Marc 4 - Nyanmien nde Ufle

Awié guafue'n i wun nyanndra

¹ Jésus bôô liké kléle'n bô ékun fete'n nuan le. Swran kpanngban kpa bé yiee i wun le, o man o fu traan alié kun nun fete'n su lo. Swran'n kwlaa bé gua nzué kpa'n nuan le.

² O kan nde kpanngban kléé bé nyanndra nun, o sé bé ke:

³ Anh tié, bian kun oo awié guale.

⁴ Ke oh sanndih'n, i wié too atin mma'n nun, anunman'm bé wa dili.

⁵ Wié kusu too akpue su. O fifii ndende kpa afin asie nu'an le kpa.

⁶ Sannge ke wia'n bôh'n, o wonsonnin, o wuli ndin bo wa nyenmen i wlawle kpa'n ti.

⁷ Wié kusu too nduin mma'n nun, nduin mma'n buali, o trelii, o man wa wloman.

⁸ Wié'm bé kusu bé too asie kpa su, ke bé fifili'n, bé wlali nnya, bé wloli, tré kun wloo ablasan, kun ékun ablésien, ye kun kusu ya.

⁹ I sin o séé bé ke: Swran ng'o si fa sié'n mon o fa sié.

Sa nga ti ye o buu nyanndra'n

¹⁰ Ke o dyaôô nzra'n nun le'n, bé nga bé ô i wun le'n, bé nin i sonnzonfue blu-nin-nnyon'n bé usee nyanndra so'n bô.

¹¹ O sé bé ke: Amun ye bé yi Nyanmien siéle'n i wun akunndan bo swran wu'en i wle'n, i nglô kléé amuon, sannge bé nga bé ti'a é lie'n, bé lie'n kwlaa sin nyanndra nun

¹² nan ke bé nien i kpa'n ba wunmen, ke bé ti i kpa'n, ba wu'en i wle, nan ba sa'a bé sin Nyanmien wun, nan wa yatyi'a bé wun sa'n wa tye'a bé.

Nyanndra'n i bô tule

¹³ O séé bé ékun ke: ?Se an si'a nyanndra nga bô'n, oh yôh se ye amunh kwlah wun nyanndra ufle'm bé bôo?

¹⁴ Awié guafue'n sanndi Nyanmien nde'n.

¹⁵ Atin mma nga awié'n wié too nun'n yele swran nga ke bé ti Nyanmien nde'n, Satan (*f6*) ba, o wa yô man nde nga bé tili'n o mlin bé klun'n.

¹⁶ I kunngba'n kusu akpue nga awié'n wié too su'n yele be nga ke bé ti Nyanmien nde'n, kpekuun bé klun dyo bé fa su.

¹⁷ Sannge bé ti ke awié b'o le'a ndin sa, bé awlen'n soman, ke afe'n nin yale kléle'n to bé su Nyanmien nde'n ti'n, kpekuun bé ti nun satyi.

¹⁸ Nduin mma nga kusu bo awié'n wié too nun'n yele bé nga bé ti Nyanmien nde'n,

¹⁹ sannge men'n nun ninngé'n i ngôkôe'n, nin anyanbéun i klôle'n, nin bé nyin b'o blô ninngé wié'm bé su'n, o tra Nyanmien nde'n, o man o wloman.

²⁰ Asie kpa nga kusu bo awié'n wié too su'n yele bé nga ke bé ti Nyanmien nde'n, bé fa su, bé wlo, kun wlo ablasan, kun ékun ablésien, ye kun ékun ya'n.

Kannin'n i wun nyanndra

²¹ Jésus usaa bé ékun ke: ?Bé so kannin bé fa sié gbôgbô bô annze lit bô? ?Nanh nglô ye bé sié io?

²² Afin sa fi su ka'a nvialie nun b'o su te'a nglôo, ye aswré nun nde fi su fa'a le b'o su fité'a suo.

²³ Swran ng'o si fa sié'n, mon o fa sié.

²⁴ O sé bé ékun ke: Nde nga an ti'n anh nian su kpa. Sulie nga an su nun man swran wié mun'n, i kunngba'n nun ye Nyanmien suh nun man amuon, oh ukah amun lie'n su.

²⁵ Afin swran ng'o le liké'n ye béh menh wiéo, sannge ng'o le'a liké'n, kaan ng'o ô i sa nun bobo'n béh déh.

Awié'n i kpa yôle

²⁶ O sé ékun ke: Nyanmien siéle'n fa swran kun b'o gua awié.

²⁷ Se o lafi ô, se i nyin ô su ô, wia nun ô, kongue ô, awié'n bobo fifi, o nyin, o si'a ke o yô b'o yô so'n.

²⁸ Asie'n bobo yôé kpa, o fifi, i sin o wlo, kpekuun o non nzué kpa.

²⁹ Ke o kô blô'n, bé fa wloso'n wla nun, afin i kpele'n wa dyu.

Moutarde'n i wun nyanndra

³⁰ O sé bé ékun ke: ?Nzu ye éh fah Nyanmien siéle'n sunnzun io, annze nyanndra ônin ye éh fah klé i bôo?

³¹ O fa trô bo bé flee moutarde'n (*f9*), ke béh luah'n, o ti kaan tra ninngé mma kwlaa nga bé lua bé'n,

³² sannge ke bé kô lua'n, o nyin, o yô dan tra trô'n kwlaa, o tre, o man anunman'm bé kwla yô bé sua i sama'm bé su i fonvo'n nun.

³³ O kan Nyanmien nde nga bé kwla wun i wle'n kpanngban nyanndra nun klé bé.

³⁴ Nde kwlaa ng'o kan kléé bé'n, o ken nyanndra nun, sannge ke o nin i sonnzonfue'm bé ngunmin bé ô le'n, o tu i kwlaa bô klé bé.

Jésus i aunngban dan'n i kpele

³⁵ Lé kunngba so'n i nnosua su Jésus séé i sonnzonfue mun ke: Man é wo fete'n bué kun lo.

³⁶ Ke bé tuu bé bô swran'm bé wun le'n, nan ba fa Jésus alié ng'o ô nun'n i nun ba o, alié wié'm bé kô sunmenniin.

³⁷ Séké dan kpa kpee nzué'n su, o man nzué'n bô guaa alié'n nun, o ka kaan oh yih.

³⁸ Sannge Jésus la alié'n sin lo sunmun'n su o su lafi. Bé tinngélii, bé sé i ke: ?Baba, ke é su wu'n, a bu'e i nde?

³⁹ O tinngéli nan wa idyo aunngban'n, ye o séé nzué'n ke: Yatyi bôle'n, dyran diin! Aunngban'n kpeli, nan lika'n wa to bliin.

⁴⁰ Ye o usaa bé ke: ?Nzu ti ye sre kun amun soo? ?O yô se ti ye an lafi'a n suo?

⁴¹ Sre kuun bé dan kpa, nan ba usa bé wun ke: ?Nzu swran yele nga bo aunngban'n nin nzué'n bobo bé srôé soo?