JÉSUS-CHRIST I DYASIN FE'N BO LUC KLELI'N 19 - Nyanmien nde Ufle

Jésus nin Zachée

¹ Ke Jésus dyuu Jéricho b'oh kpatyih klo'n nun ko'n,

² bian anyanbéunfue kun bo bé flee Zachée b'o ti guabô sika défue'm bé kpenngben'n,

³ o klô ke o si Jésus, sannge swran'm bé ti o kwla wunmen, yele ke o ti swran tika.

⁴ O wanndi kô fuu waka bo bé flee sycomore'n su nan se o sion oh wuinh, afin le ye oh sionh.

⁵ Ke Jésus dyuu waka so'n bô le'n, o men i nyin su nieen lo, o sé i ke: Zachée, dyra ndende, o lika lo ye nh sikéh ndeo.

⁶ I wun bliblii, o dyrali ndende kpa, nan wa fe i a kô sikéé.

⁷ Ke swran'm bé wunnin i so'n, bé kwlaa bé ken i nde, bé sé ke: Wa kô siké bian sa tete yôfue'n.

⁸ Sannge Zachée dyaô dyraan é Min'n i nyrun le, o sé i ke: Nannan, nian, nh fah min ninngé'n i bué man yalefue mun, ye swran nga n dii i ndrunmun'n, nh yih i wunsu kpe nnan men.

⁹ Ye Jésus sé i ke: Ndeken, awlô nga nunfue'm ba nyan bé ti, yele ke bian nga kusu ti Abraham i anunman,

¹⁰ afin m bo n katyii Swran'n m baa bé bo bé mlinnin'n bé kunndele o nin bé déle.

Mine blu'n bé wun nyanndra

¹¹ Ke béh tiéh i nde so'n, o buu bé nyanndra kun, yele ke bé su wa dyu Jérusalem, ye bé bu i ke o tye kaan Nyanmien wa yi i famien'n nglô.

¹² O sé ke: Wléngbi kun waan oh koh nvlé wié nun mmua kpa nan bé fe sié famien, nan wa ba.

¹³ Ke o wa ko'n, o fle i swran'm bé nun blu, o maan bé min (*f27*) blu, o sé bé ke: Anh fa kô katyikatyi amun sa lélé man n tô su.

¹⁴ Sannge i nvléfue'm bé kpoe, ye bé yi swran wié mun su i su ke bé kô sé ke, bé klô'a ke i ye o sié béo.

¹⁵ Ke bé siéé famien b'o bali'n, o man bé flee i swran b'o maan bé sika'n, nan o wun swran kun i aata ng'o dili'n, o nin ng'o nyeen i su'n.

¹⁶ Kun bali, o sé ke: Baba, mine kun bo a maan min'n, n fa katyikatyi n sa wa dyu blu.

¹⁷ Ye o sé i ke: O ti kpa, a ti swran kpa, liké kaan nga m maan wo bo a yôli i kpa'n ti, mh manh o klo blu nan a sié bé.

¹⁸ Kun ékun bali, o sé ke: Baba, mine kun bo a maan min'n n fa katyikatyi n sa wa dyu nnun.

¹⁹ Ye o sé i ke: O kusu sié klo nnun.

²⁰ Kun ékun kusu bali o sé ke: Baba, nian o mine'n ye, dé, sre kuun min o wun ti n tyityi i wun siéli,

²¹ yele ke a ti swran bo i liké yôle yô ya, a fa liké ng'o ti'o o lie'n, ye lika nga a guaman awié le'n, a kpe awié le.

²² Ye o sé i ke: A ti swran te, o nde'n b'o fin o nuan fité'n o bu o fo, a si ke n ti swran bo i liké yôle yô ya, n fa liké ng'o ti'a n lie'n, ye n kpe awié nga nanh min ye n guali'n.

²³ ?B'o li a si so'n, nzu ti ye a fa'a n sika'n a kô ma'an sika siéfue wiéo? Se a yôli i so'n, wuun ke m bali bo n kô fa'n, nh nyanh su nvasue.

²⁴ Ye o sé bé nga bé ô le'n bé ke: Anh dé mine kun ng'o ô i sa nun'n, anh fa man swran ng'o le blu'n.

