Marc 7 - Nyanmien nde Ufle

Lalafue'm bé nzuen'n

¹ Pharisifue (*f4*) nin mmla kléfue wié mun bo bé fin Jérusalem'n bé yiaa Jésus wun le.

² Bé wunnin i sonnzonfue'm bé nun wié bo bé fa bé wun fien di liké, afin ba wunnzi'an bé sa ke bé séé ke bé wunnzin'n sa.

³ Yele ke Juif mun bo bé ti Pharisifue'n bé nin Juif nga mun kwlaa, se ba wunnzi'an bé sa nun kpa'n, bé di'a liké, afin bé fa lalafue kpenngben'm bé nzuen'n su.

⁴ Ke bé fin guabô ba'n, se bé nian wunnzinman'n, bé di'a liké mlonmlon. Bé le nzuen ufle kpanngban bo bé yô bé ékun, klôwa, nin ôndôman, nin aaba'm bé nun wunnzinle.

⁵ Ye Pharisifue nin mmla kléfue'm bé usaa Jésus ke: ?Nzu ti ye o sonnzonfue'm bé fa'a lalafue kpenngben'm bé nzuen'n su, bo bé fa bé sa fien di likéo?

⁶ Jésus sé ke: Dunman klôfue mun, amun wun nde bo Ésaïe kleli'n ti nanwle, o klee ke: «Swran nga'm bé ken bé nuan bui su ke bé bu n swran, Swran bé awlen'n nu'an n su,

⁷ Bé manman min ngben, Ye bé klé liké nga swran'm bé kan'n ke o ti Nyanmien mmla.»

⁸ Ye Jésus sé ke: An yatyi Nyanmien mmla'n, an dyran lalafue'm bé nzuen'n su.

⁹ O sé ékun ke: An yi Nyanmien mmla'n i blô mlonmlon, an fa amun lalafue nzuen'm bé su.

¹⁰ Afin Moïse kannin ke: «Mon o nyin yi o si nin o nin,» ye «swran ng'o ken i si annze i nin i nde te'n man bé kuin.»

^11-12 Sannge amun lie'n, an sé ke: Se swran kun sé i si annze i nin ke, liké ng'o kô fa kô men'n o ti corban'n, o ti'a b'o yô liké men i si nin i nin bé kun. — Corban i bô klé ke, ba sié liké so'n ba man Nyanmien. —

¹³ Ke an yô so'n, an bu Nyanmien nde'n i ngben amun bobo amun lalafue nzuen'n i kléle bo an fa klé wié mun'n ti. Te an yô bé wunsu sa sunman kpa ékun.

Liké ng'o satyi swran'n

¹⁴ O flee swran mun ékun, o sé ke: An kwlaa anh tié min nde'n, anh bu i akunndan.

¹⁵ Liké kwlaa nga swran di'n i wié fi kwla satyimen, sannge liké ng'o ô swran klun lo'n, i ye o satyi io.

¹⁶ [Swran ng'o si fa sié'n, mon o fa sié.]

¹⁷ Ke o dyaôô swran'm bé afien le b'o wluu awlô lo'n, i sonnzonfue'm bé usee nyanndra so'n bô.

¹⁸ O sé ke: ?Amun kusu, an si'a ngwlele? ?An si'a ke liké kwlaa nga swran di'n, i wié fi kwla satyimen?

¹⁹ Afin nenh i awlen'n nun ye o wluo, sannge o ko i klun lo, i sin o ko i atin nun kowle'n nun. Ke o kan so'n, o klé ke liké diwa'n kwlaa ti kpa.

²⁰ Ye o sé ke: Liké ng'o ô swran klun lo'n, i ye o satyi io.

²¹ Afin swran klun lo i awlen'n nun ye akunndan te'n wôo, bla nin bian kunndele, awié, swran kunle,

²² bla nin bian bé yi annze bé wun i bô kunndele, bé nyin b'o yi'a liké'n, klunwi, gble, sa sukusuku yôle, ainblôe, swran wun nde kanle, wun tule nin sinnzin yôle.

²³ Liké kainkain so'n kwlaa bé ô swran i klun lo, bé ye bé satyi io.

Nvlé wié nun bla'n b'o lafii Jésus su'n

²⁴ Jésus tuu i bô le o oo Tyr asa'n su. O wluu awlô kun nun, o klô ke nanh man swran fi si ke o ô le, sannge o kwla fiaman.

²⁵ Yele ke bla kun bo asie usu a satyi i wa bla kan'n, o tili Jésus i nde bo bé kan'n, nan wa'a kôtô i bô.

²⁶ Bla so'n fin Phénicie Syrie men'n nun, o idyo grec. O sree i ke o fuan asie usu'n b'o su i wa'n su'n.

²⁷ Jésus sé i ke: Yatyi man ba kanngan'm bé ku yi ka, afin se bé fa ba kanngan'm bé alie'n gue alua'm bé bô'n, o ti'e i nuan su.

²⁸ Ye bla'n sé ke: Nannan, o ti so, sannge alua'm bo bé ô table'n bô'n bé di ba kanngan'm bé alie ônga-ônga'n.

²⁹ Ye Jésus sé ke: Nde nga a kannin'n ti, ko, asie usu'n wa dyaô o wa'n su.

³⁰ Ke o see i sin i awlô lo'n, o wun bakan'n o la be'n su le, asie usu'n wa dyaô i su.

Jésus yôô sutréfue kun dyuédyué

³¹ Jésus tuu i bô Tyr asa'n su ke oh koh Galilée fete'n nuan lo. Ke oh koh'n o siin Sidon nan wa kpe Klo Blu asa'n.

³² Bé faa sutréfue kun b'o kwla idyo'a kpa'n blelii, bé sree i kpa ke o fe i sa fue i su.

³³ O fe dyaôô swran'm bé wun le, bé oo bé ngunmin. O fe i sama'n wlee i su'm bé nun, ye o fe i nuan nzué'n keen i taaman'n.

³⁴ O meen i nyin su nyanmien su lo, o ôtôli, nan wa sé ke: Efata, bo i bô klé ke, tiké.

³⁵ Kpekuon i su'm ba tiké, i taaman'n wa yô kpa, ye o kwla idyo kpaa.

³⁶ Jésus wlaa bé su nun kpa ke nanh man bé kan nde so'n klé swran fi, sannge ke o wlaa bé su nun so'n, i li bo ye o klé bé ke bé kaan.

³⁷ Bé nuan bôô bé wun dan kpa nan ba sé ke: Liké kwlaa ng'o yô'n o yô yé, o man sutréfue'm bé ti sa ye bôbôfue'm bé idyo.