JÉSUS-CHRIST I DYASIN FE'N BO LUC KLELI'N 22 - Nyanmien nde Ufle

Jésus wun nde tyityile

¹ Ke kpaun bo bé gua'a nun ayré'n (*f19*) i tyen bo bé flee Pâque'n (*f17*) o wa dyu'n,

² Nyanmien nyrun dyranfue dandan nin mmla kléfue mun bé kunnde sa wafa nga bé yô nan ba nyan Jésus aamien ba kuin'n, yele ke sre kun bé swran'm bé wun.

³ Ke oh yôh so'n, wuun Satan (*f6*) wa fa Judas Iscariot b'o ti Jésus sonnzonfue blu-nin-nnyon'n bé nun kun'n mlonmlon.

⁴ O kô wuun Nyanmien nyrun dyranfue dandan nin sôndya ngbenngben'm bé wun, nan wa klé bé liké ng'o yô nan wa fa Jésus a man bé'n.

⁵ O dyoo bé klun, ye bé sé ke béh menh i sika.

⁶ O kpliin su, ye o kunnde tyen ng'o ti kpa b'oh feh man bé b'o su yô'a nzra nun'n.

Jésus nin i sonnzonfue'm bé dii Pâque'n

⁷ Ke kpaun bo bé gua'a nun ayré'n (*f19*) i tyen bo i nun ye bé kun Pâque bua'n o dyuli'n,

⁸ Jésus sunmaan Pierre nin Jean, o sé bé ke: Anh kô ton Pâque alie'n, man é kô di. Bé use i ke: ?Nin ye a klô ke é kô ton io?

⁹ Bé use i ke: ?Nin ye a klô ke é kô ton io?

¹⁰ Ye o sé bé ke: Ke amunh kpenh klo lo tye'n, amun nin yasua kun yiah, nzué dyin i ti su, anh su i su anh wlu awlô ng'o wlu nun'n nun wié.

¹¹ Anh sé awlôfue'n ke, Ndya waan é bla nan a klé é wo aôfue sua'n man o nin i sonnzonfue'm bé wa di Pâque'n nun.

¹² Ye oh kléh amun nglô sua ba dan kun bo ba siésié i nun ninngé'n kwlaa, le ye amunh tonh io.

¹³ Ke bé oli'n, bé wuun ninngé nga Jésus kléé bé'n, nan ba ton Pâque alie'n.

Communion fale'n i ba kpele

¹⁴ Ke liké dile'n dyuli'n, Jésus nin swran blu-nin-nnyon b'o sunmaan bé'n bé wa tran alie'n sin.

¹⁵ Ye o sé bé ke: Sa ng'o yô n fe bo m buu i akunndan'n, yele ke min nin amunh dih Pâque nga nan man wun nyrennen.

¹⁶ Afin nanwle, n su di'a wié kun lélé san tyen nga éh dih i kpafue'n Nyanmien men'n nun lo'n.

¹⁷ O fa klôwa kun, o la Nyanmien asé, nan wa sé ke: Anh dé, an kwlaa anh non liké ng'o ô nun'n.

¹⁸ Afin nanwle, ke o fin nde'n n su nonman raisin (*f12*) nzué kun lélé san tyen nga Nyanmien siéle ble'n wa dyu'n.

¹⁹ I sin o fa kpaun, ke o laa Nyanmien asé'n, o bubu nun fa maan bé, o sé ke: Kpaun ng'o ô ye'n ti min wunnen, [amun ti ye n su fa maan. Anh yôé ke nga n yôé ye'n sa, man amun wla kpen n su.

²⁰ Ke bé wiéé liké'n di'n, o fa klôwa'n maan bé, o sé ke: Liké ng'o ô klôwa nga nun'n, o ti min mmôdya b'o man amun nin Nyanmien amunh dih anuanse ufle, amun ti ye bé su wa gue i aséo.]

²¹ Sannge anh nian, swran ng'oh fah min man swran mun'n, é sa la talié kun.

²² M bo n katyii Swran'n n su ko, ke bé di siéé su'n sa, sannge swran ng'o fa min maan swran mun'n, i yakô!

²³ Kpekuun bé su usausa bé wiéngu nan béh wunh swran ng'o wa yô i so sa lie'n.

Swran ng'o ti dan tra bé kwlaa'n

²⁴ Akplôwa kun kusu too bé afien ke béh wunh bé nun swran nga bé bui swran tra bé kwlaa'n.

