Marc 3 - Nyanmien nde Ufle

Bian sa uwa'n

¹ Lé kun ékun Jésus wluu Nyanmien sua kun nun. Bian kun ô le i sa'n ti uwa.

² Bé nga bé ô le'n, ke o yô nan ba kwla sanman Jésus'n ti, bé niennien se oh yôh bian so'n dyuédyué sabbat b'o ti bé tyen te'n nun ô.

³ Jésus séé bian'n bo i sa'n ti uwa'n ke: Dyaô dyran bé afien le.

⁴ I sin o usa bé ke: ?Sabbat tyen bé kwla yô swran yé, annze bé yô swran te, bé dé swran, annze bé kun swran? Sannge ba uké'a bé nuan.

⁵ Bé kétéle bo ba kéké'n yôô i ya lélé o bô i wla, ye o niaan bé ya su, nan wa sé bian'n ke: Tinnge o sa'n nun. O tinngee i sa'n nun nan wa yô kpa ke laa'n sa.

⁶ Kpekuun Pharisifue'm (*f4*) bé fitéli, nan bé nin Hérode i minnien'm ba kô tyityi ke bé kunnde liké nga béh yôh béh fah kun Jésus'n.

Swran kpanngban bé yiaa Jésus wun fete'n nuan le

⁷ Jésus nin i sonnzonfue'm bé tyuen bé wun oo fete'n nuan lo. Swran kpanngban kpa bé suu i su. Bé fin Galilée, nin Judée,

⁸ nin Jérusalem, nin Idumée, nin Jourdain'n i sin lo, nin Tyr nin Sidon bé asa su lo. Sa ti bo swran kpanngban so'n bé bee i wun le'n yele ke bé ti sa ng'o yô bé'n.

⁹ Jésus séé i sonnzonfue'm bé ke bé sié alié kaan kun le men nan swran so'm ba mienmen.

¹⁰ Afin ke b'o yô swran sunman bé dyuédyué'n, bé kwlaa nga bé ti tukpatyefue'n bé klô ke béh kenh. I so'n ti, bé wunndun i su.

¹¹ Tyen kwlaa ke asie usu'm bé wuin'n, bé kôtô i bô, bé kpan sé ke: A ti Nyanmien Wa.

¹² Sannge o wla bé su nun kpa ke nanh man bé te i dunman'n nglô.

Swran blu-nin-nnyon bo Jésus faa bé'n

¹³ I sin o fuu ôka kun su, o flee bé ng'o klô ke bé bla'n, nan ba be i wun le.

¹⁴ O siéé bé nun blu-nin-nnyon ke bé nin i tran, ye o sunman bé ke bé kô ken i nde'n.

¹⁵ O maan bé atin ke bé fuan asie usu mun.

¹⁶ Swran blu-nin-nnyon so'n b'o siéli bé'n bé dunman'n ye, Simon b'o ukeli i dunman'n su ke Pierre'n,

¹⁷ nin Zébédée wa Jacques nin i niaan Jean b'o ukali bé dunman'n su ke Boanergès'n, i bô yele Nyanmien Kplale,

¹⁸ nin André, nin Philippe, nin Barthélemy, nin Matthieu, nin Thomas, nin Alphée wa Jacques, nin Thaddée, nin Simon b'o ô akpuéfue'm bé akpasua'n nun'n,

¹⁹ nin Judas Iscariot b'o fa Jésus maan swran mun'n.

Jésus nin Béelzébul

²⁰ I sin o see i sin awlô lo, nan swran kpanngban kpa ba yia le ékun, o man bé kwla di'a liké bobo.

²¹ Ke Jésus ôsufue'm bé tii i so'n, bé bee i fale, afin bé waan: I ti a satyi.

²² Mmla kléfue'm bo bé fin Jérusalem'n bé waan Béelzébul (*f7*) a fe. Mmusu'm bé wléngbi'n i dunman nun ye o fuan asie usu muon.

²³ Jésus flee bé, nan wa bu bé nyanndra ke: ?O yô se ye Satan (*f6*) kwla fuen i bobo wuon?

²⁴ Se famien kun i swran b'o sié bé'n bé bu bé wun nun'n, i famien so'n su kwla tyeman.

²⁵ Ye se awlô kun nunfue'm bé bu bé wun nun'n, awlô so'n su kwla tyeman.

²⁶ I kunngba nion, se Satan dyaô i bobo wun nun bule nun'n, wuun wa bu i bobo wun nun, o su kwla sié tyeman, i lie'n wiéh.

²⁷ Swran fi kwla wlu'a swran wunmienfue kun i awlô lo ke oh fenh i bô ninngé'n se wa du'an mmua tyi'a swran wunmienfue so'n, sannge se o dun mmua tyii'n, o kwla fen.

²⁸ Nanwle, sa te kwlaa nga swran kô yô'n o nin Nyanmien dunman satyile kwlaa nga bé kô satyi'n oh yatyih tye bé.

²⁹ Sannge swran ng'o satyi Nyanmien Wawe'n i dunman'n, o su yatyi tye'e i lé, i sa te'n keh i wun tititi.

³⁰ Sa ti bo Jésus kaan so'n yele ke bé waan: Asie usu kun a fe.

Jésus nin'n nin i niaan mun

³¹ I nin nin i niaan bian'm bé bali, bé dyran guasu lo bé sunmaan swran ke o kô flee.

³² Swran'm bé ti sin yie le, nan ba sé i ke: Nian, o nin nin o niaan'm bé ô guasu lo, bé waan béh wunh o wun.

³³ Ye o usaa bé ke, ?Wan ye o ti min nin nin min niaan nion?

³⁴ O niaan bé nga bé ti sin yie le'n, o sé bé ke: Anh nian, min nin nin min niaan mun ye.

³⁵ Swran ng'o yô Nyanmien klun sa'n, i ye o ti min niaan bian, nin min niaan bla, nin min nin nion.