JÉSUS-CHRIST I DYASIN FE'N BO LUC KLELI'N 7 - Nyanmien nde Ufle

Jésus yôô sôndya ya sukpen'n i gbanflen'n i dyuédyué

¹ Ke Jésus kan nde klé bé bo bé tié i nde'n bo i nuan toli'n, o oo Capernaüm.

² Sôndya ya sukpen kun le i dyunman difue kun, o klô i sa dan kpa, o to tukpatye, o su wu tyinndyin kpa.

³ O ti Jésus dunman'n, o sunmaan Juif kpenngben wié mun i sin ke o bla wa yô i dyunman difue so'n i dyuédyué men.

⁴ Ke bé dyuu Jésus wun lo'n, bé sre kpa, bé sé ke: Yô men, se a yô men'n, o ti su,

⁵ afin o klô é nvlé'n, i ye o kplaan é Nyanmien sua nion.

⁶ Jésus nin bé oli, ke bé wa dyu awlô lo'n, sôndya ya sukpen'n sunmeen i dyanvue mun ke bé wa sé i ke: Nannan, i waan é wa sé o ke, nanh klé o wun afe, o ti'a bo a tu o dya dyu i awlô loo, afin o nin o nyrun fataman.

⁷ I so'n ti ye man i bobo wa baman nion. Sannge a kan nde kple kunngba tye, man i gbanflen'n yô dyuédyué!

⁸ Afin i bo swran'm bé sié i'n, i kusu o sié sôndya mun, se o sé kun ke o wo'n, o ko, ye se o sé kun ke o bla'n, o ba. Se o sé i gbanflen'n ke o yô liké wié'n, o yô.

⁹ Ke Jésus tii nde so'n, o bô i nuan, o kpe i nyin swran nga bé su i su'n bé wun lo sé ke: Nanwle, Israël nvlé'n nun wa bobo man wu'an swran b'o lafi n su dan ke nga saa.

¹⁰ Ke bé bo sôndya ya sukpen'n sunmaan bé'n béh dyuh awlô lo'n, i gbanflen so'n wa yô dyuédyué.

Jésus tyeen Naïn bla kun wa'n

¹¹ Ke i alie tyennin'n, o nin i sonnzonfue mun nin swran kaka kpa bé oo klo kun bo bé flee Naïn'n su.

¹² Ke bé wa dyu klo i anuan'n nun le'n, béh niaanh… bé nin saka kun su ba. O ti bla kun bo i wun wuli'n, i wa yasua kunngba tye, bé nin klo'n su swran louun kpa ye bé baa.

¹³ Ke é Min'n wuun bla so'n, o yô i annvo, ye o séé i ke: Mmô, yakô, muon nuan!

¹⁴ O wunngé lo o kaan kpata'n, ye bé nga bé sue'n, bé dyrannion. Ye o sé ke: Gbanflen, dyasô!

¹⁵ O dyaô traan asé, kpekuun o su idyo. Ye Jésus fe men i nion.

¹⁶ Sre kuun bé kwlaa, bé manman Nyanmien bé sé ke: Nyanmien nuan idyofue dan kpa kun a fité é afien wa, ye Nyanmien a nien i swran'm bé lika.

¹⁷ I nde so'n truu Judée men wunmuan'n nun, o nin klo nga bé mantan le'n bé su.

Jean baptême yôfue'n i Jésus sa usale

¹⁸ Jean sonnzonfue'm bé kan sa so'n kwlaa klélii.

¹⁹ Jean flee i sonnzonfue'm bé nun nnyon, o sunman bé é Min'n i wun lo ke bé kô use i ke, ?swran nga bé ken i nde ke oh bah'n yele i, annze swran so'n te ô sien?

²⁰ Ke swran so'm bé dyuu Jésus wun lo'n, bé sé i ke: Jean baptême yôfue'n sunmaan é o wun wa ke é wa uso o ke: ?Swran nga bé ken i nde ke oh bah'n yele wo, annze swran so'n te ô sien?

²¹ Ke oh yôh so'n, wuun Jésus a yô tukpatyefue nin bé bo bé wun yô bé ya'n kpanngban bé dyuédyué, wa fuan asie usu b'o satyi swran'n o man ba yô dyuédyué, wa tiké anyansifue kaka bé nyin.

²² Ye o sé ké be: Anh kô kan liké nga an wunniin'n nin nde nga an tili'n klé Jean, anyansifue'm bé wun asé, tyetyewafue'm bé nanti, kôkôwéfue'm bé wun sa, sutréfue'm bé ti sa, bé nga bé wuli'n bé tyen, ye «bé bô dyasin fe'n klé yalefue mun.»

²³ Swran nga i ti nun a satyiman min ti'n, i lie su ti yé!

²⁴ Ke swran bo Jean sunmaan bé'n bé oli'n, kpekuun Jésus su usa swran mun Jean wun nde ke: ?Nzu ye an woo i nianle blô lo nion? ?An kô nian ndema bo aunngban kédyéé'n?

