Jean 9 - Nyanmien nde Ufle

Jésus tikéé bian bo bé wuu i anyansi'n i nyin

¹ Ke Jésus sinh'n, o wuun anyansifue kun bo bé wuu i nin i'n.

² I sonnzonfue'm bé usee i ke: ?Baba, bian nga, o yô se ti ye bé wuu i anyansifueo, i bobo yôô sa wié annze i si nin i nin bé yôô sa wié ti ye bé wuu i soo?

³ Jésus sé ke: Nanh ke i bobo annze i si nin i nin bé yôô sa wié tio. Sannge bé wuu i so nan i ti bé wun sa nga Nyanmien yô'n.

⁴ Ke lika'n te ô nun'n, man é di swran ng'o sunmaan min'n i dyunman'n. Lika'n su wa san, ke o kô san'n, swran fi kwla di'a dyunman.

⁵ Ke n te ô men'n nun wa'n, min ye n kpadya men'n nuon.

⁶ Ke i nuan toli'n, o tee i nuan nzué asie wun, o fe i sa fa kpita fa kpee anyansifue'n i nyinma'n su,

⁷ ye o sé i ke, o o kô wunnzin i nyrun gblé nga bé flee Siloé'n nun. Dunman so'n i bô yele Sunmanfue. O o lo kô wunnzin nun, ke oh seh i sin'n, wa wun asé.

⁸ I tranfue nin bé nga laa bé wun ke o sresre'n, bé sé ke: ?Nanh bian'n bo ye o tran lé sa sresre ninngé'n ye?

⁹ Bé wié'm bé waan: Io. Bé wié'm bé kusu bé waan: Nenh io, sannge o fe. Ye i bobo waan: Mion.

¹⁰ O man bé usee i ke: ?O yô se ye o nyinma'n tikélio?

¹¹ O sé bé ke: Bian nga bé flee Jésus'n, o kpita nnotie fa kpee min nyin su, o sé n ke, n kô wunnzin nun Siloé'n nun. N woli kô wunnziin nun, kpekuun man wun asé.

¹² Bé use i ke: ?Bian so'n wô nin? O sé ke: Man wunman kan o olio.

Pharisifue'm bé usaa bian bo i nyin tikéli'n i sa

¹³ Bé fa bian so'n b'o ti anyansifue bo i nyin tikéli'n woo Pharisifue'm (*f4*) bé nyrun lo.

¹⁴ Afin lé kun so'n bo Jésus kpita nnotie fa tikéé i nyin'n, o ti sabbat b'o ti bé tyen te'n.

¹⁵ I so'n ti, Pharisifue'm bé kusu bé usa bian'n ke o yôli b'o man o wuun asé'n. O sé bé ke: O fa nnotie kaan kpee min nyin su, n kô wunnzin nun ye n wuun aséo.

¹⁶ Pharisifue'm bé wié'm bé sé ke: Bian so'n tyi'a sabbat'n, o man nanh Nyanmien ye o sunmeen io. Bé wié'm bé kusu bé waan: ?Se swran kun ti sa te yôfue'n, o yô se ye o kwla yi atre ke nga saa? Kpekuun ba bu bé wun nun.

¹⁷ Pharisi fue'm bé usa anyansifue'n ékun ke: ?Ke o tikéé o nyin'n, o bobo a bu i se? O sé ke: O ti Nyanmien nuan idyofue,

¹⁸ Sannge Juif'm ba lafi'a su ke o ti anyansifue ye wa wun aséo, san bé flee i si nin i nin

¹⁹ bé usaa bé. Bé usa bé ke: ?Amun wa'n bo an ken i nde ke bé wu i anyansifue'n i ye? ?O yô se ye wa wun aséo?

²⁰ I si nin i nin bé sé ke: É si ke é wa nion, é wui so.

²¹ Sannge ke o yôli b'o man wa wun asé'n, ya wu'en i wle. Ye swran ng'o tikéé i nyinma'n, é simen. I bobo ye ô leo, o ti'a bakan, anh wuse, oh kanh.

²² Sa ti bo i si nin i nin bé sé so'n, sre kun bé Juif'm bé wun. Afin Juif'm ba dun mmua wun bé wun bé nen a se su ke, swran kwlaa ng'o sé ke Jésus ti Christ'n (*f1*), béh kenh i bô o su wlu'a Nyanmien sua'n nun kun.

²³ I so'n ti ye i si nin i nin bé séé ke: O ti'a bakan, anh wuse nion.

²⁴ Pharisifue'm bé flee anyansifue'n ékun, bé sé i ke: La Nyanmien asé, é si ke bian so'n ti sa te yôfue.

²⁵ O sé bé ke: Se o ti sa te yôfue ô, se o ti'a sa te yôfue ô, n wu'en i wle. Sa kun nga n wun i wle'n yele ke laa n ti anyansifue, sannge sien'n man wun asé.

²⁶ Bé use i ke: ?Nzu ye o yô maan o? ?O yôli o nyinma'n se ye o tikélio?

²⁷ O sé bé ke: Man kan klé amun laa, amuan fa'a su. ?O yô se ye an klô ke n ken i ékuon? ?Amun kusu, an klô ke amunh katyih i sonnzonfue wié?

²⁸ Bé kpee i nzôwa, bé sé i ke: Wo ye a ti bian so'n i sonnzonfue, é lie'n é ti Moïse i sonnzonfue.

²⁹ É si ke Nyanmien kan nde kléé Moïse, sannge bian nga lie'n, é si'e i finwle bobo.

³⁰ O sé bé ke: Ééé, abônuan sa yele nga kannze an sé ke an sié i finwle'n, sannge n lie'n, o tikéé n nyinma'n!

³¹ É si ke se sa te yôfue sé Nyanmien ke yô sa'n, o te'a su, sannge swran ng'o bu i swran bo i nyin yi'n, i sofue'n ye o te i suo.

³² É nian ti'e i lé ke swran kun a tiké swran bo bé wu i nin anyansi'n i nyinma lé.

³³ Se nanh Nyanmien ye o sunmaan bian so'n, wuun o kwla yô'a liké fi.

³⁴ Bé sé i ke: ?O bo ke bé wuu wo'n, sa tete'n ye o ti o dyunman'n, a wa klé é liké? Ye bé keen i bôo.

Bé nga bé wu'an Nyanmien ninngé'm bé wle'n

³⁵ Jésus tii i ke ba i bô. O kô wunniin, nan wa use i ke: ?A lafi i b'o katyii Swran'n i su?

³⁶ O sé ke: Ndya, klé min swran so'n man n lafi i su.

³⁷ Jésus sé i ke: A wunniin, i ye o su kan nde klé o ye'n.

³⁸ O man o sé ke: Nannan, n lafi o su. Ye o kôtô i bô menmeen io.

³⁹ Ye Jésus sé ke: M baa men'n nun swran'm bé nun kpale nan bé nga bé wu'an asé'n bé wun asé, ye bé nga bé wun asé'n, bé katyi anyansifue.

⁴⁰ Ke Pharisifue (*f4*) wié bo bé nin i ô le'n bé tii nde so'n, bé use i ke: ?É kusu é ti anyansifue wié?

⁴¹ Jésus sé bé ke: Se an ti anyansifue'n, wuun bé bu'a amun sa te yôfue, sannge ke amun waan an wun asé'n, o man amun sa te'n kah amun wun.