²⁵ Ye Jésus sé bé ke: Nvlé'm bé famien'm bé tin bé swran'm bé su, ye bé fle bé ngbenngben mun Yé Yôfue.

²⁶ Amun lie'n su yô'a so, sannge man amun nun swran ng'o ti dan'n, o yô i wun ke amun nun bakan sa, ye man swran ng'o sié swran'n, o yô i wun ke dyunman difue sa.

²⁷ ?Swran ng'o ti alie'n sin'n, o nin swran ng'o isa alie'n, bé nun ônin ye o ti daan? ?Nanh swran ng'o ti alie'n sin'n ye o ti daan? Sannge n lie'n n wô amun afien ke dyunman difue sa.

²⁸ Sa kwlaa ng'o too n su'n, amuan yatyi'a n lé.

²⁹ O man ke n Si siéé n famien'n, n kusu nh siéh amun famien,

³⁰ nan table nga n di su m men'n nun lo'n, an di su wié, ye nh siéh amun bia su man bé fa Israël nvlé blu-nin-nnyon'n bla amun dyasu.

Jésus séé ke Pierre wa sé ke o simen

³¹ Ye é Min'n sé Simon ke: Simon, nian, Satan (*f6*) sree amun wun atin, i waan oh sah amun nian.

³² Sannge n kan o nde kléé Nyanmien ke n su bo a lafi'n, nanh man a kponzo. O kusu se a katyi'n, wlo o niaan'm bé fanngan.

³³ Pierre sé i ke: Nannan, man wié min wun tanndan ke se bé wlo bisua ô, se bé kun o ô, min nin o éh koh.

³⁴ Ye Jésus sé ke: Pierre, nanwle kpa'n, ndeken se a nian sé'a ke a si'a min so kpen nsan'n, ako nyinman'n su bôman.

Pata, nin tro, nin kaka

³⁵ Ye o sé bé ékun ke: ?Ke n sunmaan amun bo n sé amun ke, ke amunh koh'n, nanh an fa pata, nin tro, nin ngbabua'n, amun sa miaan liké wié wun? Ye bé waan: É sa a mia'an liké fi wun.

³⁶ Ye o sé bé ke: Sannge sien'n, swran ng'o le pata'n mon o fa, ye nga kusu b'o le tro'n mon o fa, swran ng'o le'a kaka'n mon o yô i trale'n i ate o fa tô wié.

³⁷ Afin nanwle, min wun nde nga bé klelii ke: «Bé ke wlaa sa te yôfue'm bé nun'n,» san oh kpenh su. Ye min wun nde'n kwlaa o su wa wié su kpen.

³⁸ Ye bé sé ke: Nannan, nian, kaka nnyon ye. Ye o sé bé ke: O dyu.

Jésus kôkô yale kléé Nyanmien Gethsémané lo

³⁹ Ke o fitéli'n, o oo Olive Ôka'n su lo kan o ko lo titi'n, nan i sonnzonfue'm ba su i su.

⁴⁰ Ke bé dyuu lika so'n nun'n, o sé bé ke: Anh sre Nyanmien ke nanh man Lakafue'n laka amun.

⁴¹ Nan wa yatyi bé le wa o i nyrun lo kaan, o kôtôli o sé Nyanmien ke:

⁴² N Si, se o ti o klun su'n, man nyrennen wié nga tô fuan min! Sannge nanh yô nga n klô ke o yô su'n, sannge yô nga a klô ke ah yôéh su'n.

⁴³ [Ye ange kun fin nyanmien su lo o wa wle i fanngaan.

⁴⁴ Ke i awlabôe'n yôh dan'n, o mien i nyin kan nde klé Nyanmien tyinndyin kpa, nvufle kpa'n tui pataa, o katyi ke mmôdya sa, o gua srôsrôsrôsrô.]

⁴⁵ Ke o fin kan o nin Nyanmien bé kôkô yale le'n, b'o wa yô i sonnzonfue'm bé le'n, awlabôe'n ti ba fe, bé su lafi kan. Ye o usa bé ke:

⁴⁶ ?Nzu ti ye an lafio? Anh dyaô sre Nyanmien ke nanh man Lakafue'n laka amun.