²⁵ ?Se nanh ndema'n, wuun nzu ye an woo i nianleo? ?Swran b'o wla trale kpakpaa? Nian, swran nga bé wla trale kpakpa bo bé le ninngé nglanman'n, bé fin famien'm bé awlô.

²⁶ ?Se o ti'a so'n, wuun nzu ye an woo i nianleo? ?An woo Nyanmien nuan idyofue nianle? Nanwle o ti so, sannge o tra Nyanmien nuan idyofue.

²⁷ I ye bé kleli i wun nde ke: «Nian, nh sunmanh min ndôlô bôfue'n, Oh dunh mmua kô yô o nyrun atin'n kpa,» nion.

²⁸ Nanwle, bé kwlaa nga bla wuli bé'n, bé nun wié fi nin Jean seman. Sannge bé nga Nyanmien sié bé'n, bé nun kaanfue'n i dan tre.

²⁹ Swran kwlaa nga bé tili i nde'n bé nin guabô sika défue mun bé bu Nyanmien nde'n nanwle, afin bé ye Jean yôô bé baptême nion.

³⁰ Sannge Pharisifue'm (*f4*) bé nin mmla sifue mun bo ba kpli'an su ke o yô bé baptême'n, bé man liké kpa bo Nyanmien waan oh fah man bé'n, o tô fuaan bé.

³¹ ?Nzu ye nh fah adyulisufue nga mun sunnzun io? ?Bé fa nzu?

³² Bé fa ba kanngan mun, bo bé gua gua'n su, bé sé bé wiéngu ke: É bôô kété klé amun, amuan si'a ablé, É bôô amun se, amuan bô'a auyé.

³³ Afin ke Jean baptême yôfue'n bali'n, o di'a silie nun alie, o no'an du vin, amun waan, liké wié su i su.

³⁴ M bo n katyii Swran'n n kusu m bali, n di liké, n non nzan, amun waan n ti alie safue, nin du vin nonfue, ye n ti guabô sika défue nin sa tete yôfue'm bé dyanvue.

³⁵ Nyanmien i mma'm bé kwlaa bé klé ke o ti ngwlelefue.

Sa nga Jésus yôé Simon awlô lo'n

³⁶ Pharisifue'm (*f4*) bé nun kun flee Jésus ke o wa di liké i awlô lo. Jésus wlu i awlô lo, o tran asé alie'n sin.

³⁷ Bla sa tete yôfue kun b'o ô klo so'n su'n, o tii ke Jésus ô Pharisifue kun awlô lo, o su di liké.

³⁸ Bla so'n fa blofue nzué albâtre (*f18*) se kun bali, o dyran Jésus dya wun le, o sun, i nyinmuen'n gue i dya'n su, o fe i ti ndre'n nunnun, o kôtô tre i dya'n, ye o fa blofue nzué so'n gue i dya wun.

³⁹ Ke Pharisifue b'o yiaa Jésus'n wunnin sa so'n, o sé i klun lo ke: Se bian nga ti Nyanmien nuan idyofue sakpa'n, oh sih bla ng'o ken i ye'n, ye oh wunh i swran wafa ng'o ti'n, oh sih ke sa tete yôfueo.

⁴⁰ Jésus so su o sé i ke: Simon, n waan nh kanh nde kun klé o. O sé i ke: Kan.

⁴¹ Ye o sé i ke: Bian kun kale ô swran nnyon bé su, denier (*f10*) ya nnun ô kun su, ye ablénun ô kun su.

⁴² Ke bé le'a liké fi nan ba fa tutu kale so'n, o yatyi tyee bé. ?Swran nnyon so'n ônin ye o wa klô bian so'n i sa tra suo?

⁴³ Ye Simon sé ke: M bu i ke nga i kale lie'n ti dan nion. Ye Jésus waan: A di nanwle.

⁴⁴ I sin o kpee i nyin bla'n wun lo, o sé Simon ke: ?A wun bla nga? Ke n wluu wo awlô wa'n, a ma'an min nzué ke n fa wunnzin n dya, sannge bla nga o fe i nyinmuen'n gua n dya'n su, ye o fe i ti ndre'n nunnunnin.

⁴⁵ A so'a min nun kpa, sannge bla nga ke n wluu wa'n, o yatyi'a ndya trale.

⁴⁶ A gua'a n ti'n su ngô (*f23*), sannge bla nga o gua n dya'm bé su blofue nzué.

⁴⁷ I so'n ti, nh kanh klé o ke, i klôle dan b'o fa klô min'n klé ke Nyanmien a yatyi i sa tete kpanngban b'o yôli'n wa tyee. Sannge swran nga i sa te b'o yôli bo Nyanmien yatyi tyelii'n, o ti'a dan'n, i klôle b'o fa klô min'n ti kaan.

⁴⁸ Ye o sé bla'n ke: Nyanmien a yatyi o wun sa a tye o.

⁴⁹ Bé nga bé nin i di liké'n, bé usa bé bobo bé wun ke: ?Bian nga ti lie se, b'o yatyi swran i wun sa tye io?

⁵⁰ Ye o séé bla'n ke: N su bo a lafi'n ti, a nyon o ti, guo o wla asé, ko.