JÉSUS-CHRIST I DYASIN FE'N BO LUC KLELI'N 10 - Nyanmien nde Ufle

Jésus sonnzonfue ablésô'n bé sunmanle

¹ Ke o yôô so'n, é Min'n kpaa swran ablésô [nin nnyon] ékun, o sunman bé nnyonnyon ke bé dun mmua klo nin lika nga i bobo o wa sin le'n bé nun.

² O séé bé ke: Awié'n wa yô yé dan, sannge dyunman difue'm ba sonman. I so'n ti, anh sé fié ifue'n man o fa swran nan bé o i fié'n su.

³ Anh nian, nh sunmanh amun bo an ti ke bua sa'n gbôklô'm bé afien, anh wo.

⁴ Ke amunh koh'n, nanh an fa pata, nanh an fa tro, nin ngbabua, nanh an yô swran liké atin'n nun.

⁵ Awlô kwlaa nga an wlu nun'n, ke an wlu lo tye'n, anh yô bé liké sé ke: Man an di aladyé!

⁶ Se swran weteefue wié ô awlô so'n nun'n, mon o nyan aladyé, sannge se i sofue nu'an le'n, nanh man amun nuan yrale'n yô yé.

⁷ Anh siké awlô so'n nun, liké kwlaa nga bé dii le'n, anh di wié, afin dyunman difue'n i sa ka'a ngben. Nanh an tu ko awlô ufle nun.

⁸ Klo kwlaa nga an dyu su bo bé so amun nun'n, liké nga bé fa man amun'n, anh di.

⁹ Anh yô tukpatyefue nga bé ô le'n bé dyuédyué, anh sé bé ke, Nyanmien siéle'n o nin bé a ka kôkô.

¹⁰ Sannge klo kwlaa nga an dyu su bo bé so'a amun nun'n, anh dyran gua'n su, anh sé ke:

¹¹ Amun bobo amun klo'n su ndutré b'o ô é dya wun'n, éh kpukpuh gue amun wun, sannge man amun si ke Nyanmien i siéle ble'n wa mantan.

¹² Nanwle, dyole dile tyen'n nun Sodome i nyrennen lie'n, oh yôh soso tra klo so'n lie'n.

Klo nga bé lafi'a Jésus su'n

¹³ Chorazinfue mun, an yakô! Bethsaïdafue mun, an yakô! afin se o ti ke sa kéklééklé bo bé yôô bé amun klo'n su'n, ye bé yôô bé Tyr nin Sidon'n, wuun lofue'm bé kla ôfuen, bé tran nzuen nun, bé katyii bé nzuen'n wa tye.

¹⁴ O man dyole dile tyen'n nun Tyr nin Sidon bé nyrennen lie'n oh yôh soso tra amun lie'n.

¹⁵ ?Capernaümfue mun, amun kusu an bu ke bé wa bô amun dunman lélé dyu nyanmien su lo? O su yô'a so, bé wa gua amun nyin asé blolo lo.

¹⁶ Swran ng'o fa amun nde'n su'n, wuun min nde'n su ye wa faa. Sannge swran ng'o so'a amun nun'n, wuun wa so'a min nun, ye swran ng'o so'a min nun'n, wuun wa so'a swran ng'o sunmaan min'n, i nun.

Jésus sonnzonfue ablésô'n bé bale

¹⁷ Ke swran ablésô [nin nnyon'n] bé oli bé bali'n, bé klun dyoli, bé sé ke: nannan, ke é bô o dunman'n, asie usu'm bé srô é.

¹⁸ O sé bé ke: N wuun Satan (*f6*) o fin nyanmien su lo ke nyanmien b'o kpa sin'n sa, o toli.

¹⁹ Nian, n séli amun ke, nh dyranh amun sin, amunh tiah wuô nin nyannglan'm bé su, amunh kwla kpofue'n, liké fi su yô'a amun.

²⁰ Kannze n séé so'n, nanh amun klun dyo ninngé'm bo bé srô amun'n ti, sannge man amun klun dyo amun dunman bo ba klee nyanmien su lo'n ti.

