Matthieu 13 - Nyanmien nde Ufle

Awié guafue'n i wun nyanndra

¹ Lé kunngba so'n Jésus fin awlô lo fitéli, o wa tran fete'n nuan le.

² Swran kpanngban kpa bé yiee i wun le, i so'n ti, o fu traan alié kun nun, ye swran'n kwlaa bé gua nzué kpa'n nuan le.

³ O kan nde kpanngban klé bé nyanndra nun, o sé bé ke: Awié guafue kun oli awié guale.

⁴ Ke oh sanndih'n, wié too atin mma'n nun, anunman'm bé wa dili.

⁵ Wié kusu too akpue su. O fifii ndende kpa afin asie nu'an le kpa.

⁶ Sannge ke wia'n bôh'n, o wonsonnin, o wuli, ndin bo wa nyenmen i wlawle kpa'n ti.

⁷ Wié kusu too nduin mma'n nun, ke nduin buali'n, o trelii.

⁸ Wié'm bé kusu bé too asie kpa su, bé wloli, tré kun wloo ya, kun wloo ablésien, ye kun kusu wloo ablasan.

⁹ Man swran ng'o si fa sié'n, o fa sié.

Sa nga ti ye o buu nyanndra'n

¹⁰ I sonnzonfue'm bé wunngéé i wun le, bé usee i ke: ?Nzu ti ye a ken nyanndra nun klé béo?

¹¹ Jésus sé bé ke: Amun ye bé yi Nyanmien siéle'n i wun akunndan bo swran wu'en i wle'n, i nglô kléé amuon, sannge bé nga'm bé lie'n, ba sié'e so.

¹² Afin swran ng'o le liké'n, i ye béh menh i wiéo, ye oh nyanh wié kpanngban, sannge ng'o le'a liké'n, kaan ng'o ô i sa nun bobo'n béh déh.

¹³ I so'n ti ye n ken nyanndra nun klé bé nion, afin ke bé wuin'n, bé wunmen i wle.

¹⁴ Ke bé yô so'n nde nga Ésaïe kannin'n o kpen su, o sé ke: «Amun wa ti kpa, sannge an su wu'en i wle lé. Amun wa nien kpa, sannge an su wunmen mlonmlon.

¹⁵ Afin swran so'm ba tri, Ba bu bé su nun waka, ba muanmuan bé nyin Nan bé nyinma a wunmen, bé su a timan, Ba wunmen i wle, Ye ba sa'a bé sin min wun nan man yô'a bé dyuédyué.»

¹⁶ Sannge amun lie'n, amun lie su ti yé, afin an wun asé, ye an ti sa!

¹⁷ Nanwle, Nyanmien nuan idyofue nin swran nanwlefue kpanngban kpa bé klô ke béh wunh liké nga an wun bé ye'n, sannge ba wu'an bé, bé klô be béh tih nde nga an ti bé ye'n, sannge ba timan.

Nyanndra'n i bô tule

¹⁸ I so'n ti, amun lie'n, anh tié awié guafue'n i wun nyanndra'n i bô.

¹⁹ Ke bo swran kun ti Nyanmien siéle'n nde'n, b'o wunmen i wle'n, kpekuun Klunwifue'n o wa yô man nde ng'o tili'n o mlin i klun. I sofue'n ye o ti ke atin mma'm b'o awié'n toli nun nion.

²⁰ Akpue'n bo awié'n toli su'n yele swran ng'o ti Nyanmien nde'n bo i klun dyo su o fa su kpekun nion.

²¹ Sannge wa nyanman ndin wlawle, o ti swran bo i awlen'n soman, ke afe'n nin yale kléle'n to i su Nyanmien nde'n ti'n, kpekuun o fité.

²² Ye nduin'n bo awié'n toli nun'n, yele swran ng'o ti Nyanmien nde'n, sannge men'n nun ninngé'n i ngôkôe'n nin anyanbéun'n i klôle'n o tra Nyanmien nde'n, o man o yô'a kpa.

²³ Asie kpa nga kusu bo awié'n toli su'n, yele swran ng'o ti Nyanmien nde'n b'o wun i wle'n. O ti ke awié b'o yô yé'n sa, tré kun wlo ya, kun wlo ablésien, ye kun ékun wlo ablasan.

Awié idyre'n i wun nyanndra

²⁴ O bu nyanndra ufle ékun kléé bé, o sé ke: Nyanmien siéle'n o fa swran kun b'o fa awié guee i fié'n su.

²⁵ Ke swran'm béh lafih'n, i kpofue'n bali, o wa gua awié'n nun awié idyré mma nan wa o.

²⁶ Ke awié'n fifili b'oh wloh'n, bé wunnin ke awié idyré so'n wô nun.

²⁷ Awlô bô kpen so'n i dyunman difue'm bé wa usee i ke: ?Baba, a guaman awié kpa o fié'n su? ?Nin fan ye awié idyré nga fin b'o dyuu fié'n su waa?

²⁸ O sé bé ke: N kpofue'n ye o wa fa guaa nuon. Ye i dyunman difue so'm bé use i ke: ?A klô ke é kô tutu bé bô?

²⁹ O sé bé ke: Tyetye, mon o tran le, se amun waan amunh tutuh bé'n, amunh tuh awié'n wié bô.

³⁰ Anh yatyi bé nnyon'n bé le mon o fa dyu awié kpele ble'n, se awié kpele'n dyu'n, nh séh awié kpefue mun ke, bé dun mmua kpe awié idyré'n bé tyityi fienfien bé wo nun, nan bé fa awié'n gua n tanngannin'n nun.

