Marc 12 - Nyanmien nde Ufle

Raisin fié sunianfue'm bé wun nyanndra

¹ Jésus bu nyanndra wié kléé bé. O sé ke: Bian kun dii raisin (*f12*) fié. O sii i wun, o kpee raisin'n i nzué tyuenwle, o kplaan akpa fléiin kun, ye o fa wlaa raisin fié sunianfue'm bé sa nun, nan wa o men wié nun.

² Ke o dyuu raisin'n i tile'n, o sunmeen i swran kun raisin fié sunianfue'm bé sin ke o kô fe i lie blee.

³ Bé tre bé bôlii, bé keen i bô, nan wa tôtô i sa a se i sin.

⁴ O sunmeen i swran kun ékun bé wun lo, bé bôô i fe, bé yôô i te kpa.

⁵ I nsan su lie'n b'o sunmenniin'n, bé kunniin. I sin o sunmaan wié mun ékun, bé bôô wié, bé kuun wié.

⁶ O man o ke i wa yasua'n b'o ti awlen su ba'n i kunngba tye. O sunmeen bé wun lo ékun, o sé ke: N wa lie'n, bé wa bui swran.

⁷ Sannge ke raisin fié sunianfue so'm bé wunniin'n, bé sé bé wiéngu ke: I adya difue'n ye, anh bla man é kuin nan i ninngé'm bé yô é lie.

⁸ Ye bé tre bé kuun io, nan ba yii raisin fié'n sin lo.

⁹ ?Nzu ye raisin fiéfue'n o wa yôo? Oh bah, oh kunh raisin fié sunianfue mun, ye oh fah raisin fié'n wla swran ufle'm bé sa nun.

¹⁰ ?Nyanmien Nde nga bé klelii ke: «Yebue nga sua kplanfue'm bé yii blô'n, I ye wa katyi yebue kpa b'o tra sua'n i tyondyo'n i asé'n,

¹¹ I so'n fin é Min'n ye ke é wuin'n, o bô é nuan'n.» amuan kennge'en lé?

¹² Ke bé wuun i wle ke bé ti yi Jésus buu nyanndra so'n, bé waan béh treh, sannge swran'm bé wun sre ti bé yatyii le, bé dyaô i wun le, bé oli.

César i l'impôt'n

¹³ Bé sunmaan Pharisifue (*f4*) nin Hérodefue wié mun Jésus wun lo ke bé kô tié i nuan bô nan bé dyran su fa tree.

¹⁴ Bé wa séé i ke: Ndya, é si ke a di nanwle, a srô'a swran fi, afin a nia'an swran nyrun, ye a klé swran mun Nyanmien atin'n nanwle nun. ?É su l'impôt man César? ?É su, annze nanh man é su?

¹⁵ Ke Jésus wuun ke bé su tô i gble'n, o sé bé ke: ?Nzu ti ye an kan min niaan? Anh fa denier (*f10*) kun ble min man n nian.

¹⁶ Bé blee i kun, ye o usa bé ke: ?Wan ye ng'o ô su ye'n? ?Ye wan sanuan yele ng'o kle su le'n? Bé sé i ke: César lieo.

¹⁷ Ye o sé bé ke: Se o ti so'n, anh fa ng'o ti César lie'n, men, ye ng'o ti Nyanmien lie'n, anh fa men. Nde ng'o kannin'n bôô bé nuan.

Swran'm bé tyenle'n i su sa usale

¹⁸ Sadducéfue'm (*f5*) bo bé waan, se swran wuo o tyenman'n, bé baa Jésus wun le, bé use i ke:

¹⁹ Ndya, nian nde bo Moïse kle maan yéo, i waan: «Se swran wié i niaan b'o nin i yi'n ba wu'a ba'n o wu'n, man i niaan'n dya bla'n ékun nan o nin i bé wu ba, nan i niaan'n i ôsu'n wa nunnunman.»

²⁰ Laa yasua nsô bé ô le, bé ti niaan. Bé nyrun kpen'n dyaa bla, wa nya'an ba b'o ke o ôsuo, o wuli.

²¹ Ng'o menten'n o dyeli i angbôti'n, o nin i a wu'a ba, o wuli. Bé nsan su'n nin bé nga mun bé dyali bla kunngba'n, bé wuli.

²² Bé nsô'n bé nun wié fi bé nin i ba wu'a ba. Ke bé kwlaa bé wuli'n, i sin bla'n kusu wa wuli.

²³ ?Ke swran'm béh tyenh'n, bla so'n oh yôh bé nun ônin lie, afin bé nsô'n bé dyelii?

²⁴ Jésus sé bé ke: Amuan fon. ?An si sa ti'n? Afin an wu'an Nyanmien Nde nga bé kleli'n i wle, ye kusu an si'a ke Nyanmien ti kpli.

