JÉSUS-CHRIST I DYASIN FE'N BO LUC KLELI'N 12 - Nyanmien nde Ufle

Dunman klôle nde bo Jésus kannin'n

¹ Ke o yôô so'n, swran akpiakpi bé yiali, o man bé fufu bé wiéngu su. Jésus bôô nde kanle'n i bô i sonnzonfue'm bé su, o sé bé ke: Anh nian amun wun kpa Pharisifue'm (*f4*) bé kpaun ayré bo yele dunman klôle'n i lika.

² Sa kwlaa nga bé katakata su'n, i wié fi su ka'a le b'o su fité'a nglôo, ye nde fi su ka'a nvialie nun bo bé su si'a nuon.

³ I so'n ti, nde nga an fia kongue kannin'n, oh teh nzra nun, ye nga an tu i aswré sua lo'n, béh bôh i ndôlô.

Swran ng'o ti bo an srôé'n

⁴ Amun bo an ti n dyanvue'n, nh kanh nde kun klé amun: Nanh an srô bé nga bé kun swran, bo bé kwla yômen sa fi kun'n.

⁵ M ma klé amun swran nga bo ye an srôé'n. Anh srô Nyanmien bo ke o kun swran'n, o kwla fe yi nyrennen lika'n nun'n, i ye anh srô io.

⁶ ?Bé yôman ndrôfia nnun ate bablu nnyon? Sannge o nin i so'n ngba, Nyanmien nyin fi'a bé nun kun.

⁷ O si amun ti ndre'n bobo i nuan. O man, nanh sre kun amun mlonmlon, swran kun ti kpa tra ndrôfia kpanngban.

Bé nga bé sé ke bé ti Christ lie'n

⁸ Nanwle, swran ng'o bô n dunman swran'm bé nyrun'n, m bo n katyii Swran'n n kusu mh bôh i dunman Nyanmien i ange'm bé nyrun.

⁹ Sannge swran ng'o yô i wun swran'm bé nyrun ke o si'a min'n, m bo n katyii Swran'n n kusu nh kenh Nyanmien i ange'm bé nyrun ke n simen.

¹⁰ Swran kwlaa ng'o kan m bo n katyii Swran'n min wun nde'n, béh yatyih tyee, sannge swran ng'o satyi Nyanmien Wawe'n i dunman'n, bé su yatyi tyemen mlonmlon.

¹¹ Ke béh fah amun ko Nyanmien sua'm bé nun, o nin dyole difue nin kpenngben'm bé dyasu'n, nanh an kôkô nde nga amunh kanh nan amuan nyan amun ti'n, nin i kanle wafa nga amunh kanh'n,

¹² afin Nyanmien Wawe'n bobo oh kléh amun nde nga amunh kanh'n do kunngba so'n su.

Bian anyanbéunfue sinnglinfue'n

¹³ Bé bo bé yiaa le'n, kun sé Jésus ke: Ndya, sé min niaan bian'n man é tye adya bo é si yatyi maan yé'n.

¹⁴ Ye Jésus sé i ke: ?Ndya, wan ye o fa min sié ke n yô amun dyole difue, nin amun ninngé tyefueo?

¹⁵ I sin o sé bé ke: Anh nian amun wun kpa kônvi kpli yôle'n i lika, afin man swran nyen i wun, o nyen i wun see… nanh ninngé so mun ye bé men i nguaan.

¹⁶ O bu bé nyanndra kun, o sé ke: Bian anyanbéunfue kun i fié'n yôô yé kpa.

¹⁷ O bu akunndan o sé ke: N ninngé mun ye bé ô ye'n, n le'a lika n gua'a bé nun. ?N yôé se?

¹⁸ Akunndan kun kpeen i klun, o sé ke: Nga m ma yô'n ye, m ma bubu tanngannin nga mun, nh kplanh ufle dandan kpa, nh fah min awié'n nin min ninngé'n kwlaa guagua bé nun.

