JÉSUS-CHRIST I DYASIN FE'N BO LUC KLELI'N 14 - Nyanmien nde Ufle

Jésus yôô tukpatyefue kun dyuédyué

¹ Lé kun sabbat b'o ti Juif'm bé tyen te'n, Jésus oo Pharisifue'm (*f4*) bé kpen kun awlô lo liké dile, bé nga bé ô le'n bé nien siin.

² Ke oh yôh so'n, bian kun b'o wlawlali'n o dyin i nyrun le.

³ Ye Jésus usa mmla sifue nin Pharisifue'm bé ke: ?Bé kwla yô swran dyuédyué sabbat tyen, annze bé yôman?

⁴ Ba te'a su. Ye o uti tukpatyefue'n, o yôô i dyuédyué, o sé i ke o o.

⁵ I sin o usa bé ke: ?Amun kunman nun'n, o ka'a le yi'e kpekuon?

⁶ Sannge ba kwla te'a nde so'n su.

Bia kpakpa su tranle

⁷ I sin, o bu nyanndra kun klé bé bo bé flee bé ke bé wa di liké'n, yele ke o wun ke bé kunnde bia kpakpa mun ye bé tran suo. Ye o sé bé ke:

⁸ Se swran wié fle amun nun kun atonvle bô'n, nanh kpli kô tran bia kpafue'n su, nan se swran wié b'o le nyrun tra wo bo bé flee wié'n, se o ba'n,

⁹ swran ng'o flee amun nnyon'n, wa'a sé'o o ke: Dyaô o bia lie'n su men'n ti. Ke ah dyaôh kô tran sien lo bia lie'n su'n, nyannzuen kunh o.

¹⁰ Sannge se swran fle o ke a wa di liké'n, kô tran sien lo bia lie'n su, nan swran ng'o flee wo'n, se o dyu le'n wa sé o ke: Dyanvue, wa tran bia kpa nga su. I so'n nun, ah nyanh komin bé nga a nin bé di liké'n bé nyrun.

¹¹ Afin swran kwlaa ng'o yô i wun dandan'n, Nyanmien gueh i nyin asé, sannge swran ng'o tu'e i wun'n, Nyanmien man oh nyanh nyrun.

¹² Ye o séé swran ng'o flelii'n kusu ke; Se ah fleh swran ke o wa di liké'n, se wia nun ô, se nnosua ô, nanh fle o dyanvue, o niaan, nin o ôsufue, nin o tranfue anyanbéunfue mun, nan bé kusu ba fleman o, ba yôman nga a yô maan bé'n, i wunsu a ma'an wo'n ti.

¹³ Sannge se ah dih tyen'n, fle yalefue, bé bo bé sa nin bé dya ti wuwa'n, nin tyetyewafue, nin anyansifue mun.

¹⁴ Se a yô so'n, Nyanmien wa yô o lie yé. Bé lie'n bé le'a liké nan ba yô wié a man o, Nyanmien bobo ye, ke swran kpa'm bé tyen'n, oh yôh o lie'n man o.

Bé bo bé fle bé ke bé wa di liké'n bé wun nyanndra

¹⁵ Ke bé ô alie'n sin'n, bé nun kun tii nde so'n, ye o sé Jésus ke: Swran ng'o kô di alie Nyanmien men'n nun'n, i lie su ti yé!

¹⁶ Ye Jésus sé i ke: Nian, bian kun toon alie dan kpa, nan wa fle swran kpanngban kpa ke bé wa di.

¹⁷ Ke bé wiéé liké'n yô'n, o sunmeen i swran'n ke o kô sé bé b'o yiaa bé'n ke, ba wié liké'n yô, nan bé bla.

¹⁸ Sannge nga waan, n kwla koman, nga waan, n kwla koman. Bé nun kun sé i ke: Se a dyu lo'n, sé i ke o yatyi, man tô asie wié, bé waan, san nde m ba nian.

¹⁹ Ye kun kusu waan: Se a dyu lo'n, sé i ke o yatyi, man tô nannin blu, nh kôh nian bé se bé si dyunman di ô.

²⁰ Ye kun ékun waan: N fin bla dyale ityra'n, i so'n ti, n su kwla koman.

²¹ Ke swran so'n see i sin awlô lo'n, o kan bé ngbata so'n kléé i min'n. Ye awlô bô kpen so'n fa ya o sé i swran'n ke: Ko guasu lo nin klo'n nun atinatin'm bé su ndende, kô fle yalefue nin bé bo bé sa nin bé dya ti wuwa'n, nin anyansifue, nin tyetyewafue mun, man bé bla.

²² Ke i swran'n woli b'o bali'n, o sé i ke: Baba, liké nga a sunmaan min ke n yô'n, man yô, sannge tranwle'n wié te ô le ékun.

²³ Ye i min'n sé i ke: Fa atin'm bé su, sin klangla'm bé bô, swran kwlaa bo a wuin'n, mon o bla man n sua'n yi.

²⁴ Afin bé kwlaa nga n yiaa bé bo ba baman'n, nanwle, bé nuan su ka'an wié mlonmlon.

Liké nga bé yô nan ba su Jésus su'n

²⁵ Lé kun ke Jésus nin swran kpanngban kpa béh koh lika'n, o dyran kpee i nyin sé bé ke:

²⁶ Swran ng'o ba n sin'n, se wa kpomen i si, i nin, i yi, i mma mun, i niaan mun, ye i bobo i wun'n, o su kwla yôman n sonnzonfue.

²⁷ Ye swran ng'o suemen i waka'n o su'a n su'n, o su kwla yôman n sonnzonfue.

²⁸ ?Amun nun ônin ye se i waan oh kplanh nglô sua fléiin kun'n, o du'an mmua tra'an asé bu'e i sika'n nianman, se i sika'n kwlah dyu i kplanle ô nion?

²⁹ Se wa yô'e i so'n, nan se o bô i bô bo wié'e i yô'n, o tyeman nan bé kwlaa nga bé wuin'n ba srii,

³⁰ ba sé ke: Bian nga bôô sua'n bô, sannge i sa dyu'e i yôle su.

³¹ ?Ye famien ônin ye se i waan o nin i wiéngu famien kun béh kôh kun ale'n, o du'an mmua tra'an asé bu'e i akunndan kpa se o kwla fa swran akpi-blu o nin nga b'o le swran akpiablaon'n bé kun ô nion?

³² Se o wun ke o nin i bé su kwla kunman'n, ke famien kun'n te ô mmua lo'n, oh sunmanh swran ke bé kô gue i asé.

³³ I so'n ti, amun nun swran kwlaa nga wa yatyi'e i ninngé'n kwlaa'n, o su kwla yôman n sonnzonfue.

Ke ndyin'n i ta'n kô kpo'n

³⁴ ?Ndyin'n ti liké kpa, sannge se i ta'n kpo'n, nzu ye béh fah yô nan wa yô fe ékuon?

³⁵ Se bé gue i asie wun ô, nnen waka su nun ô, bé kwla fa yô'a liké fi, blô ye bé gue io. Man swran ng'o si fa sié'n, fa sié!