Marc 15 - Nyanmien nde Ufle

Jésus i Pilate dyasu fa kole

¹ Ke alie'n tyennin'n, Nyanmien nyrun dyranfue dandan, nin kpenngben mun, ye mmla kléfue mun bé nin dyole difue'm bé kwlaa bé yiali, bé wuun bé wun. Ke bé tyii Jésus'n, bé fe oli, nan ba fe i a wla Pilate sa nun.

² Pilate usee i ke: ?A ti Juif'm bé famien? Jésus sé i ke: Ye o nuan ô su leo.

³ Nyanmien nyrun dyranfue dandan'm bé senmenniin nde kpanngban su.

⁴ Pilate usee ékun ke: ?A te'a nde fi su? Nian o wun nde kpanngban bo bé kaan.

⁵ Sannge Jésus a te'a nde fi su kun, o man Pilate i nuan bô i wun kpa.

Bé séé ke bé kun Jésus

⁶ Pâque (*f17*) dile kwlaa nun Pilate yatyi bisuafue kun nga bé sre i ke o yatyi i nun man bé'n i nun man bé.

⁷ Ke oh yôh so'n, wuun bian kun bo bé flee Barrabas b'o nin i wiéngu nyin kékléfue mun bé dyaôô kpenngben'm bé wun bé kunnin swran'n, o ô bisua'n nun.

⁸ Ke swran'm bé oo Pilate wun lo bé sree i ke o yô sa ng'o yô man bé titi'n,

⁹ o usaa bé ke: ?An klô ke n yatyi Juif'm bé famien'n i nun man amun?

¹⁰ Afin o si ke Nyanmien nyrun dyranfue dandan'm bé nyin b'o tyii'n ti ye bé fe wlee i sa nuon.

¹¹ Sannge Nyanmien nyrun dyranfue dandan'm bé séé swran'm bé ke bé sé Pilate ke o yatyi Barrabas nun man bé.

¹² Pilate usaa bé ékun ke: ?Ye n yô bian nga an flee Juif'm bé famien'n, i se?

¹³ Bé kpan sé ke: Bôbôé waka'n su!

¹⁴ Pilate usa bé ke: ?Nzu sa bo tye ye o yôlio? Ye bé kpaan kéklé kpa ke: Bôbôé!

¹⁵ Ke Pilate klô ke oh yôh sa ng'o yô swran'm bé fe'n, o man o yatyi Barrabas nun maan bé. Ke o man bé bôô Jésus nin ngblé'n, o fe maan bé ke bé kô bôbôé waka'n su.

Sôndya'm bé Jésus finfin yôle

¹⁶ Sôndya'm bé fa Jésus oo famien'n i awlô lo, nan ba yia sôndya'n kwlaa bo bé ô le'n.

¹⁷ Bé faa trale bo i nyin ti ke ba wle kôndrô bui nun sa'n, bé wlee i wun, ye bé woo ôwié ke sika klé sa bé fa wle i ti.

¹⁸ Kpekuun bé yôô i liké, bé sé ke: Juif'm bé famien, Nyanmien man a tye ô!

¹⁹ Wuun béh fah ndema fin i ti'n su, béh gueh i wun ngosre, wuun béh kôtôh i bô.

²⁰ Ke bé yô i finfin so wiéli'n, bé yii i wun trale bo i nyin ti ke ba wle kôndrô bui nun sa'n, nan ba fe i bobo lie'n ba wle i wun ékun, ye bé fe oo i waka'n su bôbôleo.

Jésus i waka'n su bôbôle

²¹ Bian kun fin fié su o su ba, bé mieen ke o sua Jésus waka'n. Bé flee Simon, o fin Cyrène, Alexandre nin Rufus bé si nion.

²² Nan ba fa Jésus ba o lika nga bé flee Golgotha'n bo i bô yele Ti Kônglôman Lika'n nun lo.

²³ Bé faa du vin bo myrrhe (*f3*) sanngan nun'n bé meen ke o non, sannge wa nonman.

²⁴ Bé bôbôé waka'n su, bé tuu i trale'm bé wun foto nan béh wunh nga bo swran kun nyenh'n.

