JÉSUS-CHRIST I DYASIN FE'N BO LUC KLELI'N 20 - Nyanmien nde Ufle

Jésus i atin b'o le'n

¹ Lé kun ke Jésus kléh swran'm bé liké Nyanmien sua dan'n nun, b'oh bôh dyasin fe'n klé bé'n, Nyanmien nyrun dyranfue dandan nin mmla kléfue, nin kpenngben mun bé wa usee i ke:

² ?Wan dunman nun ye a yô sa nga muon? ?Ye wan ye o tuu o ke a yôo? Klé é swran so'n.

^3-4 Ye o sé bé ke: N kusu m ma usa amun sa kun, ?Jean i baptême b'o yôli'n, Nyanmien ye o meen i atin, annze swran ye o meen i atin ye o yôo? Anh klé min swran so'n.

⁵ Bé bu i akunndan bé sé ke: Se é sé ke Nyanmien ye o meen i atin'n, oh usah é ke: ?Ye nzu ti ye amuan lafi'e i suo?

⁶ Se kusu é sé ke, swran ye o meen i atin'n, swran'm béh finh é yebue, afin bé kwlaa bé lafi su kpa ke Jean ti Nyanmien nuan idyofue.

⁷ Ye bé sé i ke bé si'a swran ng'o meen i atin so'n.

⁸ Ye Jésus sé bé ke: N kusu n su klé'a amun swran ng'o maan min atin bo n yô sa so'n.

Raisin fié sunianfue'm bé wun nyanndra

⁹ I sin o buu nyanndra kun klé swran mun, o sé ke: Bain kun dii raisin (*f12*) fié, o kunnde swran o fa fié'n wla bé sa nun, nan wa o nvlé wié nun, o kô tyee lo louun kpa.

¹⁰ Ke o dyuu raisin i tile'n, o sunmen i swran kun fié sunianfue'm bé sin, ke o kô fe i lie blee. Fié sunianfue'm bé bôlii, bé keen i bô, nan wa tôtô i sa a se i sin.

¹¹ O sunmen i swran kun ékun, bé bôlii, bé yô i te kpa, bé ken i bô, nan wa tôtô i sa a se i sin ékun.

¹² Bé nsan su lie'n b'o sunmenniin'n, bé bôô i fe, nan ba fuen.

¹³ Fié ifue'n sé ke: ?N yô i se? M ma sunman n wa yasua'n b'o ti min awlen su ba'n, wiénuon i lie'n béh buih swran.

¹⁴ Sannge ke fié sunianfue'm bé wunniin'n, bé tyityili, bé sé ke: I adya difue'n ye, man é kuin, nan é fe i ninngé mun.

¹⁵ Ye bé tre fa oo fié'n sin lo nan ba kuin. ?An bu i ke fié ifue'n o wa yô swran so'm bé se?

¹⁶ Oh bah, o wa kun fié sunianfue so mun, ye oh fah fié'n man swran ufle mun. Ke bé tii nde so'n, bé sé ke: Nanh mon o yô so!

¹⁷ Sannge Jésus nian bé, o sé ke: ?Nde nga bé klelii ke: «Yebue nga sua kplanfue'm bé yii blô'n, I ye wa yatyi yebue kpa b'o tra sua'n i tyondyo'n i asé'n,» i bô klé se?

¹⁸ Swran kwlaa ng'o to yebue so'n su'n, oh titih nun tritri, ye swran nga yebue so'n to i su'n, oh kpotoeh.

¹⁹ Ke Nyanmien nyrun dyranfue dandan nin mmla kléfue'm bé wuun ke bé ti ye o buu nyanndra so'n, bé waan béh treh le, sannge sre kun bé swran'm bé wun.

César i l'impôt'n

²⁰ O man bé sese, bé sunmaan swran ke bé kô kple nian, bé yô bé wun ke swran nanwlefue sa, nan bé fe man kpenngben'n.

²¹ Swran so'm bé wa séé Jésus ke: Ndya, é si ke nde nga a kan'n nin liké nga a lé'n o ti nanwle, a nia'an swran nyrun a kpa'a swran nun, sannge a klé swran mun Nyanmien atin'n wéiin.

²² ?É su l'impôt man César, annze nanh man é su men?