²⁵ Afin ke swran'm bé kô tyen'n, yasua su dya'a bla kun, ye bla kusu su dya'a bian kun, sannge béh yôh ke ange'm bo bé ô nyanmien su lo'n sa.

²⁶ ?Bé nga bé wuli bé tyenle'n i wun nde lie'n, amuan kannga'an Moïse i fluwa'n b'o kle waka kpuye'n i wun nde'n nun'n i nun lé? O klee ke: «N ti Abraham, nin Isaac, nin Jacob bé Nyanmien.»

²⁷ Nyanmien ti'a bé nga bé wuli'n bé Nyanmien, sannge o ti bé nga bé ô nguan nun'n Nyanmien. Amuan fon dan kpa.

Mmla'n i nun dan'n

²⁸ Mmla kléfue'm bé nun kun tii bé nde nga bé kan'n. Ke o wuun ke Jésus tee bé su kpa'n, o wunngéé Jésus wun le, o usee i ke: ?Mmla'n i nun dan'n yele ônin?

²⁹ Jésus sé i ke: Nien i nun dan'n ye, «Israël mun, anh tié, é Min Nyanmien'n i kunngba tye ye o ti é Min nion.

³⁰ Klô o Min Nyanmien'n kpa, fo o wla'n kwlaa gue i su, man wo akunndan'n kwlaa tren i su, fo o wunmien'n kwlaa yô liké ng'o klé ke a klôé'n.»

³¹ Ye nian ng'o menten'n ye: «Klô o wiéngu ke a fa klô o bobo wun'n sa.» Mmla wié fi nu'an le bo i dan tra béo.

³² Mmla kléfue'n sé i ke: Ndya, o ti kpa, ke a sé ke Nyanmien ti kunngba ye ufle nu'en i sin'n, o ti nanwle.

³³ Ye ke bé klôé kpa, bo bé fa bé wla'n kwlaa gue i su, bo bé akunndan'n kwlaa tren i su, bo bé fa bé wunmien'n kwlaa yô liké ng'o klé ke bé klôé'n, bo bé klô be wiéngu ke bé bobo sa'n, i so'n ti kpa tra te nnen kwlaa nga bé yre'n, nin liké kwlaa nga bé fa man Nyanmien'n.

³⁴ Ke Jésus wuun ke o te su kpa'n, o sé i ke: O ka kan ah yôh men nga Nyanmien sié'n i nunfue. O man swran fi a tre'e i awlen a use'e sa kun.

?Christ ti David i Anunman?

³⁵ Ke Jésus kléh liké Nyanmien sua dan'n nun'n, o usaa ke: ?O yô se ye mmla kléfue'm bé kwla sé ke Christ ti David anunman nion?

³⁶ Nyanmien Wawe'n man David bobo séé ke: «É Min Nyanmien'n séli min Min lie'n ke: Tran asé n fama su Lélé m man ah tioh o kpofue'm bé su.»

³⁷ David bobo flee i Min. ?Se o ti so'n, o yô se ye o ti i anunmaan? Swran kpanngban so'n bo bé tié i nde'n, o yô bé fe.

Jésus séé bé ke bé sasa bé wun mmla

³⁸ Ke oh kléh bé liké'n, o sé bé ke: Anh sasa amun wun mmla kléfue'm bo bé klô trale tennden wla wlan sinle, bo bé klô ke bé yô bé liké nzra nun'n, bé lika.

³⁹ Ke béh dih liké nzra nun'n, bé klô swran dandan'm bé tranwle'n nun tranle, bé klô Nyanmien sua nun bia kpakpa su tranle.

⁴⁰ Bé dé angbôti mmla'm bé awlô'n, ye bé kan nde tennden klé Nyanmien lélélé ke swran'm bé bu bé swran kpa. Bé fo tule lie'n o wa yô te kpa.

Angbôti bla kun i Nyanmien sika yile

⁴¹ Ke Jésus ti Nyanmien sua dan'n nun sika guawle'n i nyrun ndenman su le'n, o nien i wafa nga swran'm bé yi sika bé gua nun'n. Anyanbéunfue sunman bé gua nun kpanngban.

⁴² Angbôti bla yalefue kun kusu fa dyete mma kanngan nnyon b'o dyu ke bablu kun sa'n o fa guaa nun.

⁴³ Ye Jésus flee i sonnzonfue mun, o sé bé ke: Nanwle, angbôti bla yalefue nga i sika lie'n b'o yili'n o tra bé nga'm bé lie nga bé yi guaa sika guawle'n nun'n,

⁴⁴ afin bé kwlaa nga'm bé lie nga bé yi'n, o bu'a bé kple, sannge bla nga lie'n, o yi i yale lie kan'n, i kwlaa ng'o le b'o fa di liké'n, ye o fa mannion.