Marc 9 - Nyanmien nde Ufle

¹ O séé bé ékun ke: Nanwle, bé nga bé ô wa ye'n, nanh bé ngba ye wié'n kunh bé, nan ba wun ke Nyanmien Kpli'n wa yi i famien'n nglô a klé béo.

Jésus wunnen'n i katyile

² Ke o di lé nsien'n Jésus faa Pierre nin Jacques nin Jean bé oo bé ngunmin ôka nglônglô kun su. I wunnen'n katyii bé nyrun.

³ I trale'n katyii ufué nyennyennyen bo ninngé kpufue fi nu'an asie'n su wa b'o kwla kpu ninngé o fen dyu soo.

⁴ Élie nin Moïse bé fitéé bé nyrun, nan bé nin Jésus a kôkô yale.

⁵ Kpekuun Pierre séé Jésus ke: Baba, ke é ô wa'n o ti kpa, man é kplan kpata nsan, o lie kun, Moïse lie kun, ye Élie lie kun.

⁶ Sre b'o kun bé'n ti o wu'an nde ng'o kaan.

⁷ Nyanmien ufué kun wa kataa bé su, ye bé tii swran kun nen nyanmien ufué so'n nun, o sé ke: Min awlen su ba ye, anh tié nde ng'o kan'n.

⁸ Kpekuun i sonnzonfue'm bé nianniaan bé wun le, ba wu'an swran fi kun, san Jésus kunngba tye ye o nin bé ô leo.

⁹ Ke bé fin ôka'n su lo béh dyrah'n, Jésus wlaa bé su nun kpa ke, nanh man bé kan liké nga bé wunniin'n klé swran fi, lélé san i b'o katyii Swran'n wa wu wa tyen.

¹⁰ Bé faa sa so'n su, nan ba usa bé wun ke: ?Tyenle so'n i bô yele ônin?

¹¹ Ye bé usa Jésus ke: ?Nzu ti ye man mmla kléfue'm bé waan, san Élie ye oh dunh mmua ba nion?

¹² O sé bé ke: Élie dunh mmua o wa yô ninngé'n kwlaa bé ufle ékun. ?Ye o yô se ti ye bé kle m bo n katyii Swran'n min wun nde ke m ma wun nyrennen dan kpa nan béh yôh n finfin nion?

¹³ Sannge nh kanh klé amun ke: Élie bali nan ba yô i ke bé klun klô'n sa, afin bé kleli i wun nde'n nun so.

Jésus yôô gbanflen kaan kun bo asie usu satyilii'n i dyuédyué

¹⁴ Ke bé dyuu i sonnzonfue nga'm bé wun le'n, bé wunnin swran kpanngban kpa ba yia bé wun le, mmla kléfue'm bé nin bé su kan nde.

¹⁵ Ke swran so'm bé wuun Jésus'n, o fuu bé nun, nan ba wanndi a kô yô i liké.

¹⁶ Ye o use i sonnzonfue'm bé ke: ?Nzu nde ye amun nin bé kaan?

¹⁷ Ye swran nga bé yiaa le'n bé nun kun sé ke: Baba, n faa n wa yasua bo asie usa a yô i bôbô'n fa blee o.

¹⁸ Lika kwlaa nga asie usu so'n kô to i su'n, o te i asé, i nuan nzué'n bô nglô, o di i dyé'n, o kété kafiaa. N sree o sonnzonfue mun ke bé tui bakan'n su, ba kwle'e i yô.

¹⁹ Ye Jésus usa ke: ?Amun adyulisufue mun bo an lafi'a sa su'n, min nin amunh tranh lélé fa dyu tyen ônin? Anh fe ble min.

²⁰ Bé fe blelii. Ke o wuun Jésus'n, asie usu b'o su i su'n o mon o kétéé kafiaa, o toli, o la kôndô, i nuan nzué'n bô nglô.

²¹ Ye Jésus use i si'n ke: ?Ke liké so'n too i wun'n i afue nnye ye? O sé ke: Ke o fin i ba kaan nun'n.

²² Tyen wié o fe yi sin nun, o fe yi nzué nun ke oh kuinh. Sannge o lie'n, liké kwlaa nga a kwla yô'n, wun é aunnvue, yô man é.

²³ Ye Jésus sé i ke: A sé n ke, se n kwla yô'n… nian, swran ng'o lafi Nyanmien su'n o kwla sa'n kwlaa yô.

²⁴ Kpekuun ba'n i si'n kpaan ke: N lafi i su! Uka min i su bo n lafi'a kpa'n ti.

²⁵ Ke Jésus wuun swran'm bo bé wanndi ba'n, o idyoo asie usu'n, o sé i ke: Asie usu bo a man swran yô bôbôfue nin sutréfue'n, dyaô ba nga su, nanh to i su kun.

