JÉSUS-CHRIST I DYASIN FE'N BO LUC KLELI'N 1 - Nyanmien nde Ufle

Nde klikli bo Luc kan kléé Théophile'n

¹ Théophile n swran kpa, swran sunman bé bô manndren bé klee sa ng'o yôli é nyrun wa'n.

² Ke sa so'n yôh'n, swran nga bé wuun nun'n, bé fa Nyanmien nde kanle'n katyi bé dyunman, bé kan klé yé. Nde so'n ye bé kleli nion.

³ I so'n ti, n kusu, ke n wusausa sa so'n nun kpa bo n wuun ke o fa bô i bô'n, n wun ke o ti kpa ke n kle nde so'n ble o,

⁴ nan a si ke liké nga bé kléé wo'n ti nanwle.

Jean baptême yôfue'n i awulie nde kanle

⁵ Hérode Judée famien'n i ble su Nyanmien nyrun dyranfue kun ô le, bé flee Zacharie, o ti Nyanmien nyrun dyranfue akpasua bo bé fle i Abia'n, bé nun kun, bé fle i yi'n Élisabeth, o fin Aaron ôsu'n nun.

⁶ Bé nnyon'n bé yô é Min Nyanmien klun sa, bé fe i nde'n nin i mmla'n kwlaa su kpa.

⁷ Sannge ba wu'a ba, yele ke Élisabeth ti klun kpanfue, ye bé nnyon ba yô kpenngben.

⁸ Lé kun bo Nyanmien nyrun dyranle dyunman'n tôô Abia akpasua lie'n, bo Zacharie ô le oh dih i dyunman'n,

⁹ bé tu foto ke bé yôé titi'n sa, nan wa to i su ke o wlu é Min Nyanmien i sua dan'n nun o yra ayré fannin'n.

¹⁰ Ke oh yrah ayré fannin'n bo swran'n kwlaa bé ô guasu le béh sreh Nyanmien ke o nian bé su'n,

¹¹ oh niaanh… é Min Nyanmien i ange kun dyin ayré fannin yrawle'n i fama su le.

¹² Ke Zacharie wunniin'n, i akunndan sanngannin, sre kunniin.

¹³ Ye ange'n séé i ke: Zacharie, nanh sre kun o, afin nde nga a kan kléli Nyanmien'n, o tili. O yi Élisabeth o wa wu ba yasua kun man o, ah tonh i dunman Jean.

¹⁴ O klun wa dyo, ah sih ablé, ke bé kô wui'n swran sunman bé klun dyoh.

¹⁵ Afin oh yôh swran dan é Min Nyanmien nyrun, o su nonman nzan b'o bô'n i wié fi, o nin Nyanmien Wawe'n fin blolo.

¹⁶ O man Israëlfue kpanngban béh sah bé sin bé Min Nyanmien'n i sin.

¹⁷ Oh dunh é Min'n nyrun, akunndan kunngba nga Élie buli'n, oh buh wié, ye sa kéklééklé nga Élie yôli'n, oh yôh wié. «Oh siésiéh ba'm bé nin bé si'm bé afien,» o man nyin kékléfue'm béh katyih, béh buh akunndan kpa, o man swran'm béh buabuah bé wun minnde é Min'n.

¹⁸ Zacharie usaa ange'n ke: ?Oh yôh se ye nh kwlah si so sakpaa? Afin man yô kpenngben, ye n yi kusu wa di afue louun.

¹⁹ Ange'n séé i ke: Min ye bé fle min Gabriel nion, n ti Nyanmien i swran. O sunmaan min ke m ba wun o wun, nan n kan nde fe nga klé o.

²⁰ Nian, a wa yô bôbô, a su kwla'a idyo lélé san ba wu ba so'n, yele ke a lafi'a min nde'n su, sannge se i tyen'n dyu'n, oh yôh.

²¹ Ke oh yôh so'n, wuun swran'm bé su minnde Zacharie, bé klun titi bé, yele ke o tyee Nyanmien sua dan'n nun lo.

²² Ke o fin lo fitéli'n, i waan oh kanh nde klé bé, sannge o kwla idyoman, o man bé wun i wle ke o wuun liké wié Nyanmien sua dan'n nun lo. Kpekuun o fe i sa kan nde kléé bé, ye o ka bôbô lélélé.

