JÉSUS-CHRIST I DYASIN FE'N BO LUC KLELI'N 3 - Nyanmien nde Ufle

Jean baptême yôfue'n i Nyanmien nde kanle

¹ Ke bé siéé Tibère César famien'n i afue blu-nin-nnun su, bo Ponce Pilate ti Judée nvlé i sukpen'n, Hérode sié Galilée nvlé'n, i niaan bian Philippe sié Iturée nin Trachonite nvlé'n, Lysanias sié Abilène nvlé'n,

² bo Anne nin Caïphe bé kusu bé ti Nyanmien nyrun dyranfue dan'n, bé ble su ye Nyanmien kan nde kléé Zacharie wa Jean blô lo nion.

³ Nan wa o nzué'n bo bé flee Jourdain'n i nuan lo klo'n kwlaa su. O kô kan klé lofue mun ke bé katyi bé nzuen'n, man bé yô bé baptême, nan Nyanmien yatyi bé wun sa'n tye bé.

⁴ Ke o yôô so'n, o man nde nga Nyanmien nuan idyofue Ésaïe klee i fluwa'n nun'n, o kpeen su. O sé ke: «I ye o kpan blô lo nion, o sé ke: Anh siésié é Min'n i akpo'n, Anh yô i atin'm bé séiin, anh tréké su.

⁵ Béh tannintanninh kôngô'n kwlaa, Béh tutuh ôka nin kpole'm bé ngba. Ye béh tinngetinngeh atin b'o ti klekle'n, Atin nga ba satyi'n, béh yôh bé kpa.

⁶ Ye swran'n kwlaa béh wunh déle nga Nyanmien fa dé bé'n.»

⁷ I so'n ti, o sé swran kpanngban bo bé bee i wun le ke o yô bé baptême'n, bé ke: ?Onda mma mun, wan ye o séé amun ke Nyanmien i ya'n o wa dyaô nan an wanndi i nyruon?

⁸ Anh yô sa kpa b'o klé ke amuan katyi amun nzuen'n, ke waka kpa su mma kpa'n sa. Nanh an bu amun awlen'n nun sé ke: É nannan yele Abraham! Afin nh kanh klé amun ke, Nyanmien kwla fa yebue nga mun katyi Abraham mma mun.

⁹ Kpelie'n wa kan waka ôlui'n, o man waka kwlaa nga i mma'n ti'a kpa'n, béh kpeh gue sin'n nun.

¹⁰ I so'n ti, swran'm bé usee i ke: ?Wuun nzu ye é yôo?

¹¹ O sé bé ke: Man swran ng'o le trale nnyon'n, o man swran ng'o le'a wié'n, i kun, ye swran ng'o le liké diwa'n, o yô i so kusu.

¹² Guabô sika défue'm bé bee i wun le ke o yô bé baptême, bé use i ke: ?Ndya, nzu ye é kusu é yôo?

¹³ O sé bé ke: Nanh an dé liké fi tra nga bé kléé amun'n su.

¹⁴ Sôndya'm bé kusu bé use i ke: ?É lie'n, nzu ye é yôo? O sé bé ke: Nanh an dé swran fi liké wué kéklé su, ye nanh an ton swran suen, sannge man amun klun dyo amun kale nga bé fa tua amun'n su.

¹⁵ Ke swran'n kwlaa bé nyin ta Christ (*f1*) sin'n, bé wun blibli bé, bé bu i akunndan sé ke: ?Nanh Jean ye o ti Christ nion? Ye Jean sé bé kwlaa bé ke:

¹⁶ N lie'n, n yô amun baptême nzué'n nun, sannge swran ng'o le nyrun tra min'n, o su ba, min nin i ngbabua nyanman'n i nyanndyile fataman.

¹⁷ I lie'n, o wa fa Nyanmien Wawe'n nin sin yô amun baptême. I néné'n wô i sa nun, o wa kpedye i awié b'o ô i bôwle'n nun'n lélé oh wiéh, oh isah awié'n gue i tanngannin'n nun, ye oh woh i wla'n nun sin b'o nuanman'n nun.