Jésus klun dyoli

²¹ I ôsu kunngba'n nun Nyanmien Wawe'n man Jésus klun dyoli dan kpa, nan wa sé ke: N Si, wo bo a sié liké'n kwlaa nyanmien su lo nin asie'n su wa'n, kwla ô, yele ke a fa ninngé nga mun fiaa ngwlelefue nin bé bo bé si sa'n bé wun, sannge a yi bé nglô kléé bé bo bé ti ke ba kanngan mun sa'n. N Si, kwla ô, o klun sa nga a yôli'n ti.

²² N Si ye o fa liké'n kwlaa maan mion. Swran fi si'a Nyanmien Wa'n, san i Si kunngba ye o si io, ye swran fi si'a Nyanmien Wa'n i Si'n, san Ba'n bobo o nin swran ng'o klô ke o fe i Si kléé'n, bé ye bé si io.

²³ O kpee i nyin i sonnzonfue'm bé wun lo o wo i nuan asé sé bé ke: Bé nga bé wun liké nga an wun bé ye'n, bé lie su ti yé!

²⁴ Afin anh nian, Nyanmien nuan idyofue nin famien kpanngban bé klô ke béh wunh liké nga an wun bé ye'n, sannge ba wunmen, ye béh tih nde nga an ti bé ye'n, sannge ba timan.

Samarie bian kpa'n i wun nyanndra

²⁵ Jésus kan nianle ti mmla sifue kun dyaô use i ke: ?Ndya, nzu ye n yô nan man nyan anannganman nguan nion?

²⁶ Jésus use i ke: ?Bé klelii se mmla fluwa'n nun? ?Ye ke a kanngan'n, o sé se?

²⁷ Ye o sé i ke: «Klô o Min Nyanmien'n kpa, fo o wla'n kwlaa gue i su, fo o wunmuan'n kwlaa men, ye man wo akunndan'n kwlaa tren i su, ye klô o wiéngu ke a fa klô o bobo wun'n sa.»

²⁸ Jésus sé i ke: Ke o ti soo, yôé so, ah nyanh nguan.

²⁹ Sannge o klô ke bé bui swran kpa, i so'n ti, o usa Jésus ke: ?Wan ye o ti n wiéngu nion?

³⁰ Ye Jésus sé i ke: Bain kun fin Jérusalem o su ko Jéricho, o kô too kôdiawiéfue'm bé nun, bé dé i wun ninngé'n kwlaa, bé bôé lélé, ke o ka kaan o wu'n, ye bé yatyii le olio.

³¹ Nyanmien nyrun dyranfue kun sin atin kunngba so'n su, o wuun bian so'n, o sen i wun oli.

³² Ye Lévifue kun kusu sin le, o wuun bian so'n, o sen i wun oli.

³³ Sannge Samariefue kun b'o su ko lika'n, o kô fitéé i su, ke o wunniin'n, o yô i annvo.

³⁴ O guegue i kannin'm bé nun ngô nin du vin, nan wa tyityi bé su, ye o fe fu nnen'n bo i bobo fu su'n i suo, o fe oo hôtel kun nun, o nien i lika.

³⁵ Ke alie tyennin'n, o yi denier (*f10*) nnyon maan hôtelfue'n, o sé ke: Nien i lika kpa, liké nga a men i ékun'n, se m ba'n, nh yih i nuan liké man o.

³⁶ ?Bé swran nsan so'n, o nyrun'n bé nun ônin ye o ti bian b'o too kôdiawiéfue'm bé nun'n i wiénguo?

³⁷ Ye i waan: Yele nga b'o sii aunnvue'n. Ye Jésus sé i ke: O kusu, kô yô i kunngba so'n.

Jésus i Marthe nin Marie bé wun wunle

³⁸ Ke Jésus nin i sonnzonfue'm béh koh bo bé dyuu klo kun su'n, Jésus wluu klo'n nun, nan bla kun bo bé flee Marthe'n wa sikéé kpa.

³⁹ I niaan bla kun bé flee Marie, o tran asé é Min'n i wun le o tié i nde b'o kan'n.

⁴⁰ Sannge Marthe nyin ti blôwa bé lika nianle'n ti. O ba é Min'n i wun le, o sé i ke: ?Ke min niaan'n yatyi liké'n kwlaa n sa nun'n, o yômon o ya? Séé mon o uka min.

⁴¹ É Min'n sé i ke: Marthe, Marthe, a kôkô, ye o nyin blô liké sunman su.

⁴² Sannge liké kunngba tye ye o ti kpaa, Marie a fe i nun kpafue'n, bo swran fi su démen i sa nun.