Marc 6 - Nyanmien nde Ufle

Nazarethfue'm ba lafi'a Jésus su

¹ Jésus tuu i bô le o oo i klo. I sonnzonfue'm bé kô sunmenniin.

² Ke sabbat b'o ti Juif'm bé tyen te'n dyuli'n, o wa kléé bé liké Nyanmien sua'n nun. Swran kpanngban bo bé tié i nde'n bé nuan bôô bé wun, bé sé ke: ?Ééé, o tii nde nga'm bé nin? ?O nin i ngwlele nga fin nin? ?O yô se ye o yi atre nga muon?

³ ?Nanh Marie wa b'o ti adyuin difue b'o ti Jacques, nin Joses, nin Jude, nin Simon bé niaan bian nion? ?I niaan bla'm bé nu'an é nun wa? O man ba lafi'e i su.

⁴ Jésus séé bé ke: Bé bu Nyanmien nuan idyofue i swran lika'n kwlaa, sen i bobo i klofue mun, nin i ôsufue nin i awlôfue mun ye bé bu'e i swraan.

⁵ O man wa kwla yi'a atre fi le, sen i sa b'o fa fue tukpatyefue wié'm bé su bé dyuédyué yôle'n ti'n tye.

⁶ I su bo bé lafiman'n o bô i nuan kpa. O oo klo'm bo bé mantan le'n bé su bé liké kléle.

Swran blu-nin-nnyon bo Jésus sunmaan bé'n

⁷ Ke o yiee i sonnzonfue blu-nin-nnyon'n, o séé bé ke bé kwla asie usu mun, ye o bô bé nnyonnyon sunmanle bôo.

⁸ O wlaa bé su nun kpa ke béh koh'n, nanh man bé fa liké fi tra nun, liké diwa ô, tro ô. Nanh man bé fa sika bé pata'n nun, san kponman kunngba tye ye bé faa.

⁹ Bé wla ngbabua sannge nanh man bé wla trale nnyon.

¹⁰ O séé ke: Klo kwlaa nga an dyu su'n, awlô nga an kô siké nun'n anh tran le lélé, san amuan tu amun bô klo so'n su.

¹¹ Se an dyu lika wié nan ba siké'a amun, bo bé tié'a amun nde'n, ke amunh tuh an bô klo so'n su'n, anh kpukpu amun dya wun ndutré'n gue klo so'n su, mon o yô amun lalôfue.

¹² Bé oli, bé kaan nzuen katyile nde.

¹³ Bé fuaan asie usu kpanngban, bé fa ngô fuaa tukpatyefue kpanngban bé wun, bé yôô bé dyuédyué.

Jean baptême yôfue'n i kunle

¹⁴ Famien Hérode tii nde so'n, afin Jésus dunman'n wa fu dan kpa. Bé waan: Jean baptême yôfue'n b'o wuli'n ye wa tyeon, i so'n ti ye o kwla yi atre nion.

¹⁵ Ye wié'm bé waan: Élio, ye wié'm bé kusu bé waan: O ti Nyanmien nuan idyofue kun ke laa Nyanmien nuan idyofue mun sa.

¹⁶ Sannge ke Hérode tii i so'n, i waan: Jean bo n kpee i ti'n, i ye wa tyeon.

¹⁷ Afin Hérode bobo i niaan bian Philippe i yi Hérodiade b'o déé dyelii'n ti, o man bé traa Jean wle bisua.

¹⁸ Afin titi Jean séé i ke, i niaan bian i yi'n i dyale'n ti'e i su.

¹⁹ Hérodiade fa Jean wun nde siéé i klun, o klô ke oh kuinh, sannge wa kwle'e i yô.

²⁰ Afin Hérode srô Jean, o si ke o ti swran kpa, o ti Nyanmien i swran, i so'n ti o man bé nien i su. Ke o tii nde'n bo Jean kannin'n, i akunndan sanngannin, sannge kusu i nde tiéle'n yô i fe.

²¹ Sannge Hérode i awulie tyen dile nun b'o yiee i awa dyunman difue kaklaakla mun, nin i sôndya sasufue mun, nin Galilée swran ngbli mun ke bé wa di tyen'n, tyen nga Hérodiade minnde'n o dyuli.

²² Ke Hérodiade wa talua'n wluu lo b'oh sih ablé'n, Hérode nin bé b'o yiaa bé ke bé wa di liké'n, bé klun dyoo i wun kpa. Ye famien'n séé talua'n ke, liké ng'o klô'n, o kan kléé, oh fah men.

²³ Nan wa ta nda ke: Liké nga a sé n ke n fa man wo'n, kannze men nga n siéé'n i bué boboo, nh fah mon.

²⁴ O fité kô usee i nin ke: ?Nzu ye n sre io? I nin sé i ke: Jean baptême yôfue'n i ti'n.

²⁵ Kpekuun o keen i wun ndende, o see i sin famien'n wun lo, nan wa sé ke: Fa Jean baptême yôfue'n i ti'n man min talié kpekplekpe kun nun ityra'n.

²⁶ Wa yô'a famien'n i fe, sannge nda b'o tali'n, nin bé ng'o yiaa bé ke bé wa di liké'n bé ti, o klô'a ke o kpe talua'n.

²⁷ Kpekuun o sunmaan sôndya nga bé nien i su'n bé nun kun, o sé i ke o kô kpe Jean baptême yôfue'n i ti'n blee.