¹⁸ Jean bô dyasin fe'n kléé swran mun, ye o man bé afotue nde kpanngban kpa ékun.

¹⁹ Sannge Jean idyoo Hérode b'o sié nvlé'n i bué'n, yele ke o déli i niaan bian yi Hérodiade, ye o yôô sa tete kpanngban kpa ékun.

²⁰ I sa te kun ékun b'o yôli'n, yele Jean bisua wlale.

Jésus i baptême yôle

²¹ Ke béh yôh swran'n kwlaa bé baptême'n, bé yôô Jésus kusu wié. Ke o nin Nyanmien béh idyoh'n, nyanmien su lo'n ti muaan,

²² ye Nyanmien Wawe'n katyi ke aublé sa, o dyree i su. Ye bé ti swran kun nen nyanmien su lo, o sé ke: A ti min awlen su Ba, o su ye man fa n wla'n kwlaa a guaa.

Ôsu nga Jésus fin nun'n

²³ Ke Jésus bôh i dyunman'n bô'n, m bu i ke wa di afue ablasan. Bé bu i ke o ti Joseph wa, Joseph ti Héli wa,

²⁴ Héli ti Matthat wa, Matthat ti Lévi wa, Lévi ti Melchi wa, Melchi ti Jannaï wa, Jannaï ti Joseph wa,

²⁵ Joseph ti Matthathias wa, Matthathias ti Amos wa, Amos ti Nahum wa, Nahum ti Esli wa, Esli ti Naggaï wa,

²⁶ Naggaï ti Maath wa, Maath ti Mattathias wa, Mattathias ti Sémeïn wa, Sémeïn ti Josech wa, Josech ti Joda wa,

²⁷ Joda ti Joanan wa, Joanan ti Rhésa wa, Rhésa ti Zorobabel wa, Zorobabel ti Salathiel wa, Salathiel ti Néri wa,

²⁸ Néri ti Melchi wa, Melchi ti Addi wa, Addi ti Kosam wa, Kosam ti Elmadam wa, Elmadam ti Er wa,

²⁹ Er ti Jésus wa, Jésus ti Éliézer wa, Éliézer ti Jorim wa, Jorim ti Matthat wa, Matthat ti Lévi wa,

³⁰ Lévi ti Siméon wa, Siméon ti Juda wa, Juda ti Joseph wa, Joseph ti Jonam wa, Jonam ti Éliakim wa,

³¹ Éliakim ti Méléa wa, Méléa ti Menna wa, Menna ti Mattatha wa, Mattatha ti Nathan wa, Nathan ti David wa,

³² David ti Isaï wa, Isaï ti Jobed wa, Jobed ti Booz wa, Booz ti Sala wa, Sala ti Naasson wa,

³³ Naasson ti Aminadab wa, Aminadab ti Admin wa, Admin ti Arni wa, Arni ti Esrom wa, Esrom ti Pharès wa, Pharès ti Juda wa,

³⁴ Juda ti Jacob wa, Jacob ti Isaac wa, Isaac ti Abraham wa, Abraham ti Thara wa, Thara ti Nachor wa,

³⁵ Nachor ti Seruch wa, Seruch ti Ragau wa, Ragau ti Phalek wa, Phalek ti Éber wa, Éber ti Sala wa,

³⁶ Sala ti Kaïnam wa, Kaïnam ti Arphaxed wa, Arphaxed ti Sem wa, Sem ti Noé wa, Noé ti Lamech wa,

³⁷ Lamech ti Mathusala wa, Mathusala ti Énoch wa, Énoch ti Jared wa, Jared ti Maléléel wa, Maléléel ti Kaïnan wa,

³⁸ Kaïnan ti Énos wa, Énos ti Seth wa, Seth ti Adam wa, Adam kusu ti Nyanmien Kpli wa.