Marc 14 - Nyanmien nde Ufle

Jésus wun nde tyityile

¹ Ke o ke lé nnyon nan Pâque'n (*f17*) nin kpaun bo bé gua'a nun ayré'n (*f19*) i tyen dile'n wa dyu'n, Nyanmien nyrun dyranfue dandan nin mmla kléfue'm bé kwlaa bé kunnde ngwlele wafa nga bé fa tra Jésus gble nun bé kuin'n.

² Afin bé sé ke: Nanh mon o yô tyen dile'n nun, se o yô so'n, o tyeman nan swran'm ba tri.

Bla kun fa blofue nzué guaa Jésus ti'n su

³ Ke Jésus ô Béthanie Simon kôkôwéfue'n i awlô lo'n, bo bé ti alie'n sin'n, bla kun wluu lo, blofue nzué bo i gua ti kéklé kpa'n i albâtre (*f18*) se kun ô i sa nun. Bé fa nard (*f20*) ngô muen ye bé fa yôlio. O buu se so'n i ti, o fa blofue nzué'n guee Jésus ti'n su.

⁴ O yôô wié'm bé ya, nan ba usa bé wiéngu ke: ?Blofue nzué satyile ngben ke nga sa'n, i bô yele ônin?

⁵ Bé kwla yô i ate b'o tra denier (*f10*) ya nsan, bé fa man yalefue mun. Nan ba idyo bla so'n.

⁶ Sannge Jésus sé bé ke: Anh yatyii le. ?Nzu ti ye an fite i awlen soo? Liké ng'o yô maan min'n ti kpa.

⁷ Afin amun nin yalefue mun ye amunh kah wa titio, an kwla yô bé kpa ble kwlaa nga an klô'n, sannge n lie'n, min nin amun su tra'an wa titi.

⁸ Wa yô ng'o kwle i yô'n, wa dun mmua gua min wun blofue nzué, min nzie ye wa siéo.

⁹ Nanwle, men wunmuan'n nun lika kwlaa nga béh bôh dyasin fe'n, béh kanh sa nga bla nga yôli'n wié, ke bé wla kpen i su.

Judas i Jésus swran'm bé fa manle

¹⁰ Judas Iscariot b'o ti i sonnzonfue blu-nin-nnyon'n bé nun kun'n o kô tôô Nyanmien nyrun dyranfue dandan mun ke oh fah Jésus man bé.

¹¹ Ke bé tili'n, bé klun dyoli, ye bé séé i ke béh menh i sika. O man Judas kunndee tyen ng'o ti kpa bo i nun oh kwlah fe man bé'n.

Jésus nin i sonnzonfue'm bé dii Pâque'n

¹² Kpaun bo bé gua'a nun ayré'n (*f19*) i tyen dile klikli'n bo i nun ye bé kun Pâque (*f17*) bua'n, Jésus sonnzonfue'm bé usee i ke: ?Nin fan ye a klô ke é kô siésié nan a di Pâque nion?

¹³ O sunmeen i sonnzonfue'm bé nun nnyon, o sé bé ke: Anh wo klo lo, amun nin yasua kun bo nzué se kun dyin i ti su'n, amunh yiah, anh su i su.

¹⁴ Lika ng'o wlu nun'n, anh sé awlô ifue'n ke: Ndya waan é wa uso o ke: ?Lika ng'o nin i sonnzonfue'm bé di Pâque'n o ô nin?

¹⁵ Oh kléh amun nglô sua ba dan kun, ba siésié i nun ninngé'n kwlaa, le ye amun wa siésié Pâque'n i diwle'n man yéo.

¹⁶ I sonnzonfue'm bé oli, ke bé dyuu klo lo'n, bé tôô ninngé ng'o kan bé nde kléé bé'n bé le, nan ba siésié Pâque i diwle'n.

¹⁷ Ke alie dyoli'n, o nin i sonnzonfue blu-nin-nnyon'n bé bali.

¹⁸ Ke bé ô table'n su bo béh dih liké'n, Jésus séé ke: Nanwle, amun nga amun nin min di liké'n, amun nun kun wa fa min man swran mun.

¹⁹ Kpekuun bé wla a bô, bé use bé ti nun ti nun, nga waan: ?Mion? nga waan: ?Mion?

²⁰ Ye o sé bé ke: Amun blu-nin-nnyon'n amun nun kuon, swran ng'o fe i sa wla n lie'n sin talié'n nun'n, io.

²¹ M bo n katyii Swran'n n su ko ke bé klee min wun nde'n nun'n sa, sannge swran ng'oh fah min man swran mun'n, i yakô! O flunman ke ba wu'a swran so'n.

