Jude 1 - Nyanmien nde Ufle

Swran ng'o kle fluwa kô maan bé'n

¹ Amun bo é Si Nyanmien flee amun, b'o klô amun titi b'o fa amun siéé Jésus-Christ'n, min Jude bo n ti Jésus-Christ swran nin Jacques niaan'n, nh kleh fluwa nga ble amun.

² Man Nyanmien wun amun aunnvue, nan amun wun dyo amun fouun, ye o klô amun tititi.

Bé nga bé klé liké b'o ti'e i su'n

³ N swran kpa mun, ke n waan nh kleh ti nyanle bo é nin amun é nyenniin'n i nde ble amun'n, n wuun ke, se n kle amun fluwa nan n wla amun fanngan ke an dyran Christ sulafile nde'n su'n, o ti kpa. Nyanmien man bé kan nde so'n kléé i swran mun kpe kunngba tye.

⁴ Afin swran wié mun bo bé srô'a Nyanmien'n ba'a wlu é nun blelele. Bé fa yé nga Nyanmien yôô bé'n kata bé nyin yô sa tete'n kwlaa, bé bu'a Jésus-Christ bo i kunngba ye o ti é Min'n nin é Liké Kléfue'n i liké fi. Swran so'm bé fo bule nde'n bé kle siéé le lalaa.

⁵ Nde nga m ma ken le'n, an sii kpa, sannge mh bôh su ékun. É Min Nyanmien déé Israël mun Égypte lo, sannge i sin, bé nga ba lafi'e i su kun'n, o nunnuun bé.

⁶ Ye nh kanh klé amun ékun ke, ange nga ba tra'an dyunman nga Nyanmien sié bé su'n i su, bo bé yatyi bé lika'n, Nyanmien tyi bé guaa aôsin tuun kpa'n nun, o su nyanndyi'a bé mlonmlon, nan se i dyole dile tyen dan'n dyuo wa di bé nde'n.

⁷ I kunngba'n, Sodome, nin Gomorrhe, nin kloklo nga bé mantanmantan bé le'n, bé ti ke ange so'm bé sa. Bé fa bé wun wlaa téklé bôle'n nun, ye yasua'm bé kunnde bé wiéngu yasua. I nuan liké nga bé nyenniin'n yele nyrennen nga bé wuin sin b'o nuanman mlonmlon'n nun'n. Nyanmien yô i so nan swran'n kwlaa bé fa tu bé wun fo.

⁸ Nde swran so'm bé si so, sannge bé bu akunndan tete'n lélé bé satyi, bé bu'a Nyanmien liké fi, bé kpe nyanmien su lo swran nga bé le nyrun'n bé nzôwa.

⁹ Sannge i nun nga ange kpenngben Michel nin mmusu'm bé si Satan béh kplih Moïse fuen'n, bo béh sih akplôwa'n, wa kwla ke'en nde te, sannge o séé i ke: «Min Min'n kô wun o!»

¹⁰ Sannge bé lie'n, liké nga bé wu'en i wle'n, bé ken i nde ke o ti'a kpa. Ye bé sa wle nga bé wuin'n, o ti ke blô nnen'm bé lie'n bo bé wu i nin bé'n sa. Sa nga bé wun bé wle so'n ye bé satyi béo.

¹¹ I sofue'm bé yakô! Afin bé fa atin kunngba nga Caïn faa su'n su wié. Ke o yô nan ba nyan sika'n, bé fa bé wun wlaa sa tete yôle'n nun ke Balaam lie'n sa. Ke bé yôô nyin kéklé ke Coré lie'n sa'n, ye bé mlinnion.

¹² Ke amun nin bé yia alie'n su'n, bé satyi amun wun, bé di liké'n léle, nyannzuen ku'an bé. Bé bu'a swran ufle akunndan, bé bobo bé wun akunndan ye bé buo. Bé ti ke nyanmien'n b'o dun tuun, bo ke nzué'n toman'n, aunngban'n fe ko'n sa. Bé ti ke waka bo i sule ble nun o suman, bo ba tu i bô wa wu'n sa.

¹³ Bé ti ke dyénvié'n b'o bô gbuugbuu'n sa, bé nyannzuen sa nga bé yô'n ti ke i nyin su nglô'n sa. Bé ti ke nzraama b'o tu ko'n sa, lika nga Nyanmien fa siéé bé ke bé tran nun tititi'n, yele aôsin tritritri kpa'n.

¹⁴ Ye Hénoch b'o ti Adam i ôsuôsu'n i nsô su'n, o kaan sa ng'o wa to bé su'n i nde, o sé ke: N wuun é Min'n nin i ange akpiakpi kpanngban kpa bé bali,

¹⁵ ke bé fa swran'n kwlaa bla bé dyasu, nan bé fa bé nga bé srô'a Nyanmien'n bé sa nga bé yôli'n i nuan liké man bé. Afin sa te yôfue so'm bo bé srô'a Nyanmien'n, bé yô Nyanmien sa, bé ken i wun nde tete.

¹⁶ Bé idyo bé kônviabô, bé fa sa'n kwlaa gua swran wié'm bé su, bé yô sa nga bé klun klô'n, bé di bé nuan, bé fa bé nuan nun fe kunnde liké swran'm bé sa nun.

Afotue manle

¹⁷ Sannge n swran kpa mun, amun lie'n, anh bu nde nga bé nga é Min Jésus-Christ sunmaan bé'n bé kan kléé amun'n i akunndan.

¹⁸ Bé séé amun ke: Tyen wié lélé ke men'n oh koh i bué nuan'n, swran wié'm béh bah, béh dih amun to, Nyanmien bo bé srômen'n ti, béh yôh sa nga bé klun klô'n.

¹⁹ Swran so'n bé ye man swran nin swran bé bu nion. Bé ti klo swran, Nyanmien Wawe'n sié'a bé.

²⁰ Sannge n swran kpa mun, amun lie'n, Nyanmien su bo an lafi kpa'n ti, anh dyran kéklé ke sua bo bé wlee i bô kpa'n sa. Amunh nin Nyanmien kôkô yale titi i Wawe'n i fanngan nun.

²¹ Ke amunh minndeh ke é Min Jésus-Christ si amun aunnvue nan o man amun anannganman nguan'n, anh yô sa nga an yôo an si ke Nyanmien klô amun'n.

²² Anh wun bé nga bé akunndan ti nnyonnyon'n bé aunnvue,

²³ anh dé bé ke swran to sin nuon bé déé'n sa. Anh wun wié'm bé kusu bé aunnvue, sannge anh nian amun wun, afin se é kwla sé ke bé nzuen te'n ti trale fien'n, wuun an klômen mlonmlon.

Nyanmien manmanle

²⁴ Nyanmien b'o kwla nian amun su b'o man an fonman'n, bo ke o man amunh koh i wun lo'n, sa kaan sa bo'an amun wun, amun klun dyo'n,

²⁵ é Nyanmien kunngba b'o ti é Défue'n, é Min Jésus-Christ ti, man bé yi i aye, bé menmen yele ke o ti famien, bé sé ke o ti kpli, o kwla sa'n kwlaa yô. Ke o fin lalaa'n bé menmen so, ke o fin nde'n man bé menmen tititi.