²³ Sannge Jésus wun bé gble'n, ye o sé bé ke:

²⁴ Anh fa denier (*f10*) kun bla n nian, ye bé fa ble io. O usa bé ke: ?Wan ye ng'o ô su ye'n? ?Ye wan sunuan yele ng'o kle su le'n? Ye bé waan: César lieo.

²⁵ Ye o sé bé ke: Se o ti so'n, anh fa ng'o ti César lie'n men, ye ng'o ti Nyanmien lie'n anh fa men.

²⁶ Ba kwla nya'an nde fi bo bé dyran su tre nzra nun leo, sannge ke nde ng'o kan kléé bé'n bôô bé nuan'n, bé gua bliin.

Swran'm bé tyenle i su sa usale

²⁷ Sadducéfue'm bo bé waan se swran wuo o tyenman'n, bé nun wié baa Jésus wun le, bé sé i ke:

²⁸ Ndya, nian nde bo Moïse kle maan yéo, i waan: «Yasua kun b'o nin i yi ba wu'a ba'n, se o wu'n, man i niaan'n dye i angbôti'n, o nin i bé wu ba, nan i niaan'n i ôsu'n wa nunnunman.»

²⁹ Laa yasua nsô bé ô le bé ti niaan. Bé nyrun kpen'n dyaa bla, o nin i ba wu'a ba, o wuli.

³⁰ Bé nnyon su'n

³¹ nin bé nsan su'n, bé dyali angbôti'n, bé wuli, i sin nga dye o wu, nga dye o wu, lélé fa dyu bé nsô'n su, sannge o nin bé wié fi ba wu'a ba.

³² I sin bla'n kusu wa wuli.

³³ ?Ke swran'm béh tyenh'n, bla so'n oh yôh bé nun ônin lie, afin bé ngba bé dyelii?

³⁴ Ye Jésus sé bé ke: Adyulisufue nga'm bé dya bla nin bian,

³⁵ sannge bé nga bé bu bé ke bé nin tyenle nin men ufle ng'o ba lo'n i nun tranle fata'n, bé su dya'a bla nin bian.

³⁶ Ye bé su wu'a kun, yele ke béh katyih ke ange'm bé sa, tyenle bo Nyanmien tyen bé'n ti, béh yôh i mma mun.

³⁷ Ke Moïse dyin waka kpuye'n i wun le b'o fle é Min Nyanmien'n ke, «Abraham Nyanmien, Isaac Nyanmien, Jacob Nyanmien'n,» i bobo kan kléé é ke swran'm béh tyenh.

³⁸ Afin Nyanmien ti'a bé nga bé wuli'n bé Nyanmien, sannge o ti bé nga bé ô le'n bé lie, yele ke Nyanmien nyrun swran fi wuman.

³⁹ Mmla kléfue'm bé wié sé i ke: Ndya, a di nanwle.

⁴⁰ O man ba kwla tra'a bé awlen ba use'e sa fi kun.

?Christ ti David i Anunman?

⁴¹ Ye Jésus usa bé ke: ?O yô se ye bé sé ke, Christ ti David i Anunmaan?

⁴² David bobo keen Psaume fluwa'n nun ke: «É Min Nyanmien'n séli min Min lie'n ke: Tran asé n fama su,

⁴³ Lélé m man ah tioh o kpofue'm bé su.»

⁴⁴ O man David bobo flee Nannan. ?O yô se ye man o kô yô i anunmaan?

Jésus kaan mmla kléfue'm bé wun nde

⁴⁵ Ke swran'n kwlaa bé su ô i nde'n su'n, o sé i sonnzonfue'm bé ke:

⁴⁶ Anh sasa amun wun mmla kléfue'm bé lika, bé klô trale tennden wla wlan sinle, bé klô ke bé yô bé liké nzra nun, bé klô Nyanmien sua nun bia kpakpa su tranle, ye ke bé di liké nzra nun'n, bé klô swran dandan'm bé tranwle'n nun tranle.

⁴⁷ Bé dé angbôti mmla'm bé awlô'n, ye bé kan nde tennden klé Nyanmien lélélé ke swran'm bé bu bé swran kpa. Bé fo tule lie'n o wa yô te kpa.