Matthieu 16 - Nyanmien nde Ufle

Atre nga bé sree Jésus ke o yi'n

¹ Pharisifue (*f4*) nin Sadducéfue'm (*f5*) bé baa Jésus wun le ke bé ken nian, bé sé i ke o yi nyanmien su lo atre kun klé bé.

² Jésus sé bé ke: [Nnosua nun an sé ke, ainman lika'n o wa kpadya, afin nyanmien su'n wa blô.

³ Ye nglemun an sé ke, nzué'n wa to nde, afin wia'n tuu i bô nde. An si nyanmien su lo ninngé'm bé nzolie, sannge an si'a ble'm bé nzolie.]

⁴ Adyulisufue tete bo bé ti ke bla b'o kunnde bian i wun bô sa Nyanmien nyrun'n, bé waan bé yi atre klé bé. Bé su yi'a atre klé'a bé, san Jonas lie'n tye. I sin o yatyi bé le oli.

Pharisifue'm bé nin Sadducéfue'm bé kpaun ayré'n

⁵ Ke i sonnzonfue'm béh koh nzué'n bué kun lo'n, bé wla fili, ba fa'a kpaun.

⁶ Jésus sé bé ke: Anh nian amun wun kpa Pharisifue nin Sadducéfue'm bé kpaun ayré'n i lika.

⁷ I sonnzonfue'm bé bu i akunndan bé sé bé wiéngu ke: Kpaun bo ya faman'n ti ye o sé soo.

⁸ Ke Jésus tili'n, o sé ke: An ti swran bo amun awlen soman. ?Nzu ti ye kpaun bo amuan faman'n ti an idyoo?

⁹ ?An nian wu'en i wle ékun, ye amun wla kpe'an kpaun nnun bo swran akpi-nnun bé dili'n, nin i ônga bo an isali'n, i gbôgbô'n i nuan su.

¹⁰ ?Ye amun wla kpe'an kpaun nsô bo swran akpi-nnan bé dili'n, o nin i ônga bo an isee gbôgbô dandan'm bé nun'n i gbôgbô'n i nuan su?

¹¹ ?Ke n kan kléé amun ke an nian amun wun Pharisifue nin Sadducéfue'm bé kpaun ayré'n i lika'n, o yô se ti ye amuan wu'en i wle ke, nanh kpaun nde ye n kan kléé amuon?

¹² Ye bé wuun i wle ke, nanh kpaun ayré'n i lika ye i waan bé nian bé wun nion, sannge liké nga Pharisifue nin Sadducéfue'm bé klé'n i lika ye i waan bé nian bé wun nion.

Wafa nga Pierre bu ke Jésus ti b'o kannin'n

¹³ Ke Jésus dyuu Césarée Philippe asa lie'n su'n, o use i sonnzonfue'm bé ke: ?Swran'm bé waan, wan yele m bo n katyii Swran'n?

¹⁴ Bé sé ke: Swran wié'm bé waan, Jean baptême yôfue'n yele wo wié'm bé waan, Élie yele wo, wié'm bé kusu bé waan, Jérémie yele wo, annze Nyanmien nuan idyofue'm bé nun kun yele wo.

¹⁵ Ye o usa bé ke: ?Ye amun kusu amun waan, wan yele min?

¹⁶ Simon Pierre sé ke: A ti Christ, Anannganman Nyanmien'n i Wa.

¹⁷ Jésus sé i ke: Simon, Jonas wa, o lie su ti yé, afin nanh swran ye o yii sa so'n nglô kléé woo, sannge min Si b'o ô nyanmien su lo nion.

¹⁸ N kusu, nh kanh klé o ke, bé fle o Pierre (bo i bô yele yebue). Yebue tanda'n su ye m ma kplan min asonun nion, ye wié'n su kwla satyimen.

¹⁹ M ma fa Nyanmien siéle'n i la clé'n man o. Liké nga a kô tanniin asie'n su wa'n, bé wa tanniin nyanmien su lo, ye nga a kô men i wun atin sie'n su wa'n, bé wa men i wun atin nyanmien su lo.

²⁰ Ye o wle i sonnzonfue'm bé su nun kpa ke, nanh man bé kan klé swran fi ke o ti Christ.

Jésus i kunle bo bé wa kuin'n i su bôle

²¹ Ke o fin tyen so'n nun'n, Jésus bôô i sonnzonfue'm bé kan kléle bô ke, san oh koh Jérusalem oh wunh nyrennen dan kpenngben, nin Nyanmien nyrun dyranfue dandan, nin mmla kléfue'm bé sa nun, nan béh kuinh, ye i lé nsan su oh tyenh.

²² Pierre fe oo aamien nan wa idyoe, o sé i ke: N kpla é! Nannan, nanh man Nyanmien di su man sa nga to o su.

²³ Sannge Jésus kpe i nyin séé Pierre ke: Satan (*f6*), fa dyaô n wun le, a satyi n ti nun, afin wo akunndan'n ti'a Nyanmien lie, swran lieo.

²⁴ Ke o yôô so'n, o sé i sonnzonfue'm bé ke, swran nga i waan oh suh n su'n, mon o klen i wun man min, o sue i waka'n, nan o su n su.

²⁵ Afin swran ng'o klô ke oh seseh i wun'n, oh kpeh i nguan'n sin, sannge swran ng'o kpe i nguan'n sin min ti'n, oh nyenh ékun.

²⁶ ?Se swran kun nyan men wunmuan'n, nan i ti i nguan'n kpe sin'n, nzu ye o yô yé men io? ?Ye nzu liké ye swran kun kwla fa tô i nguan nion?

²⁷ M bo n katyii Swran'n min nin n Si ange mun éh bah i dunman nun béh wunh ke i nyrun ti nyannyan o yô srô, ye ke swran kun i nyôlie'n ti dyu'n mh menh i nuan liké.

²⁸ Nanwle, bé nga bé ô wa ye'n, nanh bé ngba ye wié'n kunh bé, nan ba wun ke m bo n katyii Swran'n n su ba, m ma di n famien nion.