Marc 13 - Nyanmien nde Ufle

Jésus kaan Nyanmien sua dan'n i satyile nde

¹ Ke Jésus fin Nyanmien sua dan'n nun fitéh'n, i sonnzonfue kun séé i ke: Baba, nian yebue nin sua nga mun ke bé wafa tio!

² Ye Jésus sé i ke: ?A wun sua dandan nga mun? I yebue su b'o su kan guamaan.

Nyrennen nga bé wa wuin nan men'n wa bô'n

³ O traan asé Olive Ôka'n su Nyanmien sua dan'n i nyrun ndenman su le. Ke o nin Pierre, nin Jacques, nin Jean, nin André bé ngunmin bé ô le'n, bé séé i ke:

⁴ Klé é ble nga liké so'n o wa yô'n, o nin liké ng'o klé ke liké so'm bé su wa yô'n.

⁵ Kpekuun Jésus su kléklé bé liké so mun, o sé bé ke: Anh sasa amun wun kpa, nanh man swran fi laka amun.

⁶ Afin swran kpanngban bé wa fa n dunman'n béh séh ke min yele bé. Bé wa laka swran sunman.

⁷ Ke an ti ale i wun nde'n, nin i ngannien'n, nanh man amun klun titi amun, afin san sa so'm béh yôh. Sannge o su yô'e i awiélie.

⁸ Nvlé kun wa dyaô nvlé kun wun, ye famien kun wa dyaô i wiéngu famien kun wun. Lika wié'm bé nun asie'n o wa kédyé, ye awé wa kpen. I kwlaa so'n ti nyrennen'n i bué nuan kaan sa.

⁹ Anh sasa amun wun, afin bé wa fa amun man dyole difue mun, béh bôh amun Nyanmien sua'm bé nun. Ke o yô nan amuan kan min nde a klé kpenngben nin famien mun'n, min ti béh fah amun ko bé dyasu.

¹⁰ San béh dunh mmua bô dyasin fe'n klé nvlénvlé'n kwlaa i sin nan sa so'm ba yô.

¹¹ Ke béh fah amun kô man swran mun'n, nanh an dun mmua bu nde nga amunh kanh'n i akunndan, sannge anh kan nde nga Nyanmien fa man amun do so'n su'n, afin nanh amun ye amunh idyooh, Nyanmien Wawe'n ye oh idyooh.

¹² Swran'm bé wa fa bé niaan bian man swran mun ke bé kun bé, ye yasua'm bé kusu bé wa yô bé mma'm bé so, ba'm bé wa dyaô bé sin nin bé nin'm bé wun béh fah bé man swran mun ke bé kun bé.

¹³ Min ti swran'n kwlaa bé wa kpo amun, sannge swran ng'o tre i awlen lélé dyu i awiélie'n, oh fitéh nun.

Nyrennen dan'n

¹⁴ Amunh wunh «tété liké» ke o ô lika ng'o fata'a ke o tran nun'n i nun. —— Man swran ng'o kanngan nde so'n o bu i akunndan. —— Ke an wun i so'n, man bé nga bé ô Judée lo'n bé wanndi wo ôka'm bé su.

¹⁵ Nanh man swran ng'o ô sua ti gbagblabga'n su'n o dyra wlu i sua lo ke o kô fa liké,

¹⁶ ye swran ng'o ô fié su'n, nanh mon o se i sin ke o kô fe i trale dan'n.

¹⁷ Ble so'n nun wunnzefue nin bla ta'm bé yakô!

¹⁸ Anh sre Nyanmien ke nanh man i so'n yô ayre nun.

¹⁹ Afin ble so'n o wa yô nyrennen ble kun bo ke o fin lalaa bo Nyanmien yii men'n, lélé o fa dyu nde'n, i wunsu nian yô'a lé, ye i wunsu su yô'a kun lé.

²⁰ Se é Min Nyanmien'n wa kpe'a tyen so'n su wa yô'e tika'n, swran fi su fité'a nun, sannge o yôé tika bé b'o faa bé'n bé ti.

²¹ O man se swran wié sé amun ke: Nian, Christ ô wa'n, annze: Nian, o ô lé sa'n, nanh an lafi su mlonmlon.

²² Afin bé bo bé ton bé wun suen ke bé ti Christ'n (*f1*), o nin bé bo bé ton bé wun suen ke bé ti Nyanmien nuan idyofue'n, bé wa dyaô, béh yih atre, béh yôh abônuan sa mun lélé ke bé fa laka bé bo Nyanmien faa bé'n, se béh kwlah nyan bé ô.

²³ Sannge amun lie'n anh sasa amun wun sa so'm bé lika. Man dun mmua bô i kwlaa su a klé amun.

Jésus b'o katyii Swran'n i bale

²⁴ Sannge ke nyrennen so'n kô sin'n, ble so'n nun wia'n katyih tuun, anglô'n su ta'a kun,

²⁵ nzraama'm béh finh nyanmien su lo gua, ye bé wa kédyé nyanmien su lo ninngé ngblingbli'm bé nun.

²⁶ I sin béh wunh m bo n katyii Swran'n ke n wô nyanmien blé'n su n su ba. Mh bah yasua su, min nyrun nyannyan o yô srô.

²⁷ Nh sunmanh min ange mun, bé wa yia bé bo Nyanmien faa bé bo bé ô men wunmuan'n nun'n ke o fin asie'n i awiélie lo lélé fa dyu nyanmien'n i awiélie lo.

Blofue aloma'n i su nde

²⁸ Anh fa sunnzun blofue aloma'n bé nian. Ke oh nyrenh bo i nnya'n treh'n, an si ke munngun'n wa mantan.

²⁹ I kunngba nion, amun kusu ke an wun ke ninngé so'm bé su yô'n, man amun si ke m bo n katyii Swran'n min nin wa a mantan, n dyin anuan'n sin.

³⁰ Nanwle, swran nga bé ô le'n, bé su wiéman nan sa so'n kwlaa wa yô.

³¹ Nyanmien'n nin asie'n béh sinh, sannge min nde'n i ble'n su si'an lé.

Nyanmien kunngba tye ye o si i bale tyeon

³² Sannge tyen so'n nin i do so'n swran fi simen, ange'm bo bé ô nyanmien su lo'n nin m bo n ti i Wa'n bobo é simen, san n Si kunngba tye ye o si io.

³³ Anh fa sié amun klun kpa, anh tran minnde, afin an si'a tyen nga sa so'm bé yô'n.

³⁴ Oh yôh ke swran kun b'o su ko lika sa, o tu i bô i awlô'n nun, o fe i ninngé'n kwlaa wle i swran'm bé sa nun, o man bé kwlaa bé dyunman, ye o sé anuan sunianfue'n ke o nian su kpa.

³⁵ I so'n i, anh nnosua ô, se kongue ô, se ako nyinman klikli su ô, se nglemun ô.

³⁶ Anh tran minndee, nanh man o wa tô amun nvlunuen nun ke an su lafi.

³⁷ Nde nga n kan klé amun ye'n, n kan klé swran'n kwlaa ke bé tran minnde.