¹⁹ Ke o kô yô so'n, nh tranh asé, nh déh wunmien, nh dih n klun liké, afin ninngé ng'o ô ye'n, nh dih lélé o su wiéman. N klun a dyo sien'n.

²⁰ Sannge Nyanmien usa bian so'n ke: ?Sinnglinfue, nde kongue béh fah o, ye ninngé nga a yiayia bé su ye'n, oh kah wan sa nun?

²¹ Swran ng'o kunnde ninngé ke oh nyenh i wun, b'o le'a Nyanmien ninngé'm bé wié fi'n, ke o ti soo.

Ngôkôe

²² Ke o yôô so'n, Jésus sé i sonnzonfue'm bé ke: I so'n ti, nanh an kôkô ninngé bo an lemen'n ti sé ke: ?Nzu ye é dio? ?É nyan tannin nin ye é klaa?

²³ Afin nguan'n ti kpa tra alie'n, ye wunnen'n ti kpa tra tannin'n.

²⁴ Anh nian kuankuan mun, bé gua'a awié, bé kpe'a awié, bé le'a kuku nin tanngannin, sannge Nyanmien ta bé. An ti kpa tra anunman mun kpe blu!

²⁵ ?Amun nun ônin ye i kôkôle nun o kwla gue i afue'n su bo kaan?

²⁶ ?Se an kwla'a liké kaan ke nga sa yô'n, nzu ti ye liké nga'm bé ti an kôkôo?

²⁷ Anh nian waka nyre mun, bé tô'a dyésé, bé wu'a tannin, sannge Salomon bobo o nin i anyanbéun'n kwlaa wa kla'a bé nun wafa kun wunsu tannin lé.

²⁸ ?Se Nyanmien yô idyré bo nde bé ô blô lo, bo ainman béh guah bé sin nun'n bé klaan ke nga sa'n, o kataman amun wun so kpe blu? ?An lafi'a Nyanmien su?

²⁹ Nanh an bu liké nga amunh dih'n nin nzué nga amunh nonh'n i akunndan, ye nanh an sanngan amun wun akunndan.

³⁰ Men wunmuan'n nun bé bo bé suman Nyanmien'n, bé ye bé fa bé nyin blô ninngé so'm bé kunndele suo. Amun Si si ke amun sa mian ninngé so'm bé wun.

³¹ Anh dun mmua fa amun wun man Nyanmien, man o sié amun, i sin oh fah ninngé so mun uka su man amun.

Anyanbéun kpa

³² Amun bo an ti ke bua akpasua kaan kun sa'n, nanh sre kun amun, yele ke amun Si klô ke oh feh i men'n nun ninngé kpakpa'n man amun.

³³ Anh yô amun ninngé'm bé ate, anh fe i sika'n tye yalefue mun. Anh kpe betro b'o yôman nvuen bo liké wié'a nun'n, anh sié nyanmien su lo, lo lie'n, awiéfue ko'a lo, nvole di'a liké lo.

³⁴ Afin lika nga amun awlen su ninngé'n wô le'n, le ye amun akunndan'n wôo.

Tran minndele

³⁵ Anh tanndan amun wun, anh so amun kannin'n.

³⁶ Anh yô ke swran bo bé su minnde bé min'n bo ke o fin atonvle bô dyu le tye'n, b'o bôbô anuan'n bé tiké'n, bé lie'n sa.

³⁷ Bé nga ke bé min'n bah'n, bé nyin ô i sin'n, bé lie su ti yé! Anh nian nga b'oh yôh'n ye, oh feh i tannin'n kpe i bô, o man béh tranh asé, ye i bobo oh fah ninngé man bé.

³⁸ Bé nga bo se o ba kongue afien annze ako nyinman klikli su'n, o tô bé bo bé nyin ô su so'n, bé lie su ti yé!

³⁹ Man amun wun i wle kpa ke, se awlô bô kpen kun si do nga awiéfue'n ba su'n, o su yatyi'e le ke o fiti i sua'n.

⁴⁰ Amun kusu, anh buabua amun wun sié, afin m bo n katyii Swran'n mh bah do nga an bu'a min akunndan'n su.

