. I so'n ti, bé wla bôô dan kpa.

Nyanmien sua dan'n i sika yile

²⁴ Ke bé dyuu Capernaüm lo'n, bé nga bé dé Nyanmien sua dan'n i sika'n bé usaa Pierre ke: ?Amun si'n tua'a Nyanmien sua dan'n i sika'n wié?

²⁵ Ye o sé ke: O tua wié. Ke Pierre wluu awlô lo'n, Jésus dun mmua use i ke: ?Simon, wan'm bé sa nun ye asie'n su famien'm bé dé guabô sika nin l'impôt nion? ?Bé bobo bé nvlé'n nun swran'm bé sa nun, annze aôfue'm bé sa nuon? ?A bui se?

²⁶ Ye o sé i ke: Aôfue'm bé sa nuon. Ye Jésus sé i ke: Se o ti so'n, wuun bé nvlé'n nun swran'm bé nu'an nun wié,

²⁷ Sannge ke é klô'a ke é ti swran'm bé ti nun satyi'n, ko dyénvié'n nun lo, kô tô kôwa'n. Dyué ng'o dun mmua so nun'n, yi. Ke ah treh i nuan nun'n, ah wunh sika b'o dyu min nin wo é ti. Fa kô man bé.