Matthieu 1 - Nyanmien nde Ufle

Ôsu nga Jésus-Christ fin nun'n

¹ Jésus-Christ b'o ti David nin Abraham bé anunman'n i ôsu ng'o fin nun'n bé dunman mun ye.

² Abraham wuu Isaac, Isaac wuu Jacob, Jacob wuu Juda nin i niaan mun.

³ Juda nin Thamar bé wuu Pharès nin Zara, Pharès wuu Esrom.

⁴ Esrom wuu Aram, Aram wuu Aminadab, Aminadab wuu Naasson, Naasson wuu Salmon.

⁵ Salmon nin Rahab bé wuu Boaz. Boaz nin Ruth bé wuu Obed. Obed wuu Isaï,

⁶ Isaï wuu famien David. David nin Urie i yi'n bé wuu Salomon.

⁷ Salomon wuu Roboam, Roboam wuu Abia, Abia wuu Asaph.

⁸ Asaph wuu Josaphat, Josaphat wuu Joram, Joram wuu Osiaz.

⁹ Osiaz wuu Joatham, Joatham wuu Achaz, Achaz wuu Ézéchias.

¹⁰ Ézéchias wuu Manassé, Manassé wuu Amon, Amon wuu Josias.

¹¹ Ble bo bé fa Israëlfue mun oo Babylone'n, i ble so'n nun ye Josias wuu Jéchonias nin i niaan muon.

¹² Ke bé fa bé oo Babylone'n, i sin Jéchonias wuu Salathiel, Salathiel wuu Zorobabel.

¹³ Zorobabel wuu Abiud, Abiud wuu Éliakim, Éliakim wuu Azor.

¹⁴ Azor wuu Sadok, Sadok wuu Achim, Achim wuu Éliud,

¹⁵ Éliud wuu Éléazar, Éléazar wuu Matthan, Matthan wuu Jacob.

¹⁶ Jacob wuu Joseph b'o ti Marie wun'n. Marie so'n ye o wuu Jésus bo bé flee Christ (*f1*) nion.

¹⁷ Ke o fin Abraham ble su lélé b'o ka dyu David ble su'n, bé ôsu'm bé akpasua'n ti blu-nin-nnan. Ke o fin David ble su lélé b'o fa dyu ble nga bé fa bé ko. Babylone'n, bé ôsu'm bé akpasua'n ti blu-nin-nnan. Ke bé fa bé co Babylone lélé b'o fa dyu Christ ble su'n, bé akpasua'n ti blu-nin-nnan.

Jésus-Christ i awulie

¹⁸ Anh nian ke Jésus-Christ i awulie'n yôlio. I nin Marie bo Joseph treli i asé'n, ke bé nian si'a sua'n, Nyanmien Wawe'n fa ba wlee i klun.

¹⁹ Joseph b'o ti i wun'n o ti swran kpa, o klô'a ke o satyi i dunman, i so'n ti, i waan oh yatyih i nun blelele.

²⁰ Ke oh buh akunndan so'n, é Min Nyanmien'n i ange kun yi i wun kléé lalie nun, o sé ke: Joseph, David anunman, nanh sre kun o, fo o yi Marie ko o bô, afin ba'n bo wa wunnzee'n o fin Nyanmien Wawe'n.

²¹ O wa wu ba yasua, ah tonh i dunman Jésus, (bo i bô yele Défue), afin i ye o wa dé i nvlé'n bé sa bo bé yô Nyanmien'n i nuon.

²² I kwlaa so'n yôli so nan nde nga é Min Nyanmien'n man i nuan idyofue'n kannin'n wa kpen su, o sé ke:

²³ «Anh nian, talua b'o nian si'a bian'n o wa wunnze, oh wu ba yasua, Béh tonh i dunman Emmanuel,» bo i bô klé ke Nyanmien nin é ô nun.

²⁴ Ke Joseph tinngéli'n o yôô sa nga é Min Nyanmien'n i ange'n kan klélii'n, nan wa fe i yi'n wa o i bô,

²⁵ sannge o nin i ba si'a sua, lélé san o wuu i wa yasua b'o toon i dunman Jésus'n.