²⁵ Nglemun wia'n nun ye bé bôbôli io.

²⁶ Bé klee sa ti bo bé bôbôlii'n ke: Juif'm bé famien.

²⁷ Bé bôbôli i nin kôdiawiéfue nnyon, kun ô i fama su, kun ô i be su.

²⁸ [O man Nyanmien Nde nga bé kleli'n o kpeen su. Bé klee ke: «Bé ke wlaa sa te yôfue'm bé nun.»]

²⁹ Bé nga béh sinh le'n, bé kpe i nzôwa, bé kédyéé bé ti'n bé séé ke: En-heen! o bo o waan ah bubuh Nyanmien sua dan'n nan ah kplenh i lé nsan'n,

³⁰ dé o wun, fin waka'n su dyra!

³¹ Nyanmien nyrun dyranfue dandan'm bé kusu bé nin mmla kléfue'm bé yôô i finfin, bé sé bé wiéngu ke: O déé swran wié mun, sannge o kwla démen i bobo wun.

³² Man Christ (*f1*), Israël'm bé famien'n o fin waka'n su dyra sien'n, man é wuin nan é lafi i su. Bé nga bé bôbôô bé nin i'n, bé kusu bé kpee i nzôwa wié.

Jésus i wule

³³ Ke wia'n dyrannin'n, lika'n kwlaa dunnin lélé fa dyu nnosua wia'n nun.

³⁴ Nnosua wia so'n nun Jésus kpaan kéklé ke: «?Éloï, Éloï, lama sabaktani?» bo i bô'n yele: «?Min Nyanmien, min Nyanmien, nzu ti ye a wanndi mion?»

³⁵ Ke bé nga bé ô le'n bé wié tili'n, bé sé ke: Anh nian, o su fle Élie.

³⁶ Nan bé nun kun a wanndi a kô fa mlan a bô du vin nyanwa nun, o fa bleblee ndema su, o fa meen ke o non, o sé ke: Anh yatyii le, man é nian se Élie wa dyre i ô.

³⁷ Ye Jésus kpannin kéklé kpa nan wa wu.

³⁸ Tannin dan bo bé fa kpe Nyanmien sua dan'n nun'n kpatyii i nglô lo lélé fa dyu i ngua wa.

³⁹ Ke sôndya ya sukpen'n b'o dyin Jésus nyrun ndenman su le'n o wuun ke o kpannin nan wa ka nun'n, o séé ke: Nanwle, bian so'n ti Nyanmien Wa sakpa.

⁴⁰ Bla wié'm bé kusu bé ô mmua lo bé nien. Marie b'o fin Magdala'n, min Marie, Jacques Kan nin Joses bé nin'n, nin Salomé bé ô bé nun.

⁴¹ Bé ye ke Jésus ô Galilée lo'n, bé su i su, bé nien i likaa. Bé nin bla wié'm bo bé nin i bé oli Jérusalem'n bé ô le wié.

Jésus i siéle

⁴² Ke oh yôh so'n, wuun alie a dun mmua dyo. Tyen so'n ti Juif'm bé wun buabuale tyen, wuun sabbat b'o ti bé tyen te'n o su wa wlu awlô.

⁴³ O man Joseph b'o fin Arimathée'n, b'o ti dyole difue'm bé nun kun, bo bé bu i swran'n, bo i bobo kusu minnde tyen nga Nyanmien feh i men'n, o bali. O tre i awlen o oo Pilate wun lo kô sre Jésus fuen'n.

⁴⁴ Ke Pilate tii i ke wa wu'n, o bôô i nuan, o flee sôndya ya sukpen'n, o usee se o wuli wa tye ô.

⁴⁵ Ke o séé i ke o wuli wa tye'n, o fa maan Joseph.

⁴⁶ Joseph tôô tannin kpa kun, o tii i fuen'n waka'n su, o fa tannin'n tyityilii, nan wa kô siéé ndia bo bé kpee yebue nun'n i nun. Ye o kôndôô yebue dan kun nyin i anuaan.

⁴⁷ Marie b'o fin Magdala'n nin Marie, Joses i nin'n, bé nian kan bé siéé lo'n.