Dyunman difue ng'o ti kpa'n nin ng'o ti'a kpa'n

⁴¹ Ye Pierre usee i ke: ?Nannan, é ye a bu nyanndra so'n klé yéo, annze é ngbaa?

⁴² Ye é Min'n sé ke: ?Wan ye o ti swran kpa b'o si liké su nian kpa, bo i min'n fe sié i minnien'm bé su ke o man bé alie tyen bo bé siéli'n su nion?

⁴³ I sofue nga bo ke i min'n tôé'n o di i dyunman so'n, i lie su ti yé!

⁴⁴ Anh nian nga b'oh yôh'n ye, oh feh i ninngé'n kwlaa wle i sa nun.

⁴⁵ Sannge se i swran so'n bu akunndan sé ke: Min Min'n i bale'n wa tye, nan o to i min'n i swran yasua nin i swran mmla'm bé su, o bô bé, o di liké, o non nzan o bô'n,

⁴⁶ swran so'n i min'n oh bah tyen nga i nyin nu'en i bale'n su kun'n, o nin do nga o si'a ke i su ye o ba'n. Oh kpekpeh i nun, o man awiélie kunngba ng'o wié bé nga bé ti'a swran kpa'n, oh wiéh i wié.

⁴⁷ Swran ng'o si sa nga i min'n klô'n sannge o bumen i akunndan o yôman'n, béh bôéh dan kpa.

⁴⁸ Sannge swran ng'o si'a nun, nan o yô sa wié b'o nin fo tule fata'n, béh bôéh kaan sa. Swran nga bé men i liké kpanngban'n, swran so'n ye béh séh i ke o fa kpanngban blaa, ye nga bo bé fa liké kpanngban wle i sa nun'n, béh dyranh su ke o fa kpanngban kpa bla.

Jésus i swran'm bé afien satyile

⁴⁹ M baa men'n nun wole, o ka n ngunmion wa so!

⁵⁰ Baptême wafa kun ô le bo san nh yôh, o ka n ngunmin'n ba yô min man nyan n ti!

⁵¹ ?An bu i ke m baa swran'm bé afien siésiéle? Nanh i so tio, swran'm bé afien satyile ye m balio.

⁵² Afin ke o fin nde'n, swran nnun bo bé ô awlô kun nun'n, béh buh nun, nsan bé bô yôh kun nnyon bé wun, ye nnyon kusu bé bô yôh kun nsan bé wun,

⁵³ yasua kun nin i wa yasua'n béh buh, ye ba yasua kun nin i si béh buh, bla kun nin i wa bla'n béh buh, ye ba bla kun nin i nin béh buh, bla kun nin i wa yasua i yi'n béh buh, ye bla kun nin i wun i nin'n béh buh.

Ble'n i nzolie

⁵⁴ O sé swran'm bé ékun ke: Ke an wun ke nyanmien'n wa dun i bô wia atolie lo'n, kpekuun an sé ke, nzué wa to, ye o kpen su.

⁵⁵ Ye ke an wun ke aunngban'n fin papla nun lo, ba'n, an sé ke, nde aunyeye'n bah, ye o kpen su.

⁵⁶ Dunman klôfue mun, an si asie'n su wa nin nyanmien su lo ninngé'm bé nzolie. ?Nzu ti ye an si'a ble nga an wô nun ye'n i nzolieo?

Swran nnyon bé afien siésiéle

⁵⁷ ?O yô se ye an kwla wu'an liké ng'o ti kpa'n i wleo?

⁵⁸ Se swran sanman wo'n bo amunh koh dyole difue'm bé dyasu'n, ke an te ô atin nun'n, mion o nyin siésié dyole so'n, mon o wié, nan wa fa'a o a ma'an dyole difue'n, nen i kusu wa fa'a o a ma'an sôndya'n nan wa wla'o bisua'n ti.

⁵⁹ Se o yô so'n, nanwle a su fi'an lo fitéman, lélé san ah wiéh i kale'n kwlaa tutu, bablu kun bo su kaman.