²⁵ Ye bé sé i ke: Baba, o le mine blu.

²⁶ Ye o sé bé ke: Swran ng'o le liké'n ye béh menh i wiéo, sannge swran ng'o le'a liké'n, kaan ng'o ô i sa nun'n, béh déh.

²⁷ Sien'n, bé nga bé kpo min bo bé klô'a ke n sié bé'n, anh fa bé bla'a kun bé min nyrun wa.

Jésus i Jérusalem klo'n nun wlule

²⁸ Ke Jésus nuan toli'n, o dun mmua bé nyrun oo Jérusalem.

²⁹ Ke Jésus wa dyu Bethphagé nin Béthanie, ôka bo bé fle i Olive Ôka'n i wun le'n, o sunmeen i sonnzonfue'm bé nun nnyon o sé bé ke:

³⁰ Anh wo klo'n bo ô amun nyrun le'n su. Ke an dyu lo tye'n, amunh wunh aflunmun gbanflen kun, swran fi nian fu'a su lé, o minnda le, anh nyanndyii bla.

³¹ Se swran wié usa amun ke: ?Nzu ti ye an nyanndyii'n? anh sé i ke: É Min'n i sa mien i wun, i waan é fa ble.

³² Bé nga Jésus sunmaan bé'n, bé oli, bé wun liké ng'o kléé bé'n.

³³ Ke béh nyanndyih aflunmun'n, ifue'm bé usa bé ke: ?Nzu ti ye an nyanndyi io?

³⁴ Ye bé sé bé ke: É Min'n i sa mien i wun, i waan é fa ble.

³⁵ Bé fa bleli Jésus, bé fa bé tannin mun sese su, ye bé man Jésus fuu suo.

³⁶ Ke oh koh'n swran'm bé sese bé tannin mun i nyrun atin'n nun.

³⁷ Ke o wa dyu Jérusalem b'o dyuu Olive Ôka i ndrôlie'n nun tye'n, i sonnzonfue kaka kpa bé wun blibli bé, bé kpan manman Nyanmien sa kéklééklé kwlaa ng'o yôli bo bé wunniin'n ti.

³⁸ Bé sé ke: «Famien ng'o ba é Min Nyanmien dunman nun'n, mon o nyan nguan!» Aladyé ô Nyanmien lika lo. Man Nyanmien manmanle'n te nyanmien su lo!

³⁹ Ye Pharisifue (*f4*) wié bo bé ô swran'm bé nun le'n, bé sé Jésus ke: Ndya, sé o sonnzonfue mun man bé muan bé nuan.

⁴⁰ Ye o sé bé ke: Se bé muan bé nuan'n, yebue'm béh kpanh.

⁴¹ Ke bé wa dyu klo lo bo Jésus wuun klo'n, o sunnin,

⁴² o sé ke: Se o ti ke nde an si liké nga bé man amun aladyé'n! Sannge dyule nga wa dyu ye'n, an su wu'en i wle kun.

⁴³ Tyen wié amun kpofue'm béh bôh sin yia amun, béh kpeh kunman fia nun, béh mianh amun,

⁴⁴ béh bubuh klo'n, béh kunh klo'n su swran mun, bé su yatyi'a tale fi le, yele ke, ke Nyanmien wa niaan amun ôsu'n, amuan wu'en i wle.

Aata difue'm bé Nyanmien sua dan'n nun fuanle

⁴⁵ Ke o wluu Nyanmien sua dan'n nun'n, ye o too aata difue'm bé fuanle suo,

⁴⁶ o sé bé ke: Bé klelii ke: «N sua'n oh yôh swran nin Nyanmien bé yale kôkôwle sua,» sannge amuan fa katyi awiéfue'm bé fiawle.

⁴⁷ Tyen kwlaa o klé bé liké Nyanmien sua dan'n nun, sannge Nyanmien nyrun dyranfue dandan nin mmla kléfue nin men kpenngben mun bé kunnde i kunwle.

⁴⁸ Sannge bé si'a ke bé yô nan ba nyen io, afin swran'n kwlaa bé su ô i nuan'n bô.