JÉSUS-CHRIST I DYASIN FE'N BO LUC KLELI'N 17 - Nyanmien nde Ufle

Sa te yôle

¹ Ye Jésus séé i sonnzonfue'm bé ke: Liké ng'o man swran'm bé ti nun satyi'n, san béh yôh, sannge swran ng'o yô i so liké lie'n, i yakô!

² Se bé fa yebue nin dan kun bé minnde i komin bé yii dyénvié'n nun'n o flunman tra ke o satyi ba kanngan nga'm bé nun kun ti nun'n.

³ I so'n ti, anh sasa amun wun. Se o niaan kun yô o sa'n, flee tu i fo, se o kpata wo'n, yatyi.

⁴ Ye se tyen ba kunngba'n nun o yô o sa kpe nsô'n, se i kpe nsô so'n o wa kpata wo'n, yatyi.

Nyanmien sulafile

⁵ Lé kun bé bo é Min'n sunmaan bé'n bé sé i ke: Man é awlen, man é lafi o su kpa.

⁶ Ye é Min'n sé bé ke: Se an lafi n su bo kaan b'o dyu ke moutarde (*f9*) mma sa'n, se an sé waka ng'o ô ye'n ke, o tu i bô wa kô dyran dyénvié'n nun'n, oh koh.

Liké nga dyunman difue'n yôo o ti su'n

⁷ ?Amun nun ônin ye se o le i swran kun se o di fié ô, se o ta nnen ô, ke o fin blô lo dyu le tye'n, o sé i ke, o bla'a tran asé di likéo?

⁸ ?Nanh nga b'o séé'n yele ke, o ton liké men, o katyi i trale'n nan o fa alie'n blee, man o di i lie ka, nan i kusu a di i lie'n?

⁹ ?Oh yôh i swran so'n i mô nga b'o séé i ke o yô b'o yôli'n ti?

¹⁰ Amun kusu, ke an kô yô kwlaa nga bé sé amun ke an yô'n, amunh séh ke: É ti ke dyunman difue bo ya yô'a liké fi sa, nga bé séé é ke é yô'n, ye é yôo.

Jésus yôô kôkôwéfue blu bé dyuédyué

¹¹ Ke Jésus koh Jérusalem'n, o siin Samarie nin Galilée bé afien.

¹² Ke o dyuu klo kun su b'oh wluh klo'n nun'n, o nin kôkôwéfue blu bé yiali, bé dyran mmua lo,

¹³ bé kpan sé ke: Baba Jésus, si é aunnvue, yô é yé!

¹⁴ Ke Jésus wuun bé'n, o sé bé ke: Anh fa amun wun kô klé Nyanmien nyrun dyranfue mun. Ke béh koh'n, kpekuun bé wun a sa.

¹⁵ Ke bé nun kun wuun ke i wun a sa'n, o see i sin, ke oh bah'n o kpan manman Nyanmien.

¹⁶ O wa kôtô Jésus bô, o le i asé. Bian so'n ti Samariefue.

¹⁷ Ye Jésus sé ke: ?Bé swran blu'n bé ngba bé wun a saman? ?Ye bé ngwlan nga'm bé li?

¹⁸ ?O yô se ye ya wu'an swran fi bo san nvlé wié nunfue nga kunngba ye o wa la Nyanmien aséo?

¹⁹ I sin o sé bian so'n ke: Dyaô, n su bo a lafi'n ti, a nyon o ti, ko.

Nyanmien siéle'n i nzolie

²⁰ Lé kun Pharisifue'm (*f4*) bé séé Jésus ke o klé bé ble nga Nyanmien wa sié swran mun'n, ye o sé bé ke: Nyanmien i swran'm bé siéle'n o ti'a liké bo bé wun ke i ye oh bah ye'n.

²¹ Bé su sé'a ke: Anh nian, o ô wa, annze, o ô lé sa, afin swran nga Nyanmien sié bé'n, bé ô amun nun wa.

²² Ye o sé i sonnzonfue'm bé ke: Tyen wié amun wla wa lô m bo n katyii Swran'n ke amunh wunh min tyen ba kunngba tye, sannge an su wu'an min.

²³ Bé wa sé amun ke: N wô wa, n wô lé sa. Nanh an wanndi wo n kunndele.

²⁴ Afin ke nyanmien'n kpa sin i bué kun lo b'o kpadya dyu i bué kun lo'n, tyen nga m bo n katyii Swran'n mh bah'n, ke o wa yô soo.

²⁵ Sannge san nh dunh mmua wun nyrennen dan kpa, ye adyulisufue nga'm bé su so'a min nun.

²⁶ Ke m bo n katyii Swran'n m ma ba'n, sa nga swran'm bé yôé Noé ble su'n, sa kunngba'n ye béh yôoh.

²⁷ Bé di liké, bé non nzan, bé dya bla nin bian, bé fa bé mma mun man bian, lélé fa dyu tyen nga Noé wluu mméli'n nun'n, nzué dan'n toli, nan wa nunnun bé kwlaa.

²⁸ I kunngba'n, o wa yô ke Lot ble su'n sa, bo swran'm bé di liké, bé non nzan, bé tô ninngé, bé yô bé ninngé ate, bé di fié, bé kplan sua.

²⁹ Sannge tyen nga Lot fin Sodome lo fité'n, sin nin soufre (*f26*) bé fin nyanmien su lo gua ke nzué sa, nan wa nunnun bé kwlaa.

³⁰ Ke m bo n katyii Swran'n min wun nglô yile tyen'n nun o wa yô soo.

³¹ Tyen so'n swran ng'o ô i sua ti gbagblagba'n su bo i ninngé'm bé ô sua lo'n, ke o dyra'n nan mon o kô fa bé, ye swran ng'o ô fié su'n, nan men i kusu se i sin.

³² Anh bu Lot yi'n i lie'n i akunndan nian.

³³ Swran nga i waan oh seseh i nguan'n, oh kpeh i nguan'n sin, sannge swran ng'o kpe i nguan'n sin'n, oh nyenh ékun.

³⁴ Anh nian, ke tyen so'n dyu'n, se swran nnyon bé la be kun su kongue'n, béh fah kun, béh yatyih kun le.

³⁵ Ye bla nnyon bo bé su si liké silie kun nun'n, béh fah kun, béh yatyih kun le.

³⁶ [Yasua nnyon bo bé ô fié kun su'n, béh fah kun, béh yatyih kun le.]

³⁷ Ye i sonnzonfue'm bé use i ke: ?Nannan, nin fan ye sa so'm béh yôoh? Ye o sé bé ke: Lika nga liké fuen ô le'n, le ye apetekuasi'm bé yiaa.