JÉSUS-CHRIST I DYASIN FE'N BO LUC KLELI'N 23 - Nyanmien nde Ufle

Jésus i Pilate dyasu fa kole

¹ Bé kwlaa bé dyaô fa Jésus oo Pilate dyasu.

² Ke bé dyuu lo'n, ye bé too sa nga ti ye bé senmenniin'n i kanle suo, bé sé ke: É wun ke bian nga satyi é nvlé'n, i waan, nanh man bé su l'impôt man César, ye i li waan o ti Christ, o ti famien.

³ Ye Pilate usee i ke: ?A ti Juif'm bé famien? Ye i waan: Een, ye o nuan ô su leo.

⁴ Pilate sé Nyanmien nyrun dyranfue dandan nin swran nga bé yiaa le'n bé ke: N wu'an sa te fi bian nga wun.

⁵ Sannge bé dyraan su kéklé kpa, bé sé ke: Ke oh kléh swran'm bé liké'n, o wlawla bé. O bôô i bô Galilée lo, o sin Judée men wunmuan'n nun, lélé o fa dyu wa.

Jésus i Hérode dyasu fa kole

⁶ Ke Pilate tii i so'n, o usali se o ti Galiléefue ô.

⁷ Ke bé sé i ke o fin Hérode asa su'n, o fe kô maan Hérode. Ke oh yôh so'n, wuun i kusu ô Jérusalem le tyen so'n nun.

⁸ Ke Hérode wuun Jésus'n, i klun dyoo dan kpa, yele ke wa tye kpa o klô ke oh siih, i dunman'n bo bé bô b'o ti'n ti, ye kusu o bu i ke o wa yi atre wié nan oh wuinh.

⁹ O usaa Jésus sa kpanngban kpa, sannge wa te'a wié fi su.

¹⁰ Nyanmien nyrun dyranfue dandan nin mmla kléfue bo bé ô le'n, bé dyaô ken i wun nde tete kpa.

¹¹ Ke Hérode nin i sôndya'm béh yôh i finfin'n, bé srii, bé wle i wun trale klaan kpa, nan ba fe i a kô man Pilate.

¹² Lé kunngba so'n Hérode nin Pilate bo laa bé diman'n, bé yôô dyanvue.

Bé séé ke bé kun Jésus

¹³ Pilate yiaa Nyanmien nyrun dyranfue dandan nin kpenngben nin swran mun, o sé bé ke:

¹⁴ An fa bian nga blee min an sé n ke, o satyi swran mun. Sannge nian, man use amun nyrun wa, man wu'an ke sa nga ti ye an senmenniin'n i wié fi ti i nzuen.

¹⁵ Ye Hérode kusu wa wu'an sa fi i wun, o man o fe blee é ékun. Nanwle, bian so'n wa yô'a sa fi b'o nin kunle fataa.

¹⁶ I so'n ti, m man béh bôéh, nan nh yatyih i nun.

¹⁷ [Bé tyen dile kwlaa nun san oh yatyih bisuafue kun nun man bé.]

¹⁸ Ye bé kwlaa bé kpan sé ke: Kun bian nga, nan yi Barabbas man é.

¹⁹ Barabbas so'n wlawla swran mun klo'n su, o kuun swran, i so'n ti ye bé wlee bisuaa.

²⁰ Pilate kan nde kléé bé ékun, i waan oh yatyih Jésus nun,

²¹ sannge bé kpan sé ke: Bôbôé! Bôbôé!

²² I kpe nsan su lie'n bo Pilate usa bé'n, o usa bé ke: ?Nzu sa bo tye ye o yôlio? Man wu'an sa ng'o yôli b'o nin kunle fataa. I so'n ti, m man béh bôéh nan nh yatyih i nun.

²³ Sannge bé dyraan su kpa, bé kpan sé ke o bôbôé. Bé kpan lélé o wa bé lie'n su.

²⁴ O man Pilate yôô nga bé waan o yô man bé'n.

²⁵ O yatyi bian ng'o wlawla swran mun, o kuun swran bo bé wlee bisua'n i nun maan bé, nan wa fa Jésus a man bé ke bé yôé ke bé klô ke béh yôéh'n.

Jésus i waka'n su bôbôle

²⁶ Ke béh feh ko'n, bé traa Cyrènefue wié bo bé flee Simon'n b'o fin blô o su ba'n, nan ba fa Jésus waka'n ba sue ke o sua su i su.

²⁷ Swran kpanngban kpa bé nin bla wié'm bo bé fin bé wué'n nun, bé sun'n, bé su i su.

²⁸ Jésus kpee i nyin bla so'm bé wun lo, o sé bé ke: Jérusalem bla mun, nanh an sun min, anh sun amun bobo nin amun mmua mun,

²⁹ yele ke tyen wié béh séh ke: Klunkpanfue nin bla ng'o nian bô'a akpué lé'n, bo wa ma'an ba nyonflen lé'n, i lie su ti yé!