Moutarde'n i wun nyanndra

³¹ O bu nyanndra ufle ékun kléé bé, o sé ke: Nyanmien siéle'n o fa trô bo bé flee moutarde'n (*f9*) bo swran kun fa guee i fié'n su.

³² O ti kaan tra ninngé mma bo bé lua bé'n bé kwlaa, sannge ke o kô nyin'n, o yô dan tra trô'n kwlaa, ye o yô waka, o man anunman'm bé wa yô bé sua i sama'm bé su.

Kpaun ayré'n i wun nyanndra

³³ O bu nyanndra kun ékun kléé bé, o sé ke: Nyanmien siéle'n o fa kpaun ayré bo bla kun fa guaa kpaun nzuen gla kun nin sin nun, nan i wunmuan'n wa wla.

Sa ti bo Jésus bu nyanndra'n

³⁴ Jésus ken i kwlaa so'n kléé swran kpanngban so mun nyanndra nun, wa ka'an nde fi a klé'a bé b'o ti'a nyanndra nuon,

³⁵ nan nde nga Nyanmien nuan idyofue'n kannin'n o kpen su. O sé ke: «Nh wukéh min nuan'n, mh buh nyanndra, Ye ninngé nga bé fia su ke o fin men'n i bôbôle nun'n, nh kenh i nde klé amun.»

Awié idyré'n i wun nyanndra'n i bô tule

³⁶ Ke o yôô so'n, nan wa yatyi swran so'm bé le a wlu awlô lo. I sonnzonfue'm bé wunngéé i wun le, bé sé i ke: Klé é nyanndra nga a bu i awié idyré b'o ô awié fié'n nun'n su'n i bô.

³⁷ O sé bé ke: Awié'n i guafue'n yele m bo n katyii Swran'n.

³⁸ Awié fié'n yele men'n, awié'n yele Nyanmien mma mun, ye awié idyré'n yele Klunwifue'n i mma mun.

³⁹ N kpofue ng'o guali awié idyré'n yele mmusu'm be si Satan, awié i kpele ble'n yele men'n i awiélie, awié i kpefue mun yele ange mun.

⁴⁰ Ke bé kpe awié idyré'n bo bé wo nun'n, ke men'n i awiélie'n o wa yô so kusuo.

⁴¹ M bo n katyii Swran'n nh sunmanh min ange mun ke bé wa yi bé kwlaa nga bé satyi swran'm bé ti nun'n nin bé bo bé bô tété'n min men'n nun,

⁴² bé gua bé sin dan kpa'n nun, lo ye béh sunh béh dih bé dyé nion.

⁴³ Sannge swran nanwlefue'm bé wa yô ke wia'n sa béh kpadyah bé Si i men'n nun. Man swran ng'o si fa sié'n, o fa sié.

Liké kpa kun bo bé fa fiali'n

⁴⁴ Nyanmien siéle'n o fa liké kpa kun bo bé fa fiaa fié kun su. Swran kun wunniin nan wa fa fia ékun. I fe b'o yôé'n ti'n o kô yô i sa nun ninngé'n kwlaa ate o fa tô fié so'n.

Nennglenman kpakpa'n

⁴⁵ Nyanmien siéle'n o fa aata difue kun b'o kunnde nennglenman kpakpa'n ékun.

⁴⁶ Ke o wuun i kpakpafue'n kun'n, o kô yôô i sa nun ninngé'n kwlaa ate fa tôô nennglenman so'n.

Lala'n

⁴⁷ Nyanmien siéle'n o fa lala kun bo bé gue dyénvié nun, o fa dyué wafawafa'n kwlaa'n ékun.

⁴⁸ Ke lala'n yi'n, bé tyuen ko tyéndyé'n su lo, bé tran asé, bé kpa kpakpafue'n gue gbôgbô nun, ye bé gue tetefue'n blô.

⁴⁹ Ke men'n i awiélie'n o wa yô soo. Ange'm béh bah, bé wa yi swran klunwifue mun nanwlefue'm bé nun,

⁵⁰ ye béh guah bé sin dan kpa'n nun, lo ye béh sunh béh dih bé dyé nion.

Betro nun ninngé ufle nin ninngé nvuen

⁵¹ ?Amuan wun i kwlaa so'n i bô? Ye bé waan: Een.

⁵² Ye o sé bé ke: I so'n ti, mmla kléfue kwlaa b'o suan Nyanmien siéle nun ninngé mun'n, o ti ke awlô bô kpen kun b'o yi ninngé ufle nin ninngé nvuen i betro'n nun sa.

Nazarethfue'm ba lafi'a Jésus su

⁵³ Ke Jésus wiéé nyanndra so'm bé bu'n, o tuu i bô le.

⁵⁴ Ke o dyuu i men'n nun'n, o klé swran'm bé liké bé Nyanmien sua'n nun. Liké b'o klé bé'n, o bô bé nuan, nan ba usa ke: ?O nin i ngwlele nin i sa kéklééklé yôle nga fin nin?

⁵⁵ ?Nanh adyuin difue'n i wa nion? ?Bé flemen i nin Marie? ?Nenh i niaan yele Jacques, nin Joseph, nin Simon, ye Jude?

⁵⁶ ?I niaan bla'n kwlaa bé nu'an wa? ?O yô se ye o si sa nga muon?

⁵⁷ O man ba lafi'e i su. I so'n ti ye Jésus séé bé ke: Bé bu Nyanmien nuan idyofue i swran lika'n kwlaa, sen i bobo i klofue mun o nin i awlôfue mun ye bé bu'e i swraan.

⁵⁸ Ye i su bo bé lafiman'n ti, wa yô'a sa kéklééklé kpanngban le.