Matthieu 14 - Nyanmien nde Ufle

Jean baptême yôfue'n i kunle

¹ Ble so'n nun Hérode b'o sié nvlé'n i bué'n, o tii Jésus nde bo bé kan'n,

² ye o sé i minnien'm bé ke: Jean baptême yôfue'n ye wa tyeon, i so'n ti ye man o kwla yô sa kéklééklé muon.

³ Afin Hérode tra Jean tyilii, o wlee bisua i niaan bian Philippe i yi Hérodiade ti,

⁴ yele ke titi Jean séé i ke, bla so'n i dyale'n ti'e i su.

⁵ Hérode waan oh kunh Jean, sannge sre kuin swran'm bé wun, yele ke bé bu Jean Nyanmien nuan idyofue.

⁶ Ke Hérode dih i awulie tyen'n, Hérodiade wa talua'n o wa sii ablé bé bo Hérode yiaa bé'n bé nyrun le, o yôé fe.

⁷ I so'n ti, o taa nda ke liké kwlaa nga talua so'n sree'n oh fah men.

⁸ I nin di wlee ke o sé ke, man bé fa Jean baptême yôfue'n i ti'n talié kpekplekpe kun nun blee ityra'n.

⁹ Famien'n i wla bôli, sannge nda ng'o telii bé ng'o yiaa bé'n bé nyrun le'n ti, o sé ke bé fa men.

¹⁰ Nan wa sunman swran bisua lo ke bé kô kpe Jean baptême yôfue'n i ti'n.

¹¹ Bé fa Jean ti'n yii talié kpekplekpe kun nun bé fa blee talua kan'n, nan wa fa kô men i nin.

¹² I sonnzonfue'm bé wa fe i fuen'n bé kô siélii, nan ba kô bô a klé Jésus.

Swran akpi-nnun bo Jésus maan bé liké bé dili'n

¹³ Ke Jésus tii nde so'n, o fu alié kun nun oo blô lo ke oh dyaôh le kan. Ke swran'm bé tili'n, bé fin klo'm bé su, bé su i su bé dya nun.

¹⁴ Ke o fin alié'n nun fitéli'n, o wuun swran kpanngban, bé yô i annvo, nan wa yô tukpatyefue'm bo bé ô nun'n bé dyuédyué.

¹⁵ Ke alie dyoli'n, i sonnzonfue'm bé bee i wun le, bé sé i ke: Wa ti blô, ye kusu lika'n wa dun mmua dyo, i so'n ti, man swran'm bé atin man bé o klo'm bé su bé kô tô alie.

¹⁶ Ye Jésus waan: Nanh man bé wo, amun bobo anh man bé liké.

¹⁷ Ye bé waan: Kpaun nnun nin dyué nnyon tye ye o ô é sa nuon.

¹⁸ Ye o sé bé ke: Anh fa ble min.

¹⁹ O man swran'm bé traan asé idyré'n su le, o faa kpaun nnun'n nin dyué nnyon'n, o men i nyin su niaan nyanmien su lo, nan wa la Nyanmien asé. I sin o bubuu kpaun'n nun, o fa men i sonnzonfue mun ke bé fa tye swran mun, nan ba fa tye bé.

²⁰ Bé kwlaa bé dili, bé ku yili, nan ba ise i sinsin'n b'o kali'n gbôgbô blu-nin-nnyon.

²¹ Bé nga bé dili'n bé dyu bo akpi-nnun kun, sannge ba bu'a bla nin ba kanngan mun ba wla'a nun.

Jésus i nzué'n su nantile

²² Ke o yôô so'n, kpekuun o mieen i sonnzonfue mun ke bé fu alié'n nun dun mmua i nyrun nzué tyéndyé'n i bué kun lo. Ke béh koh'n, o man swran'm bé atin ke bé wo.

²³ Ke o maan swran'm bé atin bo bé oli'n, i ngunmin oo ôka'n su lo ke o nin Nyanmien béh kôkôh yale. Ke lika'n dunh'n, i kunngba ye o ô leo.

²⁴ Ke oh yôh so'n, wuun alié'n nin tyéndyé'n bé afien a ti nun louun kpa. Nzué'n bô gueli i wun, afin aunngban'n fin bé nyrun lo ye o baa.

²⁵ Ako nyinman klikli su Jésus nanti nzué'n su kpu bé lo.

²⁶ Ke i sonnzonfue'm bé wuun ke o su nanti nzué'n su'n, bé wun usuu bé, sre b'o kun bé'n ti, bé kpankpannin, bé sé ke: Wunmieon!

²⁷ Kpekuun Jésus sé bé ke: Anh gua amun wla asé, mion, nanh sre kun amun.

²⁸ Ye Pierre waan: Nannan, se o ti wo'n, fle min man m bla o wun nzué'n su lo.

²⁹ Ye Jésus sé i ke: Bla! Pierre fin alié'n nun fitéli, o nanti nzué'n su ke oh koh Jésus wun lo.

³⁰ Sannge ke o wuun ke aunngban'n ti dan'n, sre kunniin. Ke o wuun ke o su mlon'n, o kpan séé ke: Nannan, dé min ô!

³¹ Kpekuun Jésus tinnge i sa'n soli i nun, ye o sue i ke: ?O bo wo awlen soman'n, nzu ti ye a lafi'a n suo?

³² Bé fuu alié'n nun ye aunngban'n yatyii kpeleo.

³³ Bé nga bé ô alié'n nun'n bé kô kotôô Jésus bô, bé sé i ke: A ti Nyanmien Wa sakpa.

Jésus yôô Génésareth tukpatyefue'm bé dyuédyué

³⁴ Ke bé kpee nzué'n, bé dyuu Génésareth men'n nun.

³⁵ Swran nga bé ô lika so'n nun'n, ke bé wuun i wle ke Jésus'n, bé sunmaan swran lika nga bé mantan le'n bé nun, nan ba fa tukpatyefue'n kwlaa a blee.

³⁶ Bé sre Jésus kpa ke o yatyi man bé ken i trale'n i nuan ndyole'n bo tye. Bé kwlaa nga bé kenniin'n, bé tukpatye'n wié sékéséké.