³⁰ Ye béh séh ôka'm bé ke, bé bu to bé su! Béh séh kpole'm bé ke, bé fa bé fia!

³¹ ?Se bé yô waka monnen ke nga sa'n, i kéé'n kusu oh yôh i lie se?

³² Sa te yôfue nnyon bo bé waan béh kunh bé'n, ke béh fah Jésus ko'n, bé fa bé kusu oo wié.

³³ Ke bé dyuu lika nga bé flee Ti Kônglôman'n nun le'n, bé bôbôlii nin sa te yôfue nnyon'n bé le, kun ô i fama su, kun ô i be su.

³⁴ Ye Jésus séé ke: N Si, yatyi bé wun sa'n tye bé, afin sa nga bé yôé le'n, bé wu'en i wle. Bé tuu i trale'm bé wun foto, bé fali.

³⁵ Swran'm bé dyin le ye bé nien io. Ngbenngben'm bé kusu bé srii, bé sé ke: O déé swran wié mun, se i ye o ti Christ bo Nyanmien fe siéli'n, mon o dé i bobo wun!

³⁶ Sôndya'm bé kusu bé wunngéé i wun le bé yô i finfin, bé fa du vin nyanwa wié fa tinngee i nyrun, bé sé ke:

³⁷ Se a ti Juif'm bé famien'n, dé o wun.

³⁸ Ye bé kle i ti su le ke: Juif'm bé famien'n ye.

³⁹ Sa te yôfue'm bo bé séndé le'n, kun di i te o sé ke: ?Nanh wo ye o waan a ti Christ nion? Dé o wun, nan dé é wié!

⁴⁰ Sannge kun'n idyolii, o sé ke: ?A srô'a Nyanmien? Sa kunngba nga bé waan béh yôéh'n, béh yôh é wié.

⁴¹ É lie'n ti i nuan su, afin sa nga é yôli'n, i nuan sa ye ya nyen io, sannge bian nga lie'n wa yô'a sa fi.

⁴² Ye o sé ke: Jésus, ble nga a wa di o famien'n, bu min akunndan.

⁴³ Ye Jésus kusu sé i ke: Nian, man n kan nde kun klé o, ndeken min nin wo éh dyuh Nyanmien i lika klaan'n nun lo.

Jésus i wule

⁴⁴ Ke oh yôh so'n, wuun wia'n su wa dyran. Kpekuun aôsin'n wlaa lika'n kwlaa lélé fa dyu nnosua wia nun.

⁴⁵ Wia'n katyi tuun, ye tannin dan'n bo bé fa kpe Nyanmien sua dan'n nun'n o kpatyii i afien sesese.

⁴⁶ Jésus kpaan kéklé kpa o sé ke: «N Si, wa fa min ô.» Ke i nuan too tye'n ye o kaa nuon.

⁴⁷ Ke sôndya ya sukpen'n wuun sa so'n, o manman Nyanmien o sé ke: Bain nga ti nanwlefue sakpa.

⁴⁸ Bé nga bé baa sa so'n bô'n, ke bé wuun sa ng'o yôli bo béh sah bé sin ko'n, bé fin bé wué'n nun.

⁴⁹ Bé kwlaa nga bé si Jésus'n bé nin bla nga bé fin Galilée bé be i sunmanle'n, bé dyran mmua lo bé nian sa nga bé su yô'n.

Jésus i siéle

^50-51 Bian kun ô le, bé flee Joseph. O ti swran kpa, o ti nanwlefue, o minnde tyen nga Nyanmien feh i men'n. O fin Juif'm bé klo kun bo bé fle i Arimathée'n su. O ti dyole difue'm bé nun kun, sannge nde nga bé nga'm bé kannin'n o nin sa nga bé yôli'n, wa dyo'e i klun.

⁵² O oo Pilate wun lo, o kô sre Jésus fuen'n.

⁵³ Ke o yilii'n, o fa tannin kpa kun tyityilii, nan wa siéé ndia bo bé kpee yebue nun bo bé nian sié'a swran nun lé'n, nun.

⁵⁴ Tyen so'n ti Juif'm bé wun buabuale tyen, wuun sabbat b'o ti bé tyen te'n o su wa wlu awlô.

⁵⁵ Ye bla nga bé nin Jésus fin Galilée bali'n, bé su Joseph su, bé kô nian ndia'n, o nin wafa nga bé fa siélii'n.

⁵⁶ Ke bé saa bé sin'n, bé kô yôô ayré fannin nin nyanngô. Ye sabbat'n bé tran asé déé wunmien, afin ke o ti so bé mmla'n nuon.