Marc 2 - Nyanmien nde Ufle

Jésus yôô bubuwafue kun dyuédyué

¹ Ke o dii lé nnyon kun'n, Jésus oo Capernaüm lo ékun. Swran'm bé tii i ke o ô awlô lo,

² o man bé yiaa le kaka lélé bé so'an anuan'n nun le bobo. O kan Nyanmien nde klé bé.

³ Bé fa bubuwafue kun bo swran nnan bé sue'n, bé blelii.

⁴ Ke swran'm bé ti bé kwla fe'e wlu'a lo'n, bé kpaa sua'n i lika nga Jésus ô nun'n i ndenman su sese, nan ba fa te nga bubuwafue'n la nun ba dyre tôklô so'n nun.

⁵ Ke Jésus wuun ke bé lafi i su'n, o séé bubuwafue'n ke: N wa, sa nga a yôô Nyanmien'n, ba yatyi a tye o.

⁶ Mmla kléfue wié'm bé ti le, bé sé bé klun lo ke:

⁷ ?Nzu ti ye o ken i nde lie soo? O satyi Nyanmien dunman. ?Se nanh Nyanmien kunngba tye'n, wan ye o kwla yatyi swran wun sa tye io?

⁸ Kpekuun Jésus wuun bé akunndan'n, nan wa sé bé ke: ?Nzu ti ye an bu akunndan ke nga saa?

⁹ ?Ke n sé bubuwafue'n ke, ba yatyi o wun sa a tye wo'n, annze, dyaô fo o te'n nanti ko'n, ônin ye i kanle ti popo tra kuon?

¹⁰ Sannge ke o yô nan amuan si ke m bo n katyii Swran'n n le atin asie'n su wa n yatyi sa nga bé yô Nyanmien'n tye bé'n ti…

¹¹ O séé bubuwafue'n ke: N wa, dyaô, fo o te'n ko wo awlô.

¹² I ôsu kunngba'n nun o dyaô fee i te'n o fité bé kwlaa bé nyrun le. I so'n ti, bé kwlaa bé nuan bôô bé wun kpa, bé manmaan Nyanmien, bé sé ke: É nian wu'an sa nga i wunsu mlonmlon lé.

Jésus i Lévi flele

¹³ Jésus fité oo fete'n nuan lo ékun, swran'n kwlaa bé bee i wun le, o klé bé liké.

¹⁴ Ke oh sinh'n, o wuun Alphée wa yasua Lévi'n b'o dé guabô sika'n, o ti i dyunman diwle le. O sé i ke: Bla'a su n su. Ye Lévi dyaô suu i suo.

¹⁵ Ke Jésus nin i sonnzonfue'm béh dih liké Lévi awlô lo'n, guabô sika défue kpanngban nin sa tete yôfue'm bé ô bé nun wié, afin bé nga bé su i su'n bé sonnin.

¹⁶ Ke mmla kléfue bo bé ti Pharisifue'n (*f4*) bé wuun ke o nin guabô sika défue nin sa tete yôfue'm bé su di liké'n, bé sé i sonnzonfue'm bé ke: ?Nzu ti ye o nin guabô sika défue nin sa tete yôfue mun di likéo?

¹⁷ Ke Jésus tii nde nga bé kan'n, o sé bé ke: Nanh swran ng'o ti dyuédyué'n ye o ko ayréfue sion, tukpatyefue te o koo. Man ba'a nanwlefue'm bé flele, sa tete yôfue mun ye m baa bé fleleo.

Sre nun kpele i su sa usale

¹⁸ Lé kun Jean sonnzonfue'm bé nin Pharisifue'm bé su kpe sre nun, bé wa usaa Jésus ke: ?Nzu ti ye Jean sonnzonfue'm bé nin Pharisifue'm bé lie'n bé kpe sre nun, sannge o sonnzonfue'm bé kpe'a wiéo?

¹⁹ Jésus sé bé ke: ?Ke yasua b'o su fa atonvle'n nin i dyanvue mun te ô le'n, bé kwla kpe sre nun? Ke yasua so'n nin bé te ô le'n, bé kwla kpe'a sre nun.

²⁰ Lé kun bé wa dé yasua so'n bé sa nun, ble so'n nun ye béh kpeh sre nuon.

²¹ Swran fi fa'a tannin sin ufle bo bé nian kpu'e lé'n ta'a trale nvuen nun, se o yô so'n, sin ufle'n tyuentyuenh tannin nvuenfue'n oh titih, ye i titile'n oh yôh te tra laa'n.

²² Ye swran fi fa'a du vin lofle gue'e kplô kôtôkun nvuen nun, se o yô so'n, du vin'n kpukéh kôtôkun'n ye du vin'n nin kôtôkun'n béh satyih. Sannge man bé fa du vin lofle'n gue kplô kôtôkun ng'o ti ufle'n nun.

Blé mma fianfianle sabbat tyen

²³ Lé kun sabbat b'o ti Juif'm bé tyen te'n, ke Jésus nin i sonnzonfue'm béh sinh blé b'o ti ke awié sa'n i fié nun'n, i sonnzonfue'm bé too blé'n i fianfianle su.

²⁴ Pharisifue'm (*f4*) bé séé i ke: ?Nian, nzu ti ye bé yô liké nga swran le'a atin ke o yôé sabbat tyen nion?

²⁵ Jésus sé bé ke: ?Ke awé kuun David nin i minnien mun bo bé sa miannin'n, sa nga bé yôli'n, an nian kennge'en lé?

²⁶ Ke o wluu Nyanmien sua'n nun Abiathar b'o ti Nyanmien nyrun dyranfue dan'n i ble su'n, o dii kpaun bo bé fa teke Nyanmien nyrun'n, nan wa men i minnien'm bé wié. Swran fi le'a atin ke o di kpaun so'n san Nyanmien nyrun dyranfue'm bé ngunmin ye bé le atin bé dio.

²⁷ I sin o sé bé ékun ke: Bé sié sabbat tyen'n maan swran, nanh sabbat tyen'n ti ye swran ô leo.

²⁸ O man m bo n katyii Swran'n, sabbat tyen kpa'n, m bobo ye n siélio.