²³ Ke i tyen'n dyuli'n, o oo i awlô.

²⁴ Ke o dii lé nnyon kun'n, i yi Élisabeth wunnzeli, o fiaa anglô nnun. O sé ke:

²⁵ Nian yé dan bo é min Nyanmien'n wa yô mion, sien'n, wa titi min nyrun nyannzuen'n swran'm bé nyrun.

Jésus i awulie nde kanle

²⁶ I anglô nsien su Nyanmien sunmaan ange Gabriel so'n Galilée klo kun bo bé flee Nazareth'n su,

²⁷ talua kun b'o nian si'a bian bo bé flee Marie'n i wun lo. Bian kun bo bé flee Joseph b'o fin David ôsu'n nun'n, o tree i asé.

²⁸ O wluu talua so'n i awlô lo o yô i liké, o sé ke: O lie su ti yé! Man é Min Nyanmien'n dyran o sin!

²⁹ Nde so'n senngen i akunndan, ye o sé ke: ?Liké nga bé yô min ye'n, i bô yele ônin?

³⁰ Ange'n sé i ke: Marie, nanh sre kun o, afin Nyanmien a bu o swran.

³¹ Nian, a wa wunnze, ah wuh ba yasua, ah tonh i dunman Jésus.

³² Oh yôh swran dan, béh fleeh Nyanmien Kpli bo liké fi nu'en i sin'n, i Wa, ye é Min Nyanmien'n oh feh i nannan David bia'n men.

³³ Oh siéh Jacob awlô'n, ye oh kah bé ôsu'n nun tititi.

³⁴ Marie usaa ange'n ke: ?Ke bo n si'a yasua'n, oh yôh se ye sa so'n kwlah yôo?

³⁵ Ye ange'n séé i ke: Nyanmien Wawe'n oh bah o wun, ye Nyanmien Kpli bo liké fi nu'en i sin'n, oh dyranh o sin. I so'n ti, ba'n bo ah wuih b'o ti Nyanmien lie klônglô'n, béh fleeh Nyanmien Wa.

³⁶ Nian Élisabeth b'o ti o ôsufue'n, wa wunnze i kpenngben ba, bla so'n bo bé flee klun kpanfue'n, wa wunnze, i anglô nsien ye.

³⁷ Afin sa kwlaa nga Nyanmien waan oh yôh'n o kwle i yô.

³⁸ Marie sé ke: Min ye, n ti é Min Nyanmien'n i afannien, Nyanmien nin o nuan fe. Ye ange'n yatyi i le olio.

Marie i Élisabeth wun wunle

³⁹ Ke o yôô so'n, lé kun Marie fa atin oo Juda klo kun b'o ô ôka'm bé nun lo'n su trelele.

⁴⁰ O wluu Zacharie awlô lo, o yô Élisabeth liké.

⁴¹ Ke Élisabeth tii liké bo Marie yôlii'n, i ku'n dyaédyaé, Nyanmien Wawe'n too i su, o kpan kéklé kpa ke:

⁴² Ééé, mmla'm bé nun Nyanmien a bu o swran, ye ba'n bo ô o klun lo'n, i kusu, Nyanmien bu i swran.

⁴³ ?Wan yele min bo min Min'n i nin'n ba min wun waa?

⁴⁴ Afin ke n tii liké bo a yôô min'n tye'n, ba'n b'o ô n klun lo'n, i klun dyo, o man n ku'n dyaédyaé.

⁴⁵ Mmô, o bo a lafi nde bo é Min Nyanmien'n kannin'n su ke oh yôh'n, o lie su ti yé.

Dyué bo Marie tô manmaan Nyanmien'n

⁴⁶ Marie séé ke: Min wun blibli min, o man mh manmanh min Min Nyanmien'n

⁴⁷ Nyanmien n Défue'n ti, n klun dyo,

⁴⁸ Yele ke wa nien i afannien aévuefue kan'n i ôsu. Afin ke o fin nde'n, swran'n kwlaa bé wa sé n ke: Mmô, o lie su ti yé!

⁴⁹ Nyanmien Kpli b'o sié liké'n kwlaa'n, wa yô sa dan a man min. I dunman'n le'a wunsu,

⁵⁰ Ke o fin lalafue nun lélé b'o fa dyu nde'n, O si bé bo bé srôé'n bé aunnvue titi.

