Marc 8 - Nyanmien nde Ufle

Swran akpi-nnan bo Jésus maan bé liké bé dili'n

¹ I ble so'n nun ke swran'm bé yiaa dan kpa ékun bo bé le'a liké diwa'n, Jésus flee i sonnzonfue mun o sé bé ke:

² Nzrafue nga'm bé yô min annvo, afin bé ô min wun wa i lé nsan ye, ye sien'n bé le'a liké diwa kun.

³ Se m man bé atin ke bé fa bé klun awé'n wo bé klo'n, béh gloh atin nun, afin bé nun wié'm bé fin mmua.

⁴ I sonnzonfue'm bé séé i ke: ?Oh yôh se ye béh kwlah nyan liké diwa blô wa man bé bo bé ku yioh?

⁵ O usa bé ke: ?An le kpaun nnye? Bé sé ke: É le nsô.

⁶ Ye o flee swran mun ke bé wa tran asé, nan wa fa kpaun nsô'n, ke o laa Nyanmien asé'n, o bubuu bé nun, o fa meen i sonnzonfue mun ke bé fa tye bé, ye bé fa tyee béo.

⁷ Bé le kpatra kanngan wié ékun, o laa Nyanmien asé, o sé bé ke bé fa tye bé ékun.

⁸ Bé dili, bé ku yili, bé isee i sinsin b'o kali'n gbôgbô nsô.

⁹ Swran so'm bé dyu bo akpi-nnan kun. Nan Jésus a man bé atin ke bé o.

¹⁰ Kpekuun o nin i sonnzonfue'm bé fuu alié'n nun bé oo Dalmanutha men'n nun.

Atre nga bé sree Jésus ke o yi'n

¹¹ Pharisifue'm (*f4*) bé bali, kpekuun bé nin Jésus su si akplôwa, i kan nianle ti bé sé i ke o yi nyanmien su lo atre kun.

¹² Jésus ôtôô dan kpa, nan wa sé ke: ?Nzu ti ye adyulisufue nga'm bé kunnde atreo? Nanwle, bé su yi'a atre fi klé'a adyulisufue nga mun.

¹³ Kpekuun wa dyaô bé wun le, wa fu alié'n nun ékun ke oh sinh fete'n bué kun lo.

Pharisifue'm bé nin Hérode bé kpaun ayré'n

¹⁴ I sonnzonfue'm bé wla fili, ba fa'a kpaun, san kunngba tye ye o ô bé sa nun alié'n nuon.

¹⁵ Jésus wlaa bé su nun ke, bé sasa bé wun kpa Pharisifue nin Hérode bé kpaun ayré'n i lika.

¹⁶ I sonnzonfue'm bé sé bé wiéngu ke: Kpaun bo é lemen'n ti ye o séé soo.

¹⁷ Jésus wuun i wle ye o sé ke: ?Nzu ti ye an idyo kpaun bo an lemen'n tio? ?An si'a ngwlele, an wu'an sa wle? ?Amuan dyinmin?

¹⁸ ?Amun nyinma'n wô le ngben, an wu'an asé? ?Amun su'n wô le ngben, an ti'a sa?

¹⁹ ?Ke m bubuu kpaun nnun'n nun maan swran akpi-nnun'n, an wla a fi? ?I sinsin bo an isali'n ti gbôgbô nnye? Bé sé ke: O ti blu-nin-nnyon.

²⁰ O usa bé ékun ke: ?Ke m bubuu kpaun nsô'n nun maan swran akpi-nnan'n, i sinsin bo an isali'n ti gbôgbô nnye? Bé sé ke: O ti nsô.

²¹ Ye o séé bé ke: ?I kwlaa so'n an nian wu'en i wle?

Jésus tikéé Bethsaïda anyansifue kun i nyinma

²² Bé oo Bethsaïda, bé fa anyansifue kun blelii, bé sre i kpa ke o ken.

²³ O traa anyansifue'n i sa, o fe oo klo'n i sin lo, nan wa fe i nuan nzué a kpe i nyin su. O fe i sa'n fuee i wun o use i ke: ?A wun asé?

²⁴ O ukéli i nyin ye o sé ke: N wun swran mun, sannge bé ti ke waka bo bé su nanti sa.

²⁵ Jésus fe i sa'n fuee i nyin su ékun, ke anyansifue'n tiké i nyin ékun'n, kpekuun i nyinma'n wa yô kpa, wa wun asé wéiin kpa.

²⁶ Jésus sé i ke o o i awlô, nonh o wlu klo'n nun.

Wafa nga Pierre bu ke Jésus

²⁷ Jésus nin i sonnzonfue'm bé oo Césarée Philippe akpasua su klo'm bé su, ke béh koh'n, o usa bé ke: ?Swran'm bé waan, wan yele min?

²⁸ Bé sé ke: Bé waan, Jean baptême yôfue'n yele o, wié'm bé waan, Élie yele o, wié'm bé kusu bé waan, a ti Nyanmien nuan idyofue.

²⁹ Ye o usa bé ke: ?Sannge amun lie'n, amun waan, wan yele min? Pierre sé ke: A ti Christ. (*f1*)

³⁰ Jésus wlaa bé su nun kpa ke nanh man bé ken i nde klé swran fi.

Jésus i kunle bo bé wa kuin'n i su bôle

³¹ Ye o bôô bé kan kléle'n bô ke san i b'o katyii Swran'n oh wunh nyrennen dan, kpenngben, nin Nyanmien nyrun dyranfue dandan, nin mmla kléfue'm béh yiih blô, béh kuinh, i lé nsan su oh tyenh.

³² O kan nde so'n kléé bé wéiin. Pierre fe oo aamien nan wa idyoe.

³³ Ye Jésus kpe i wun nieen i sonnzonfue mun, o idyoo Pierre, o sé ke: Satan (*f6*), dyaô n nyrun le, afin wo akunndan'n ti'a Nyanmien lie, swran lieo.

³⁴ I sin o flee swran mun nin i sonnzonfue mun, o sé bé ke: Swran nga i waan o wa su n su'n, mon o klen i wun man min, nan o sue i waka'n o su n su.

³⁵ Afin swran nga i waan oh seseh i wun'n, oh kpeh i nguan'n sin, sannge swran ng'o kpe i nguan'n sin min nin dyasin fe'n ti'n, swran so'n o sese i nguan'n sakpa.

³⁶ ?Se swran kun nyan men'n nun ninngé'n kwlaa, nan se i nguan'n kpe sin'n, nzu ye o yô yé men io?

³⁷ ?Nzu ye swran kun kwla fa tô i nguan nion?

³⁸ Adyulisufue tete nga'm bé ti ke bla b'o kunnde bian i wun bô sa Nyanmien nyrun. Wié ô bé nun nyannzuen kun bé min nin min nde'n ti. Ke m bo n katyii Swran'n min nin Nyanmien i ange mun éh bah n Si i dunman nun, bo béh wunh ke i nyrun ti nyannyan o yô srô'n, nyannzuen wa kun n kusu bé ti.