Communion fale'n i ba kpele

²² Ke béh dih liké'n, Jésus faa kpaun, ke o laa Nyanmien asé'n, o bubuu nun fa maan bé. O sé ke: Anh dé, kpaun ng'o ô ye'n ti min wunnen.

²³ I sin o faa klôwa kun, ke o laa Nyanmien asé'n, o fa maan bé, nan bé kwlaa ba non.

²⁴ Ye o sé bé ke: Du vin ng'o ô ye'n o ti min mmôdya b'o man amun nin Nyanmien amunh dih anuanse. Swran kpanngban bé ti ye béh gueh i aséo.

²⁵ Nanwle, n su no'an raisin (*f12*) nzué kun lélé san tyen nga min nin amun éh nonh ufle Nyanmien i men'n nun lo'n.

²⁶ Ke bé tôô Nyanmien manmanle dyué'n, bé oo Olive Ôka'n su lo.

Jésus séé ke Pierre wa sé ke o simen

²⁷ Jésus séé bé ke: Amun kwlaa amun ti nun wa satyi, afin bé klee ke: «M ma bô bua tafue'n, ye bua'm béh bôh sanndi.»

²⁸ Sannge ke n wu bo n kô tyen'n, nh dunh mmua amun nyrun Galilée lo.

²⁹ Pierre sé i ke: Kannze bé kwlaa bé ti nun satyih'n, n lie'n su satyi'a wié.

³⁰ Ye Jésus sé i ke: Nanwle, nde kongue nga bobo, a wa sé ke a si'a min so kpe nsan, nan ako nyinman'n wa bô kpe nnyon.

³¹ Sannge Pierre dyraan nde so'n su kéklé kpa ke: Kannze min nin wo é wu'n, san éh wuh, n su sé'a ke n si'a o lé. Nan bé kwlaa ba kan nde kunngba so'n.

Jésus kôkô yale kléé Nyanmien Gethsémané lo

³² Ye bé oo lika kun bo bé flee Gethsémané'n nun. Jésus séé i sonnzonfue'm bé ke: Ke nh kôh kôkô yale klé Nyanmien, anh tran wa.

³³ Ye o faa Pierre, nin Jacques, nin Jean bé olio, akluntitie'n too i su, ye awlabôe'n bôô i kunle bôô.

³⁴ O séé bé ke: Awlabôe'n su kun min, anh ka wa anh tran bé nyin su.

³⁵ Ke o oli i nyrun lo kaan'n, kpekuun o fin i wun asé, o sé Nyanmien ke, se nyrennen do nga kwla tô fuen'n, mon o tô fuen.

³⁶ O sé ke: Baba, a kwla sa'n kwlaa yô, yô man nyrennen wié nga tô fuan min, sannge nanh yô nga n klô ke o yô su'n, sannge yô nga a klô ke ah yôéh su'n.

³⁷ Ke o se i sin b'o tô i sonnzonfue muon, bé su lafi, ye o sé Pierre ke: ?Simon, a lafi? W'a kwla tra'an do bo kun?

³⁸ Man amun nyin tran su, ye amun nin Nyanmien anh kôkô yale, nan Lakafue'n wa laka'a amun. Amun awlen'n wô su ke amunh yôh, sannge an le'e i wun fanngan.

³⁹ O yatyi bé le oo ékun, o kô kan nde kunngba'n klé i Si.

⁴⁰ O se i sin baa ékun, oh tôh béo, bé su lafi, afin lafile'n wô bé nyin su. Bé wu'an nde nga bé kan klé io.

⁴¹ Ke o bee i kpe nsan su'n, o sé bé ke: Anh dé wunmien, anh lafi sien'n. Wa wié! Do'n wa dyu, anh nian, bé wa fa m bo n katyii Swran'n man sa te yôfue mun.

⁴² Anh dyaô man é wo, swran ng'oh fah min man swran mun'n, o su ba.

Jésus i trale

⁴³ Ke i nuan te ô nde'n su'n, kpekuun Judas b'o ti i sonnzonfue blu-nin-nnyon'n bé nun kun'n o nin swran kpanngban bo Nyanmien nyrun dyranfue dandan, nin mmla kléfue, nin kpenngben'm bé sunmaan bé'n, ba bô nun. Kaka nin klonman ô bé sa nun.

⁴⁴ Swran ng'o fe maan swran mun'n, o kléé bé nzolie kun ke: Swran nga n tô n sa yi i komin'n, wuun io, anh tre fe o, anh nien i su kpa.

⁴⁵ Ke o dyuu lo tye'n, o wunngéé Jésus wun le, o sé i ke: Baba!

⁴⁶ Kpekuun ye o tô i sa yii i komion, ye swran so'm bé traa Jésus-o.

⁴⁷ Bé bo bé ô le'n bé nun kun tyueen i kaka'n, o fa fiin Nyanmien nyrun dyranfue dan'n i swran'n, o kpe i su'n.