⁵¹ O yii i kwlale'n nglô, O buu wun tufue'm bo bé gugu dandan'n bé bué.

⁵² O kpalôô famien ngblingbli'm bé bô bia'n, O maan yalefue'm bé su.

⁵³ Bé nga awé kun bé'n, o man bé liké kpakpa man bé ku yi. O man anyanbéunfue'm bé fa bé sa ngben ko.

^54-55 O dyren i swran Israël'n i sin. Ye nde b'o kan kléle é nannan mun'n, Nin Abraham, nin i ôsufue mun ke oh sih bé aunnvue titi'n, I wla ô su.

⁵⁶ Marie dii anglô nsan Élisabeth wun le, i sin o oo i klo.

Jean baptême yôfue'n i awulie

⁵⁷ Ke Élisabeth ku'n béli b'o dyu i awulie'n, o wu ba yasua.

⁵⁸ Ke Élisabeth tranfue nin i ôsufue'm bé tii ke é Min Nyanmien'n wa si i aunnvue dan'n, bé klun dyoli.

⁵⁹ Ke ba'n dii lé motyue'n, bé kô wle i klen, bé waan béh fah ton i si Zacharie.

⁶⁰ Sannge i nin waan: Tyetye, man bé flee Jean.

⁶¹ Ye bé séé i ke: Bé fle'a swran fi so o ôsu'n nun.

⁶² Bé fa bé sa usee i si ke o klé dunman ng'o klô ke bé fa flee'n.

⁶³ Zacharie man bé meen i waka bué, ye o kle su ke: Bé flee Jean. Nan wa bô bé kwlaa bé nuan.

⁶⁴ Bé dya ôsu kunngba'n nun kpekuun wa kwla idyo, ye o yi Nyanmien ayeo.

⁶⁵ Sre kuun bé kwlaa nga bé mantanmantan le'n, bé kan sa so'n i nde Judée klo'n kwlaa bo bé ô ôka'm bé nun le'n, bé su.

⁶⁶ Bé kwlaa nga bé tii nde so'n bé bu i akunndan, bé sé ke: ?Nzu ye ba nga o wa yôo? Afin é Min Nyanmien Kpli'n dyin i sin.

Sa nga b'o wa yô bo Zacharie kannin'n

⁶⁷ Nyanmien Wawe'n too i si Zacharie su, o kan sa ng'o wa yô'n, o sé ke:

⁶⁸ Israël'm bé Nyanmien b'o ti é Min'n, i kwla ô, Yele ke wa nien i swran'm bé ôsu, wa dé bé ti.

⁶⁹ Ye wa fe i swran David awlôfue kun. B'o kwla dé yé'n, wa man é.

⁷⁰ Ke o fin lalafue nun'n, o men i nuan idyofue'm bé séé ke:

⁷¹ O wa dé é bé nga bé nin é kun'n, nin bé kwlaa nga bé kpo yé'n, bé sa nun.

⁷² O si é nannan'm bé aunnvue, ye i wla ô nde b'o kan kléé bé'n su.

^73-75 Afin Nyanmien te i wun nde kléé é nannan Abraham ke, Oh déh é é kpofue'm bé sa nun, o man sre ku'an é kun, Éh kwlah yô i klun sa, éh suih nanwle su lélé fa dyu é wié tyen.

⁷⁶ Bakan, o kusu, bé wa fle o Nyanmien Kpli bo liké fi nu'en i sin'n, i nuan idyofue, afin ah dunh mmua é Min'n nyrun ah siésiéh i akpo'n,

⁷⁷ Wo ye man Nyanmien swran'm béh sih ke, ke o yatyi bé wun sa'n tye bé'n, ba nyan bé tio.

⁷⁸ Aunnvue dan bo é Nyanmien'n si yé'n ti, O fin nglô lo o wa nian é ôsu, ke alie'n tyen bo wia'n fité'n sa,

⁷⁹ «Nan oh kpadyah bé bo bé ô aôsin'n nun nin wié i fonvo nun'n, bé su,» Ye oh kléh é atin nga é sin suo éh dih aladyé'n.

⁸⁰ Bakan so'n nyinnin klanman, o yôô swran. O tran blô lo lélé fa dyuu tyen ng'o yi i wun kléé Israël mun'n.