Matthieu 10 - Nyanmien nde Ufle

Swran blu-nin-nnyon bo Jésus faa bé'n

¹ I sin Jésus flee i sonnzonfue blu-nin-nnyon'n, o maan bé atin ke bé fuan asie usu b'o satyi swran'n, ye bé yô bé kwlaa nga bé ti tukpatyefue'n, nin bé kwlaa nga bé wunnen yô bé ya'n bé dyuédyué.

² Nian swran blu-nin-nnyon'n bo Jésus sunmaan bé'n bé dunman'n ye, Klikli'n yele Simon, i dunman ng'o nannan su'n yele Pierre, o nin i niaan André, ye Zébédée wa Jacques nin i niaan Jean,

³ nin Philippe, nin Barthélemy, nin Thomas, nin Matthieu guabô sika défue'n, nin Jacques Alphée wa'n, ye Thadée,

⁴ nin Simon b'o ô bé bo bé fle bé akpuéfue'n bé nun'n, nin Judas Iscariot b'o fa Jésus maan swran mun'n.

Swran blu-nin-nnyon bo Jésus sunmaan bé'n

⁵ Bé blu-nin-nnyon so mun ye Jésus maan bé afotue, nan wa sunman bé nion. O sé ke: Nanh an wo bé bo bé ti'a Juif'n bé sin, ye nanh an wo Samarie klo fi su,

⁶ sannge anh wo Israël ôsu'n nun bua'm bé sin.

⁷ Ke amunh koh'n, anh kan klé swran mun ke Nyanmien i siéle ble'n wa mantan.

⁸ Anh yô tukpatyefue'm bé dyuédyué, anh tyen bé bo bé wuli'n, anh yô man kôkôwéfue'm bé kôkôwé'n wié, anh fuan asie usu mun swran'm bé su. Nyanmien fa tyee amun, an kusu anh fa tye bé.

⁹ Nanh an fa sika okwle, nin dyete ufué, nin sika mma bo kaan sa tra nun.

¹⁰ Nanh an fa tro, nin trale nnyon, nin ngbabua, nin kponman, afin dyunman difue'n i sa ka'a ngben.

¹¹ Klo kwlaa nga an dyu su'n, se o ti dan ô, se o ti kaan ô, anh usa se swran kpa wié ô le b'o kwla siké amun'n, anh siké i wun le, anh tran le lélé san tyen nga amunh tuh amun bô klo so'n su'n.

¹² Ke an wlu awlô lo'n, anh yô liké sé ke: Man aladyé tran awlô'n nun.

¹³ Se awlô so'n ti kpa'n, man aladyé tran nun, sannge se o ti'a kpa'n, nanh man amun nuan yrale'n yô yé.

¹⁴ Se bé so'a amun nun bo bé tié'a amun nde'n, anh dyaô awlô so'n nun annze klo so'n su, anh kpukpu amun dya wun ndutré'n gue le.

¹⁵ Nanwle, dyole dile tyen'n nun Sodome nin Gomorrhefue'm bé nyrennen lie'n oh yôh soso tra klo so'm bé lie'n.

Yale bo bé wa klé bé'n

¹⁶ Anh nian, amun bo an ti ke bua mun sa'n, nh sunmanh amun gbôklô'm bé afien. I so'n ti, anh yô ngwlelefue ke wuô sa, ye anh yô weteefue ke aublé sa.

¹⁷ Anh sasa amun wun swran'm bé lika, afin bé wa fa amun ko dyole difue'm bé dyasu, béh bôh amun nin ngblé bé Nyanmien sua'm bé nun.

¹⁸ Béh fah amun ko bé bo bé sié men'n nin famien'm bé dyasu min ti nan an kan min nde klé bé nin bé bo bé ti'a Juif'n.

¹⁹ Sannge ble nga béh sanmanh amun'n, nanh an kôkô idyole wafa nga amunh fah idyo'n, nin nde nga amunh kôh kan'n ti. Nde nga amunh kôh kan'n, Nyanmien bobo wa klé amun do kunngba so'n su.

²⁰ Afin nanh amun bobo ye amunh idyooh, sannge amun Si i Wawe'n ye oh fah nde so'n wla amun nuaan.