Jésus i trale

⁴⁷ Ke i nuan te ô nde'n su'n, béh niaanh… swran mun ye bé ba ye'n. Bian nga bé flee Judas b'o ti i sonnzonfue blu-nin-nnyon'n bé nun kun'n, o dun mmua bé nyrun. O wunngéé Jésus wun le tô i sa yi i komin.

⁴⁸ Ye Jésus sé i ke: ?Ah tôh o sa yi m bo n katyii Swran'n n komin ye ah fah min man swran muon?

⁴⁹ Ke bé nga bé nin Jésus ô le'n, bé wuun sa nga bé su wa yô'n, bé use i ke: ?Nannan, é fin bé kaka?

⁵⁰ Ye bé nun kun fe i kaka'n fin Nyanmien nyrun dyranfue dan'n i swran'n, nan wa kpe i su fama'n.

⁵¹ Ye Jésus sé ke: Anh yatyi bé le! I sin o kan bian so'n i su'n, nan wa menten i ôsu'n nun.

⁵² Ye Jésus sé Nyanmien nyrun dyranfue dandan, nin Nyanmien sua nun sôndya kpenngben, nin men kpenngben bo bé bee i trale'n bé ke: An fa kaka nin waka an ba ke an wa tra kôdiawiéfue sa.

⁵³ Tyen kwlaa min nin amun ye é ô Nyanmien sua dan'n nuon, amuan tra'a min, sien'n amun nin aôsin'n amun ble lie'n ye wa dyuo.

Pierre séé ke o si'a Jésus

⁵⁴ Ke bé traa Jésus'n, bé fe oo Nyanmien nyrun dyranfue dan'n i lika lo. Pierre su i su, sannge o mentenmen.

⁵⁵ Bé tro sin awlô afien le, bé ti i wun le, Pierre ke o ti sin'n wun le, o nien i siin, o sé ke: Bian nga kusu su i su wié.

⁵⁶ Afannien kun wuun Pierre ke o ti sin'n wun le, o nien i siin, o sé ke: Bian nga kusu su i su wié.

⁵⁷ Sannge o fe i nuan kéklé o sé ke: Mmô, n simen mlonmlon.

⁵⁸ Ke o tye kan ékun'n, swran ufle wunniin, o séé i ke: O kusu a ô minnien so'm bé nun wié. Ye Pierre séé i ke: Ndya, n nu'an bé nun wié ô!

⁵⁹ Ke o tye louun kan'n, swran ufle ékun dyraan su kpa o sé ke: Nanwle, bian nga nin i ye bé sion, afin Galiléefueo.

⁶⁰ Ye Pierre sé i ke: O lie'n nde kpa nga a kan'n, n wu'en i wle. Ke i nuan te ô nde'n su'n ye ako nyinman'n bôlio.

⁶¹ Ye é Min'n kpe i nyin niaan Pierre siin, ye Pierre wla kpeen é Min'n i nde'n b'o kan klélii'n suo. O séé i ke: «Ndeken ah séh ke a si'a min so kpe nsan, nan ako nyinman'n wa bô.»

⁶² O fitéé guasu lo nan wa sun dan kpa.

Bé yôô Jésus finfin, bé bôé

⁶³ Bé nga bé nian Jésus su'n, bé yôé finfin, bé bôé,

⁶⁴ bé bôé zaga bé use i ke: ?Won o bô woo?

⁶⁵ Ye bé kpee nzôwa tete kpa ékun.

Jésus i dyole difue dandan'm bé dyasu fa kole

⁶⁶ Ke alie tyennin'n, Juif'm bé kpenngben nin Nyanmien nyrun dyranfue dandan nin mmla kléfue mun bé yiali, bé fa Jésus oo bé dyole difue dandan'm bé dyasu.

⁶⁷ Bé sé i ke: Se wo ye a ti Christ'n, kan klé é. Ye o sé bé ke: Se n kan klé amun'n, an su fa'a su mlonmlon,

⁶⁸ ye se n wusa amun sa'n, an su te'a n su.

⁶⁹ Sannge ke o fin nde'n, «M bo n katyii Swran'n m ma tran Nyanmien Kpli'n i fama su.»

⁷⁰ Ye bé kwlaa bé use i ke: ?Wuun, a ti Nyanmien Wa? Ye o sé bé ke: Nga n ti'n ye amun nuan ô su leo.

⁷¹ Ye bé sé ke: Ya ti i bobo i nuan nun sien'n. ?Lalôfue se ye é kunnde i ékuon?