Marc 10 - Nyanmien nde Ufle

Bé wun yrale

¹ Ke Jésus tuu i bô le'n o oo Judée men'n nun o nin Jourdain'n i sin lo. Swran kpanngban kpa bé yiee i wun le ékun, o klé bé liké atin o yôé so titi.

² Pharisifue (*f4*) wié'm bé bee i wun le, i kan nianle ti bé use i se yasua le atin ke o yre i yi ô.

³ I kusu usa bé ke: ?Moïse séé amun se?

⁴ Bé waan: Moïse maan atin ke «bé kle yrale fluwa man bla'n nan ba yre.»

⁵ Ye Jésus sé ke: Amun kétéle bo amuan kété'n ti ye Moïse kle mmla so'n maan amuon.

⁶ Sannge men'n i bôbôle nun «Nyanmien yii yasua nin bla.

⁷ I so'n ti ye man yasua kpatyi i si nin i nin, [o fe i wun menten i yi,]

⁸ ye bé nnyon'n bé katyi swran wunmuan nion.» Ke o kô yô so'n, bé ti'a swran nnyon kun, sannge bé ti swran wunmuan.

⁹ O man liké nga Nyanmien kan bé bô nun'n, nanh man swran fi ti bé nun.

¹⁰ Ke bé wluu awlô lo'n, i sonnzonfue'm bé usee nde so'n nun ékun.

¹¹ O sé bé ke: Swran kwlaa ng'o yre i yi, nan o dya ufle'n, wuun wa kunnde bla i yi bô.

¹² Ye bla ng'o yre i wun, nan o dya ufle'n, wuun wa kunnde bian i wun bô.

Ba kanngan mun

¹³ Swran'm bé faa ba kanngan mun blelii ke o fe i sa fua bé su, sannge i sonnzonfue'm bé idyoo bé.

¹⁴ Ke Jésus wuun i so'n, wa yômen i fe, nan wa sé bé ke: Anh yatyi ba kanngan'm bé nun man bé bla n sin, nanh an fuan bé, afin bé bo bé yô bé wun ke ba kanngan nga mun sa'n, bé ye Nyanmien sié béo.

¹⁵ Nanwle, swran ng'o yô'e i wun ke bakan sa, o fe'e i wun ma'an Nyanmien ke o siéé'n, o su yô'a men nga Nyanmien sié'n i nunfue mlonmlon.

¹⁶ O tô i sa blaa bé, o fe i sa fuafua bé su, o yra bé nguan.

Gbanflen anyanbéunfue'n

¹⁷ Ke Jésus faa atin'n su b'oh koh'n, swran kun wanndi wa kôtôô i bô, o use i ke: ?Ndya, o bo a ti liké kléfue kpa'n, nzu ye n yô nan man nyan anannganman nguan nion?

¹⁸ Jésus sé i ke: ?Nzu ti ye a fle min ke n ti kpa nion? Swran fi ti'a kpa san Nyanmien kunngba tye.

¹⁹ A si mmla'n: «Nanh kun swran, nanh kunnde bla annze bian o yi annze o wun bô, nanh wua, nanh ton swran suen, nanh di ndrunmun, bu o si nin o nin bé swran.»

²⁰ Ye o sé i ke: Ndya, ke o fin m ba kaan nun'n n fe i kwlaa su.

²¹ Jésus niennin o klô i sa, nan wa sé i ke: O te ka o liké kun yôle, ko, kô yô o ninngé'm bé ate, fe i sika'n man yalefue mun, ye ah nyanh ninngé kpakpa nyanmien su lo. Nan bla'a su n su.

²² Nde so'n ti o mleen i nyrun, o yô i ya, o dyaô oli, yele ke o ti anyanbéunfue dan.

²³ Ke Jésus nieen i sonnzonfue'm bo bé sin yie le'n, o sé bé ke: Ke anyanbéunfue kun fe i wun man Nyanmien ke o siéé'n, o ti kéklé!

²⁴ I nde so'n bôô i sonnzonfue'm bé nuan dan kpa. Ye o sé bé ékun ke: M mma mun ke swran kun [b'o fe i wla gue i anyanbéun'n su'n] o fe i wun man Nyanmien ke o siéé'n, o ti kéklé!

²⁵ Chameau i dolua bue nun sinle'n ti popo tra ke anyanbéunfue kun fe i wun man Nyanmien ke o siéé'n.

²⁶ O bô i sonnzonfue'm bé nuan dan kpa ékun, nan ba usa bé wun ke: ?Se o ti so'n, wuun wan ye oh kwlah fité nuon?

²⁷ Jésus niaan bé nan wa sé bé ke: Sa so'n swran kwle'e i yô, sannge Nyanmien kwla yô, afin Nyanmien kwla sa'n kwlaa yô.

²⁸ Ye Pierre séé i ke: Nian, é lie'n, ya yatyi é ninngé'n kwlaa ya su o su.