²¹ Swran bo bé ti niaan'n, kun wa fe i niaan bian wle swran'm bé sa nun ke bé kuin, ye swran wié'm bé wa yô bé mma'm bé so wié, ba'm béh dyaôh bé si nin bé nin'm bé wun ke bé kun bé.

²² Swran'n kwlaa bé wa kpo amun min ti, sannge swran ng'o tre i awlen lélé dyu i awiélie'n, oh fitéh nun.

²³ Se bé klé amun yale klo kun su'n, anh wanndi wo klo ufle su. Nanwle, an su wié'a Israël klo'm bé su wlan, nan m bo n katyii Swran'n man ba.

²⁴ Swran b'o suan liké'n ti'a kpa tra'a swran b'o klé i liké'n, ye swran b'o su swran'n ti'a kpa tre'e i min'n.

²⁵ Se swran b'o suan liké'n yô ke swran b'o klé i liké'n sa'n, i so'n ti kpa, ye se swran b'o su swran'n yô ke i min'n sa'n, i so'n ti kpa. Se bé flee awlô kpen'n ke Béelzébul'n, (*f7*) bé wa fle i awlôfue'm bé kusu so kpe blu.

Swran ng'o ti bo an srôé'n

²⁶ I so'n ti, nanh an srô bé mlonmlon, afin sa kwlaa nga bé katakata su'n i wié fi su ka'a le b'o su fité'a nglôo, ye nde fi su ka'a nvialie nun bo bé su si'a nuon.

²⁷ Nde nga n kan klé amun aôsin nun'n, anh ken wia nun, ye nde nga bé tu i aswré klé amun'n, anh kô bô i ndôlô.

²⁸ Nanh an srô bé nga bé kun swran, bo bé kwla ku'an liké ng'o man bé fle swran i swran'n, sannge anh srô Nyanmien b'o kwlaa satyi bé nnyon'n mlonmlon nyrennen lika'n nun.

²⁹ ?Be yô'a ndrôfia nnyon ate bablu kun? Sannge o nin i so'n ngba, se amun Si a kpli'an su'n, bé nun kun sa toman.

³⁰ Amun ti ndre'n bobo o si i nuan.

³¹ O man nanh sre kun amun mlonmlon, afin an ti kpa tra ndrôfia kpanngban.

Bé nga bé sé ke bé ti Christ lie'n

³² I so'n ti, swran ng'o bô n dunman swran'm bé nyrun'n, n kusu mh bôh i dunman n Si b'o ô nyanmien su lo'n i nyrun,

³³ sannge swran ng'o yô i wun swran'm bé nyrun ke o si'a min'n, n kusu nh kenh n Si b'o ô nyanmien su lo'n i nyrun ke n simen.

Jésus i swran'm bé afien satyile

³⁴ Nanh an bu i ke anuanse ye n fa baa asie'n su waa, min nin anuanse a baman, sannge kaka ye min nin i balio.

³⁵ Afin m bali ba yasua nin i si, ba bla nin i nin, séwi nin i séwi bé afien satyile,

³⁶ ye swran kun bobo i awlôfue mun ye bé wa yô i kpofueo.

³⁷ Swran ng'o klô i si annze i nin tra min'n, o su yô'a n lie, ye swran ng'o klô i wa yasua annze i wa bla tra min'n o su yô'a n lie,

³⁸ swran ng'o suemen i waka'n, nan o su'a n su'n, o su yô'a n lie.

³⁹ Swran ng'o sese i nguan'n, oh kpeh i nguan'n sin, ye swran ng'o kpe i nguan'n sin min ti'n oh nyenh ékun.

Mô yôle

⁴⁰ Swran ng'o so amun nun'n, wuun wa so min nun, swran ng'o so min nun'n, wuun wa so Nyanmien b'o sunmannin min'n i nun.

⁴¹ Swran ng'o so Nyanmien nuan idyofue kun nun yele ke o ti Nyanmien nuan idyofue'n, mô kunngba nga bé fa yô Nyanmien nuan idyofue'n, béh yôéh wié, ye swran ng'o so nanwlefue kun nun yele ke o ti nanwlefue'n, mô kunngba nga bé fa yô nanwlefue'n, béh yôéh wié.

⁴² Swran kwlaa ng'o kô man bé nga bé ô ye'n, bé nun kaan kun nzué klôwa kun yele ke o ti n sonnzonfue'n ti'n, nanwle, i mô yôle'n su ka'a mlonmlon.