Matthieu 15 - Nyanmien nde Ufle

Lalafue'm bé nzuen'n

¹ Pharisifue (*f4*) nin mmla kléfue wié'm bé fin Jérusalem bé baa Jésus wun le, bé use i ke:

² ?Nzu ti ye o sonnzonfue'm bé fa'a é nannan'm bé nzuen'n su, bo bé wunnzi'an bé sa nan ba di likéo?

³ I kusu usa bé ke: ?Amun kusu, nzu ti ye amun nannan'm bé nzuen'n i fale'n ti an ton Nyanmien mmla nion?

⁴ Afin Nyanmien kannin ke: «Bu o si nin o nin bé swran», ye «swran ng'o ken i si annze i nin nde te'n, bé kuin.»

⁵ Sannge amun lie'n, an sé ke, swran ng'o sé i si annze i nin ke, liké nga bé kô nyen i sa nun'n wa fa man Nyanmien'n, bé dyra'an su ke o nien i si nin i nin bé lika kun.

⁶ O man amun nzuen'n i fale'n nun an yi Nyanmien nde'n blô.

⁷ Dunman klôfue mun, amun wun nde bo Ésaïe kannin'n ti nanwle. O sé ke:

⁸ «Swran nga'm bé ken bé nuan bui su ke bé bu n swran, Sannge bé awlen nu'an n su.

⁹ Bé manman nin ngben, Ye bé klé liké nga swran'm bé kan'n ke o ti Nyanmien mmla.»

Liké ng'o satyi swran'n

¹⁰ Jésus flee swran mun, o sé bé ke: Anh sié amun su tié.

¹¹ Nanh liké nga swran di'n ye o satyi io, sannge liké ng'o ô swran klun lo'n i ye o satyi io.

¹² Ye i sonnzonfue'm bé wunngéé i wun le, bé use i ke: ?A si ke nde'n bo a kannin'n o yôô Pharisifue'm bé ngasi?

¹³ O sé bé ke: Waka kwlaa bo nanh min Si b'o ô nyanmien su lo'n ye o tali'n, béh tuh i bô.

¹⁴ Anh yatyi bé le, bé ti anyansifue bo bé tra bé wiéngu anyansifue kponman, se anyansifue kun tre i wiéngu anyansifue kponman'n, bé nnyon'n béh toh kunman nun.

¹⁵ Pierre man nde'n su, o séé i ke: Tu nyanndra so'n i bô klé é.

¹⁶ Ye Jésus sé ke: ?Amun kusu an wu'an sa wle?

¹⁷ ?An si'a ke liké kwlaa bo swran di'n o ko i klun lo, i sin o ko i atin nun kowle'n nun?

¹⁸ Sannge nde ng'o fin swran nuan fité'n o fin i awlen'n nun, liké ng'o satyi swran'n ye.

¹⁹ Afin akunndan te'n, swran kunle'n, bla nin bian bé yi annze bé wun i bô kunndele'n, bla nin bian kunndele'n, awié'n, bé wiéngu suen tonle'n, swran wun nde kanle'n, i kwlaa so'n wô swran i awlen'n nun.

²⁰ Nian ninngé ng'o satyi swran'n ye, sannge se béh dih liké nan ba wunnzi'an bé sa'n i so'n satyi'a swran.

Canaan bla'n

²¹ Jésus tu i bô le oo Tyr nin Sidon bé asa'n su.

²² Canaan bla kun b'o ô men so'n nun'n o kpan sé i ke: Nannan, David Anunman, yô n yé!

²³ Asie usu kun klé n wa talua'n i nyrennen dan kpa. Sannge Jésus a te'e i su mlonmlon. Ye i sonnzonfue'm bé wunngéé i wun le, bé sé i ke: O kpan su é su ti, ken i bô.

²⁴ Ye i waan: Israël ôsu'n nun bua'm bo ba mlin'n bé sin ye bé sunmaan mion.

²⁵ Sannge bla'n wa kôtô i bô o sé i ke: Nannan, si min aunnvue.

²⁶ Ye o sé i ke: Ke bé fa ba kanngan'm bé kpaun'n gua alua'm bé bô'n, o ti'e i nuan su.

²⁷ Bla'n waan: Nannan, o ti so, sannge kusu alua'm bé di kpaun i munmun b'o gua bé si table'n bô'n.

²⁸ Ye Jésus sé i ke: Ééé bla nga, wo le awlen, liké nga a kunnde'n bé wa yô man o. Nan i wa'n wa yô dyuédyué i ôsu kunngba'n nun.

Jésus yôô tukpatyefue kpanngban bé dyuédyué

²⁹ Jésus tuu i bô lika so'n nun le, o kô wlanwlaan Galilée fete'n nuan lo, nan wa fu ôka'n su wa tran asé.

³⁰ Ye swran kpanngban kpa bé fa tyetyewafue, nin bubuwafue, nin anyansifue, nin bôbôfue mun, nin tukpatyefue kpanngban wié mun ékun bé baa Jésus wun le, bé sié bé i nyrun le, nan wa yô bé dyuédyué.

³¹ Ke swran'm bé wuun ke bôbôfue'm bé idyo, bo bubuwafue'm bé yô dyuédyué, tyetyewafue'm bé nanti séiin, bo anyansifue'm bé wun asé'n, o bôô bé nuan nan ba manman Israël Nyanmien'n.

Swran akpi-nnan bo Jésus maan bé liké bé dili'n

³² Jésus flee i sonnzonfue mun, o sé bé ke: Swran nga'm bé yô min annvo, afin ke bé ô min wun wa'n, bé lé nsan ye, bé le'a liké diwa kun. Sannge n klô'a ke m man bé atin man bé fa bé klun awé wo, se n yô so'n, o tyeman nan ba glo atin'n nun.

³³ I sonnzonfue'm bé usee i ke: ?É yôé se nan ya nyan liké b'o kwla dyu swran kpanngban ke nga sa mun bô nga nun wa?

³⁴ Jésus usaa bé ke: ?Kpaun'n b'o ô amun sa nun'n ti nnye? Ye bé waan: O ti nsô, ye dyué kanngan wié mun.

³⁵ Ye o flee swran so mun ke bé wa tran asé.

³⁶ O faa kpaun nsô'n nin dyué mun, ke o laa Nyanmien asé'n, o bubuu nun fa men i sonnzonfue mun, nan ba fa tye swran mun.

³⁷ Bé kwlaa bé dili, bé ku yili, nan ba ise i sinsin b'o kali'n gbôgbô dandan nsô.

³⁸ Bé nga bé dili'n bé ti akpi-nnan, sannge ba ka'a bla nin ba kanngan mun ba wla'a nun.

³⁹ Ke o maan swran'm bé atin bo bé oli'n, o fu alié'n nun oo Magadan asa lie'n su.