Marc 11 - Nyanmien nde Ufle

Jésus i Jérusalem klo'n nun wlule

¹ Ke bé wa dyu Jérusalem bo bé dyuu Bethphagé nin Béthanie Olive Ôka'n i wun le'n, Jésus sunmeen i sonnzonfue'm bé nun nnyon,

² o sé bé ke: Anh wo klo'n bo ô amun nyrun le'n su. Ke an dyu lo tye'n, amunh wunh aflunmun gbanflen kun bo swran fi nian fu'a su lé, o minnda le. Anh nyanndyii fa bla.

³ Se swran wié usa amun ke, nzu ti ye an nyanndyii'n, anh sé i ke: É Min'n i sa a mien i wun, i waan é fa ble, oh fah ble amun ékun ityra'n.

⁴ Ke bé oli'n, bé wuun aflunmun gbanflen so'n, o minnda amuan kun nun atin nuan le, nan ba nyanndyii.

⁵ Bé nga bé ô le'n, bé wié'm bé usaa bé ke: ?An su yô nzu? ?Nzu ti ye an nyanndyi aflunmun nion?

⁶ Bé kaan nde nga Jésus kan kléé bé'n, ye bé yatyii bé nuon.

⁷ Bé fa aflunmun'n kô maan Jésus, bé fa bé tannin mun sese i su, ye Jésus traan suo.

⁸ Swran kpanngban bé sesee bé tannin mun atin'n nun, wié'm bé kusu bé bubu fié'n su nnya mun, bé guegue atin'n nun.

⁹ Bé nga bé dun mmua i nyrun'n nin bé nga bé su i su'n bé kpan sé ke: «Hosanna! Swran ng'o ba é Min Nyanmien i dunman nun'n, o mon o nyan nguan!»

¹⁰ Nyanmien man famien ng'o ba é nannan David ôsu'n nun'n i famien'n yô yé! Man Hosanna'n te nyanmien su lo!

¹¹ Jésus dyuu Jérusalem lo nan wa wlu Nyanmien sua dan'n nun. Ke o nianniaan lo ninngé'n kwlaa'n, b'o wuun ke alie a san'n, o nin i sonnzonfue blu-nin-nnyon'n bé oo Béthanie.

Blofue aloma'n bo Jésus bôli i sannzan'n

¹² Ke alie'n tyennin bo bé fin Béthanie le béh koh'n, awé kuun Jésus.

¹³ O wuun blofue aloma bô kun mmua lo, nnya ô su. O oli ke o kô nian se oh nyanh mma wié su ô, sannge ke o wunngéé lo'n, wa wu'an liké fi sen i nnya'n, afin o nian dyu'e i sule.

¹⁴ Ye o séé aloma'n ke: Nanh swran fi di o su mma kun mlonmlon! I sonnzonfue'm bé tili.

Aata difue'm bé Nyanmien sua dan'n nun fuanle

¹⁵ Ke bé dyuu Jérusalem lo'n, Jésus wluu Nyanmien sua dan'n nun ékun. Kpekuun o too aata difue nin bé nga bé tô liké Nyanmien sua dan'n nun'n bé bô kanle suo. O su dyete mma katyifue'm bé table'n nin ôkunmômô ate yôfue'm bé bia'm bé bô guali.

¹⁶ Wa ma'an swran fi atin ke o sua liké sin Nyanmien sua dan'n i awlô afien.

¹⁷ Ke oh kléh bé liké'n, o sé bé ke: ?Ba kle'e ke: «Bé wa fle n sua'n lika bo nvlé'n kwlaa bé nin Nyanmien bé kôkô yale?» Sannge amuan fa katyi awiéfue'm bé fiawle.

¹⁸ Ke Nyanmien nyrun dyranfue dandan nin mmla kléfue'm bé tili'n, bé kunndee i kunwle. Bé srôé yele ke i liké b'o klé'n bô swran'n kwlaa bé nuan.

¹⁹ Ke wia'n toli'n, Jésus nin i sonnzonfue'm bé fin klo'n nin fitéli.

Blofue aloma'n b'o wuli'n i su nde

²⁰ Nglemun ke béh sinh'n, i sonnzonfue'm bé wuun aloma so'n wa wu kéé lélé a dyu i ôlui'n nun lo.

²¹ Pierre wla kpeen sa nga Jésus yôô aloma'n su, o séé Jésus ke: Baba, nian, aloma'n bo a bôô i sannzan'n wa wu.

²² Ye Jésus séé bé ke: Anh lafi Nyanmien su.

²³ Nanwle, swran ng'o lafi Nyanmien su'n o kwla sé ôka nga ke o tu i bô wa kô to dyénvié'n nun. Se i awlen'n ti'a nnyonnyon b'o lafi nde ng'o kannin'n su ke oh yôh'n, Nyanmien wa yô i so'n men.

²⁴ I so'n ti, nh kanh klé amun ke, liké kwlaa nga an sre'n, anh lafi su ke amuan nyen, o wa fa man amun.

²⁵ Ke an dyaô bo amunh kôkôh yale klé Nyanmien'n, se swran wié wun nde ô amun klun'n, anh yatyi tyee, nan amun Si b'o ô nyanmien su lo'n wa yatyi sa nga an yôlii'n wa tye amun.

²⁶ [Sannge se an yatyi tyemen'n, amun Si b'o ô nyanmien su lo'n su yatyi'a amun lie'n kusu tye'a amun.]

Jésus i atin b'o le'n

²⁷ Bé baa Jérusalem le ékun. Ke Jésus wlanwlanh Nyanmien sua dan'n nun'n, Nyanmien nyrun dyranfue dandan, nin mmla kléfue, nin kpenngben'm bé bee i wun le,

²⁸ bé usee i ke: ?Wan dunman nun ye a yô sa nga muon? ?Ye wan ye o tuu o ke a yôo?

²⁹ Jésus sé bé ke: N kusu m ma usa amun sa kun, se an te n su'n, nh kléh amun swran ng'o maan min atin bo n yô sa so'n.

³⁰ ?Jean i baptême b'o yôli'n, Nyanmien ye o meen i atin annze swran ye o meen i atin ye o yôo? Anh bua n wié.

³¹ Sannge bé sé bé wiéngu ke: Se é sé ke Nyanmien ye o meen i atin'n, oh usah é ke: ?Se o ti so'n, nzu ti ye amuan lafi'e i suo?

³² Se é sé ke swran ye o meen i atin'n… Sre kun bé swran'm bé wun, afin bé kwlaa bé bu Jean Nyanmien nuan idyofue sakpa.

³³ I so'n ti, bé sé Jésus ke: É simen. Ye Jésus sé bé ke: N kusu, n su klé'a amun swran ng'o maan min atin bo n yô sa so'n.