⁴⁸ Jésus séé bé ke: An su n su nin klonman nin kaka mun ke kôdiawiéfue bo an be i trale sa.

⁴⁹ Tyen kwlaa n wô amun afien Nyanmien sua dan'n nun, n klé amun liké, amuan tra'a min. Sannge bé yôé so nan Nyanmien Nde nga bé kleli'n o kpen su.

⁵⁰ Ye bé kwlaa bé yatyii le bé wanndilio.

Gbanflen'n b'o wanndili'n

⁵¹ Gbanflen kun bo tannin sin kun kle i wun'n o su i su. Bé trelii,

⁵² sannge o yatyii tannin'n bé sa nun, o fe i wun kplen wanndili.

Jésus i dyole difue dandan'm bé dyasu fa kole

⁵³ Bé fa Jésus oo Nyanmien nyrun dyranfue dan'n i lika lo. Nyanmien nyrun dyranfue dandan, nin kpenngben, nin mmla kléfue'm bé kwlaa ba yia lo.

⁵⁴ Pierre su i su, sannge o mentenmen lélé bé fa dyuu Nyanmien nyrun dyranfue dan'n i awlô lo. O nin sua sunianfue'm bé traan sin wun le bé su ton.

⁵⁵ Nyanmien nyrun dyranfue dandan nin dyole difue'm bé kwlaa bé kunnde nde kun bo bé kwla dyran su bé fa kuin'n, sannge ba nye'en lé.

⁵⁶ Afin bé nun kpanngban bé toon i suen, sannge suen so'n bo bé toen'n bé seman.

⁵⁷ Bé wié'm bé dyaô bé toon i suen, bé sé ke:

⁵⁸ É tii ke o séé ke, oh bubuh Nyanmien sua dan nga swran ye o kplannin'n, nan i lé nsan su'n oh kplanh ufle bo swran sa su wlu'a nun.

⁵⁹ O nin i so'n ngba, bé nde nga bé fa ton i suen'n, bé seman.

⁶⁰ Ye Nyanmien nyrun dyranfue dan'n o dyaô usaa Jésus ke: ?A te'a nde fi su? Nde nga bé ken le'n, o ti se?

⁶¹ Jésus traan bliin, wa uké'e i nuan. Nyanmien nyrun dyranfue dan'n usee ékun ke: ?Christ, Nyanmien bo bé yi i aye'n i Wa'n yele wo?

⁶² Ye Jésus sé i ke: Een, yele min. Amun wa wun m bo n katyii Swran'n ke n ti Nyanmien Kpli'n i fama su, ye amunh wunh min n wô nyanmien blé'n su n su ba.

⁶³ Ye Nyanmien nyrun dyranfue dan'n tii i bobo wun trale'n nuon, o sé ke: ?Lalôfue ônin ye éh kunndeh ékuon?

⁶⁴ An tii Nyanmien dunman b'o satyi'n. ?An bu i se? Bé kwlaa bé sé ke wa di fo, nan o nin kunle fata.

⁶⁵ Bé wié'm bé gue i wun ngosre, bé bô i zaga, bé use i ke: ?Wan ye o bô woo? Ye sua sunianfue'm bé soe bôle suo.

Pierre séé ke o si'a Jésus

⁶⁶ Ke Pierre ô awlô'n nun asie wun le'n, Nyanmien nyrun dyranfue dan'n i afannien kun bali.

⁶⁷ Ke o wuun Pierre ke o su ton sin'n, o nieen siin, o séé i ke: O kusu, a ô Jésus b'o fin Nazareth'n i sin wié.

⁶⁸ O sé ke: Swran nga a ken i nde'n, n simen, nde kpa nga a kan'n, n wu'en i wle. I sin o fité oo ala'n bô lo.

⁶⁹ Afannien'n wunniin, ye o wa kan kléé bé nga bé ô le'n bé ékun ke: Bian nga ô bé nga bé ô le'n bé nun wié.

⁷⁰ Nan wa sé ke o ti'a so. Ke o tyee kan'n, bé nga bé ô le'n, bé séé Pierre ékun ke: Nanwle, o kusu, a ô bé nga bé o le'n bé nun wié, afin a ti Galiléefue.

⁷¹ Ye o fa Nyanmien Kpli wuewue i wuon, o sé ke: Se m bua atô'n, man Nyanmien Kpli wun min. Bian nga an ken i nde'n, n simen.

⁷² I ôsu kunngba'n nun ye ako nyinman'n bôli i kpe nnyon su lie nion, ye Pierre wla kpeen nde nga Jésus kan klélii ke, o wa sé ke o simen so kpe nsan, nan ako'n wa bô'n, i suo. Ye o too sunle suo.