Marc 5 - Nyanmien nde Ufle

Gérasafue bo asie usu'm bé satyilii'n

¹ Bé dyuu fete'n bué kun lo Gérasafue'm bé men'n nun.

² Ke Jésus fin alié'n nun dyraa tye'n, bian kun bo asie usu a satyii'n, o fin ndia su sua'm bé wun lo bee i wun le.

³ Asiélie su sua'm bé nun ye o traan. Swran fi kwla fa'a dyroko bobo tyi'e kun,

⁴ afin tyen wié bé fa blale bôé kpaun, bé tyii nin dyroko, sannge o kpekpe dyroko'n nun, ye o bubu kpaun'n nun, swran fi kwla lômen.

⁵ Titi kongue nin wia'n nun o ô asiélie nin ôka'm bé su, o kpan, o fa yebue kpekpe i wun.

⁶ Ke o wuun Jésus mmua lo'n, o wanndi kô kôtôô i bô,

⁷ o kpan kéklé kpa ke: ?Jésus, Nyanmien Kpli bo liké fi nu'en i sin'n i Wa, nzu nde ye o ô min nin wo yé afieon? Nh sreh o, nian Nyanmien'n ti, nanh klé n yale.

⁸ Afin Jésus dun mmua séé i ke: Asie usu bo a satyi swran'n, tu bian nga su.

⁹ Ye Jésus use i ke: ?Bé fle o se? O sé ke: Bé fle min Akpasua Kpli, afin é soon kpa.

¹⁰ O sree Jésus kpa ke, nanh mon o fuan bé men so'n nun.

¹¹ Ke oh yôh so'n, wuun kokoti akpasua dan kpa kun ô ôka wié wun le, bé su didi.

¹² Asie usu'm bé sree Jésus kpa ke, o man bé atin man bé kô wlu kokoti so'm bé nun.

¹³ Ye o maan béo, nan asie usu'm ba fité ba kô wlu kokoti so'm bé nun. Ye kokoti akpasua so'n bo bé dyu bo akpi-nnyon kun'n, bé wanndi trôô tyéndyé'n bé guaa fete'n nun, bé mlonnin.

¹⁴ Bé nga bé kankan bé'n bé wanndi kô kan nde so'n klo nin nanmué'm bé nun. Swran'm bé kô niaan sa ng'o yôô lo'n.

¹⁵ Bé baa Jésus wun le, bé wuun bian bo asie usu akpasua kpli'm bé satyilii'n o ti asé le. I nyin a klô, wa wla trale. O man sre kuun bé.

¹⁶ Sa nga Jésus yô maan bian'n bo asie usu'm bé satyilii'n, nin liké ng'o yôô kokoti mun'n, bé nga bé wuun nun'n bé kan kléé bé.

¹⁷ Kpekuun bé su sre Jésus ke o dyaô bé asa'n su.

¹⁸ Ke o fuu alié'n nun'n bian'n bo asie usu'm bé satyilii'n o sree i kpa ke o nin i béh tranh.

¹⁹ Sannge Jésus a kpli'an su, o sé i ke: Ko wo awlô o ôsufue'm bé wun lo, kan sa kwlaa nga o Min'n sii wo aunnvue o yô maan wo'n klé bé.

²⁰ O oli, kpekuun o kô bô sa kwlaa nga Jésus yô menniin'n i ndôlô Klo Blu asa'n su lo. Bé kwlaa bé nuan bôô bé wun kpa.

Jaïrus wa bla'n i tyenle. Bla'n b'o kaan Jésus trale'n b'o yôô dyuédyué'n

²¹ Jésus fuu alié'n nun o se i sin fete'n bué kun lo. Ke o ô fete'n nuan le'n swran kpanngban kpa bé wa yiee i wun le ékun.

²² Nyanmien sua sukpen kun bo bé flee Jaïrus'n baa le. Ke o wuun Jésus'n, o kôtôô i bô,

²³ o sree i kpa, o sé ke: N wa bla kaan'n su wu tyinndyin kpa. Bla'a fo o sa fue i su, mon o yô dyuédyué nan o nyan nguan.

²⁴ Jésus nin i bé oli, ke béh koh'n, swran kpanngban kpa bé su i su, bé mien.

²⁵ Bla kun ô le, mannza tennden too i wun wa di afue blu-nin-nnyon.

²⁶ Wa fe dan kpa ayréfue sunman bé sa nun, o satyii i ninngé'n kwlaa b'o ô i sa nun'n, sannge wa démen, i tukpatye'n woo i nyrun tititi.

²⁷ O tii Jésus ngan ye o wa keen i trale'n i sin lo swran'm bé nun.

²⁸ Afin o sé ke: Se n kwla ken i trale'n bo tye'n, nh yôh dyuédyué.

²⁹ I ôsu kunngba'n nun i mannza'n wa wié, kpekuun o wuun i wun ke i tukpatye'n wa wié.

³⁰ Kpekuun Jésus wuun i wun ke swran wié a ken, o man wa yô dyuédyué. O kpee i wun swran'm bé su, o sua ke: ?Wan ye o kaan n trale nion?

³¹ Ye i sonnzonfue'm bé séé i ke: A wun swran nga bé mian o ye'n, ye a te usa ke: ?Wan ye o kaan mion?

³² O kpe i nyin o kunndee swran ng'o yôô sa so'n.

³³ Ke bla'n wuun liké ng'o yôlii'n, sre kunniin, i wun usulii, ye o wa kôtô i bô, nan wa di i kwlaa nanwle a kléé.

³⁴ Nan Jésus a sé i ke: N wa, n su bo a lafi'n ti, a nyon o ti. Guo o wla asé, ko, mon o tukpatye'n wié.

³⁵ Ke i nuan te ô nde'n su'n, kpekuun swran'm bé fin Nyanmien sua sukpen so'n i awlô lo, bé wa séé i ke: O wa'n wa wu. ?Nzu ti ye a te klé bian'n yaleo?

³⁶ Sannge Jésus wa sié'e i su nde so'n su, o sé Nyanmien sua sukpen'n ke: Nanh sre kun o, o li lafi n su.

³⁷ Wa ma'an swran fi atin ke o kô sunmen, san Pierre, nin Jacques o nin i niaan bian Jean.

³⁸ Ke bé dyuu Nyanmien sua sukpen'n i lika lo'n, Jésus wuun auyé bo swran'm bé bô'n, o nin sunle bo bé sun'n, o nin kpan le bo bé kpan'n.

³⁹ O wluu sua lo, o sé bé ke: ?Nzu ti ye an bô auyé bo an sun soo? Ba'n wa wuman, lafile ye o su lafio.

⁴⁰ Nan ba srii. Ye o kaan bé kwlaa bé bô bé fitélio. O nin ba'n i si, nin i nin, ye bé nga bé oo i sunmanle'n bé wluu kan ba'n wô lo'n.

⁴¹ O utii ba'n i sa nan wa sé i ke: Talita kumi. I bô klé ke: Talua, dyaô!

⁴² Kpekuun talua'n wa dyaô o su nanti. Ke oh yôh so'n, wa di afue blu-nin-nnyon. Bé nuan bôô wun dan kpa.

⁴³ Jésus wlaa bé su nun kpa ke nanh man fi ti sa so'n, ye o sé bé ke bé man talua'n i liké mon o di.