²⁸ Sôndya'n kô kpee Jean i ti'n bisua'n nun, o fe talié kpekplekpe kun nun bali. O fa maan talua'n ye o fa kô meen i nion.

²⁹ Ke Jean i sonnzonfue'm bé tii nde so'n, bé wa fee i fuen'n nan ba kô siéé ndia b'o ti ke sua ba su'n nun.

Swran akpi-nnun bo Jésus maan bé liké bé dili'n

³⁰ Bé nga Jésus sunmaan bé'n bé yiee i wun le, bé kan liké kwlaa nga bé yôli'n nin liké kwlaa nga bé kléli'n klélii.

³¹ O sé ke: Anh bla man é wo é ngunmin blô lo kô dé wunmien kan. Bé nya'an bé ti di'a liké bobo, afin swran nga bé ba bé ko'n, bé sonnin.

³² I so'n ti, bé fuu alié kun nun ke béh koh bé ngunmin blô lo.

³³ Sannge ke swran sunman kpa bé wuun bé ke bé su ko'n, bé wuun bé wle, o man swran wié'm bé fin klo kwlaa nga bé mantan le'n bé su bé wanndi duun mmua Jésus'm bé nyrun lika nga bé ko lo'n nun.

³⁴ Ke Jésus fin alié'n nun dyrali'n, o wuun swran so mun ba bô nzra dan kpa, nan ba yô i annvo, afin bé ti ke bua'm bo bé le'a tafue sa, ye o bôô bé liké kléle'n bôo, o kléé bé liké kpanngban.

³⁵ Ke alie'n sannin'n, i sonnzonfue'm bé wunngéé i wun le, bé sé ke: Wa ti blô, ye kusu alie'n wa san.

³⁶ Man bé atin man bé kô tô liké diwa nanmué nin klo nga bé mantan wa'n bé su.

³⁷ Jésus sé ke: An bobo anh man bé liké. Sannge bé sé i ke: ?Denier (*f10*) ya nnyon kpaun ye é kô tô man bé nan bé dio?

³⁸ Ye o usa ke: ?An le kpaun nnye? Anh kô nian. Bé kô niannin, nan ba sé i ke: Kpaun'n ti nnun ye kpatra nnyon.

³⁹ Ye o sé bé ke bé sé swran mun man bé gua asé akpasua-akpasua idyré nonman'n su le,

⁴⁰ nan ba tran asé nyanmannyanman yaya o nin ablénun-ablénun.

⁴¹ O faa kpaun nnun'n nin kpatra nnyon'n o men i nyin su nyanmien su lo, o la Nyanmien asé. O bubuu kpaun'n nun, nan wa fa men i sonnzonfue mun ke bé fa tye swran mun. O faa kpatra nnyon'n kusu tyee bé kwlaa.

⁴² Bé kwlaa bé dili bé ku yili,

⁴³ ye bé isaa kpaun sinsin'n nin kpatra ng'o kali'n gbôgbô blu-nin-nnyon.

⁴⁴ Bé bo bé dili kpaun'n yasua'm bé ti akpinnun.

Jésus i nzué'n su nantile

⁴⁵ Ke o yôô so'n kpekuun o mien i sonnzonfue'm bé fu alié'n nun dun mmua i nyrun nzué tyéndyé'n su Bethsaïda bué lie'n su lo. Ke béh koh'n, i bobo maan swran'm bé atin ke bé wo.

⁴⁶ Ke o yôô bé bla nde'n, o oo ôka kun su o nin Nyanmien bé kô kôkô yale.

⁴⁷ Ke alie'n dyoli'n, alié'n wô fete'n i afien lo, Jésus kunngba ô asie wun le.

⁴⁸ O wuun bé alié kanle'n i afe'n, afin aunngban'n fin bé nyrun lo ye o baa. Ke o wa dyu alie ndyennien su bo ako nyinman klikli'm bé bô'n, Jésus nantii fete'n nyin su oo bé wun lo, o yô ke oh buh bé wun.

⁴⁹ Ke bé wuun ke o su nanti fete'n nyin su'n, bé bu i ke wunmieon, nan ba kpan,

⁵⁰ afin bé kwlaa bé nyin te, o man bé klun tii bé. Kpekuun Jésus nin bé su idyo, o sé ke: Anh gua amun wla asé, mion, nanh sre kun amun.

⁵¹ Nan wa fu bé sin alié'n nun, ye aunngban'n yatyii kpeleo. Bé nuan bôô bé wun dan,

⁵² afin ba wu'an kpaun'n i atre'n i wle, yele ke ba kété.

Jésus yôô Génésareth tukpatyefue'm bé dyuédyué

⁵³ Ke bé kpee nzué'n bo bé dyuu Génésareth men'n nun'n, bé sii alié'n nan ba minnde.

⁵⁴ Ke bé fin alie'n nun dyrali'n, kpekuun swran'm bé wuun ke Jésus-o.

⁵⁵ Bé wanndi oo men so'n i akpasua'n kwlaa nun, lika'n kwlaa bo bé ti ke o ô le'n bé fa tukpatyefue mun te nun blee.

⁵⁶ Lika kwlaa ng'o ko'n, klo kaan ô, klo dan ô, nanmué'm bé nun ô, bé fa tukpatyefue mun bé gua bé gua'n su, bé sre i kpa ke man bé ken i trale'n i nuan ndyole'n kunngba tye. Bé kwlaa nga bé ken'n, bé yô dyuédyué.