²⁹ Jésus sé ke: Nanwle, swran kwlaa nga min nin dyasin fe'n ti, o yatyi i awlô, nin i niaan mun, nin i nin, nin i si, nin i mma mun, nin i asie'n,

³⁰ oh nyenh i wunsu so kpe ya, sua ô, niaan ô, nien ô, ba ô, asie ô, ye yale kléle ke é ô ye'n, ye oh nyanh anannganman nguan ble ng'o ba lo'n.

³¹ Bé nga bé dun mmua'n, bé nun sunman bé wa ka sien, ye bé nga bé ka sien'n, bé wa dun mmua.

Jésus i kunle'n i su bôle kpe nsan su

³² Ke bé faa atin'n su bo béh koh Jérusalem'n, Jésus ye o dun bé mmuaa. I sonnzonfue'm bé akunndan ti sannganwa, ye sre kuun bé nga bé su bé su'n. Ye Jésus fee i sonnzonfue blu-nin-nnyon'n bé oo bé ngunmin ékun, o kan sa ng'o wa to i su'n kléé bé.

³³ O sé ke: Anh nian, é su ko Jérusalem, bé wa fa m bo n katyii Swran'n man Nyanmien nyrun dyranfue dandan nin mmla kléfue mun. Béh séh ke man di fo, nan bé kun min, béh fah min man bé nga bé ti'a Juif'n,

³⁴ béh yôh n finfin, béh guah min wun ngosre, béh bôh min nin ngblé, béh kunh min, ke n di lé nsan'n, nh tyenh.

Liké bo Jacques nin Jean bé sreli'n

³⁵ Zébédée wa yasua nnyon'n, Jacques nin Jean, bé wunngéé Jésus wun le, bé séé i ke: Baba, liké nga é wa sre o ye'n, yô man é.

³⁶ O usa bé ke: ?Nzu ye amun waan n yô man amuon?

³⁷ Bé sé i ke: Ke ah dih o famien'n, yô man é nun kun tran o fama su, ye man kun tran o be su.

³⁸ Jésus sé bé ke: An si'a liké nga an sre'n. ?Klôwa nga m ma non nun'n, an kwla non nun wié? ?Ye baptême nga bé wa yô min'n, an kwla yô wié?

³⁹ Bé sé ke: Een, é kwle i yô. Ye o sé bé ke: O ti nanwle ke klôwa nga m ma non nun'n, amunh nonh nun wié, ye baptême nga bé wa yô min'n, béh yôh amun wié,

⁴⁰ sannge n fama su nin m be su tranle lie'n, nanh min ye m maan, o ti bé nga Nyanmien siésié maan bé'n bé lie.

⁴¹ Ke bé blu nga'm bé tii nde so'n, ya kuun bé Jacques nin Jean bé wun.

⁴² Jésus flee bé kwlaa, o sé bé ke: An si ke bé nga bé sié bé ke bé sié nvlé wié mun'n, bé mianmian bé swran mun, ye swran dandan'm bé tin bé swran'm bé su.

⁴³ Amun lie'n su yô'a so, sannge amun nun swran ng'o klô ke oh yôh dan'n, mon o su wiéngu mun,

⁴⁴ ye amun nun swran ng'o klô ke oh yôh amun sukpen'n, mon o yô i wiéngu'n kwlaa bé kanga.

⁴⁵ Afin m bo n katyii Swran'n man baman ke bé su min, sannge swran'm bé sule ti ye m balio, nan nh fah min wun kpo swran sunman bé ti.

Jésus tikéé Bartimée anyansifue'n i nyin

⁴⁶ Ke bé dyuu Jéricho lo bo Jésus nin i sonnzonfue mun o nin swran kpanngban bé fin le béh koh'n, Timée wa yasua Bartimée anyansifue'n b'o sresre liké'n, o ti atin nuan le.

⁴⁷ Ke o tii ke Jésus b'o fin Nazareth'n ye o su sin'n, o kpan séé ke: Jésus, David Anunman, si min aunnvue yô n yé!

⁴⁸ Bé nun sunman kpa bé idyolii ke o muen i nuan, sannge o kpan kéklé kpa tra laa lie'n ke: David Anunman, si min aunnvue!

⁴⁹ Jésus dyrannin nan wa sé ke: Anh flee mon o bla. Bé flee anyansifue'n, bé sé i ke: Guo o wla asé, dyaô, o su fle o.

⁵⁰ O tô i trale dan'n guee i lo, o dyaô waka, o baa Jésus wun le.

⁵¹ Jésus use i ke: ?Nzu ye o waan n yô man oo? Anyansifue'n sé i ke: Baba, yô man n wun asé.

⁵² Jésus sé i ke: Ko, Nyanmien su bo a lafi'n ti, w'a yô dyuédyué Kpekuun wa wun asé nan wa su Jésus su.