²⁶ Ke asie usu'n b'o ô ba'n su'n kpannin'n, o kétéé kafiaa nan a dyaô i su. Ba'n katyii ke wa wu sa, o man bé kpanngban lika bé waan wa wu.

²⁷ Sannge Jésus tre i sa o meen i su, nan wa dyaô.

²⁸ Ke Jésus wluu awlô lo b'o nin i sonnzonfue'm bé ngunmin bé ô le'n, bé use i ke: ?Nzu ti ye ya kwla fua'an asie usu so nion?

²⁹ O sé bé ke: Liké ke nga sa'n, se bé sre'a Nyanmien ke o tui'n, bé kwla tumen.

Jésus bôô i kunle'n su ékun

³⁰ Bé tuu bé bô le bé oli nan ba kpa Galilée. Jésus klô'a ke bé si lika ng'o wô'n,

³¹ afin, ke oh kléh i sonnzonfue'm bé liké'n o séé bé ke: Bé wa fa m bo n katyii Swran'n man swran mun, béh kunh min, ke n wu b'o di lé nsan'n, nh tyenh.

³² I sonnzonfue'm ba wu'an nde so'n wle, sannge sre kun bé ti, ba usemen.

Swran ng'o ti dan tra bé kwlaa'n

³³ Bé dyuu Capernaüm lo. Ke bé wluu awlô lo'n, Jésus usee i sonnzonfue'm bé ke: ?Nzu nde ye an ken i atin nun nion?

³⁴ Sannge ba uké'a bé nuan, afin bé si akplôwa atin nun lo ke béh wunh bé nun swran ng'o ti dan tra bé kwlaa'n.

³⁵ Ke o traan asé'n, o flee i sonnzonfue blu-nin-nnyon'n, o sé bé ke: Swran nga i waan oh yôh swran'n kwlaa bé nun dan'n, mon o dun mmua yô bé kwlaa bé nun kaan, ye o su bé.

³⁶ Ye o faa ba kaan kun dyreen bé afien le, o fe i sa fue i wati, o sé bé ke:

³⁷ Swran kwlaa ng'o so ba kaan kun ke nga sa nun n dunman nun'n, wuun wa so m bobo min nun, ye swran kwlaa ng'o so min nun'n, nanh min ye o so min nuon, swran ng'o sunmaan min'n i nun ye wa soo.

Swran ng'o dyaô'a é wun'n, o nin é ô nun

³⁸ Jean séé Jésus ke: Baba, é wuun swran kun b'o nu'an é nun wié, o fo o dunman'n fuan asie usu, nan ya sé i ke, nanh mon o fuan bé kun, yele ke o nu'an é nun wié.

³⁹ Ye Jésus sé ke: Nanh an sé i ke nonh o fuan bé, afin swran fi kwla fa'a n dunman'n yi'a atre, nan bé dyaôsu kunngba'n nun wa kan min wun nde.

⁴⁰ Swran ng'o nin é lemen'n, o dyin é sin.

⁴¹ Nanwle, ke an ti Christ lie'n ti, swran ng'o man amun nzué klôwa kun'n, oh nyenh i nuan liké.

Sa te yôle

⁴² Sannge se swran wié satyi ba kanngan nga bé lafi n su'n bé nun kun ti nun'n, o flunman ke bé fa yebue nin dan kun minnde i komin bé tôé yi dyénvié'n nun.

⁴³ Se o sa'n man a yô sa te'n, kpe. O flunman ke o sa'n ti sin nan a nyan nguan'n, tra ke a le sa nnyon nan a o nyrennen lika'n nun, sin b'o nuanman'n nun'n,

⁴⁴ [lo asonnien'm bé wuman, sin nuanman.]

⁴⁵ Se o dya'n man a yô sa te'n, kpe. O flunman ke o dya'n ti sin nan a nyan nguan'n tra ke a le dya nnyon nan ba tô o a yi nyrennen lika'n nun'n,

⁴⁶ [lo asonnien'm bé wuman, sin nuanman.]

⁴⁷ Se o nyinma'n man a yô sa te'n, tui yi. O flunman ke a fo o nyinma kun yô men nga Nyanmien sié'n i nunfue tra ke a le nyinma nnyon, nan ba tô o a yi nyrennen lika'n nun'n,

⁴⁸ lo asonnien'm bé wuman, sin nuanman.

⁴⁹ Afin bé wa fa sin gue swran'n kwlaa bé su ke bé fa ndyin gue trô nun'n sa.

⁵⁰ ?Ndyin'n ti liké kpa, sannge se i ta'n kpo'n, bé yôé se nan wa nyan ta ékun? Man amun nuan nun yô fe ke ndyin sa, man amun nuan se.