Jean 8 - Nyanmien nde Ufle

Bla'n b'o kunndee bian i wun bô'n

¹ Ye Jésus kusu oo Olive Ôka'n su loo.

² Ke alie tyennin nglemun kpa'n, o se i sin Nyanmien sua dan'n nun lo ékun. Swran'n kwlaa bé bee i wunle. O traan asé ye o so bé liké kléle'n suo.

³ Mmla kléfue nin Pharisifue'm (*f4*) bé nin bla kun bo bé wuun ke o su kunnde bian i wun bô'n bali,

⁴ bé dyreen swran'm bé afien le, bé sé Jésus ke: Ndya, bla nga é kô tree nin bian, o su kunnde bian i wun bô.

⁵ Moïse klee mmla'n nun ke bla ng'o yô sa ke nga sa'n, é fin i yebue é kuin. ?Ye o kusu, o wannze?

⁶ Bé keen i so ke béh fah se nian nan béh nyanh sa wié dyran su senmen. Sannge Jésus keen i wun asé o fe i sa klekle asie wun.

⁷ Ke bé te use i sa'n, o meen i wun su, o sé bé ke: Amun nun swran ng'o nian yô'a sa te kaan sa lé'n, mon o dun mmua fin i yebue.

⁸ Ye o keen i wun asé o so asie i kleklele'n su ékuon.

⁹ Ke bé tii nde so'n, bé kpenngben mun nga dyaô blele ko, nga dyaô blele ko lélé o fa tôô bé kanngan mun, o kaa Jésus nin bla'n b'o dyin afien le'n.

¹⁰ Ye Jésus meen i wun su o use i ke: ?Mmô, bé ô nin? ?Swran fi a sé'a ke oh kunh o?

¹¹ Ye i waan: Een, Ndya. Ye Jésus sé i ke: N kusu, n sé'a ke bé kun o. Ko, sannge nanh yô so kun].

Jésus séé ke i ye o kpadya men'n nuon

¹² Jésus kan klé bé ékun ke, i ye o kpadya men'n nuon, swran ng'o su i su'n, kpadyale so'n b'o man nguan'n o man oh wunh asé, o su nanti'a aôsin'n nun lé.

¹³ I so'n ti, Pharisifue'm bé sé i ke: A yi o bobo o wun aye, o wun nde nga a kan'n ti'a nanwle.

¹⁴ Jésus sé bé ke: O ti nanwle ke n kan m bobo min wun nde, kannze n ken i so'n, o ti nanwle, afin n si n finwle nin n kowle. Sannge an si'a n finwle nin n kowle.

¹⁵ Amun lie'n, an kan swran wun nde ke klo swran fa yô'n sa, sannge n lie'n, n ka'an swran wun nde.

¹⁶ Se swran nga an wun ke n ken i wun nde'n, wuun o ti nanwle, afin nanh n ngunmin ye n kan nde so nion, sannge swran ng'o sunmaan min'n o dyin n sin.

¹⁷ Bé klee amun mmla'n nun ke, se swran nnyon bé kan nde kun'n o ti nanwle.

¹⁸ N kan m bobo min wun nde, ye n Si b'o sunmaan min'n, i kusu ti n lalôfue.

¹⁹ I so'n ti, bé use i ke: ?O Si'n wô nin? Jésus sé bé ke: An si'a min nin n Si'n. Se an si min'n, wuun an si n Si kusu.

²⁰ Ke Jésus kléh liké Nyanmien sua dan'n nun b'o ô sika guawle'n i wun le'n, ye o kaan nde so nion. Swran fi a tremen, afin i tyen'n nian dyuman.

Lika ng'o ko lo'n bé su kwla ko'a lo wié

²¹ Jésus sé bé ékun ke, o su ko, bé wa kunndee, sannge bé sa te'n kah bé wun béh wuh. Lika ng'o ko lo'n, bé su kwla ko'a lo wié.

²² Juif'm bé usaa ke: ?O wa kun i wun ti ye o sé ke, lika ng'o ko lo'n é su kwla ko'a lo wiéo?

²³ Ye o sé bé ke: An ti asie'n su wafue, n kusu n ti nglô lofue, an ti men nga nun fue, n ti'a men nga nunfue.

²⁴ I so'n ti ye n séé amun ke amun sa te'n kah amun wun, amunh wuh nion, afin se an lafi'a swran wafa nga n ti'n su'n, amun sa te'n kah amun wun amunh wuh.

²⁵ Bé use i ke: ?A ti o lie nzu? O sé bé ke: Swran wafa nga n ti'n, ye n kan kléli amun i bôbôle nun nion.

²⁶ Amun wun nde kpanngban ô le bo n kwla kan n dyran su bu amun fo. Sannge swran ng'o nunmaan min'n ti nanwlefue ti, o man nde ng'o kan kléé min'n, i ye n kaan.

²⁷ Ba wu'en i wle ke i Si nde ye o kan klé béo.

²⁸ I so'n ti, o sé bé ke: Tyen nga an man m bo n katyii Swran'n su su'n, i tyen so'n nun ye amunh sih n wafa nga n ti nion. Ye amunh sih ke m bobo n kpe'a n klun n yô'a liké fi, san nde nga n Si kan klé min'n ye n kaan.

²⁹ Swran ng'o sunmaan min'n, o dyin n sin. Wa dyaô'a n sin, afin n yô i klun sa tyen kwlaa.

³⁰ Nde so'n bo Jésus kannin'n ti, swran kpanngban kpa bé lafii i su.

Nanwle'n ti amunh nyanh amun ti

³¹ Ye o sé Juif nga bé lafi i su'n bé ke: Se an fa min nde nga n kan'n su kpa'n, wuun an ti n sonnzonfue sakpa.

³² Amunh sih nde ng'o ti nanwle'n, ye nde nanwle so'n ti amunh nyanh amunh ti.

³³ Bé sé i ke: É ti Abraham anunman, é nian yô'a swran fi kanga lé. ?O yô se ye man a sé ke, éh nyanh é ti nion?

³⁴ Jésus sé bé ke: Nanwle, se sa te'n ti swran'n, wuun swran kwlaa ng'o yô sa te'n o katyi i kanga.

³⁵ Kanga'n ka'a awlô kun nun titi, sannge diéwa ba'n ka awlô nun le titi.

³⁶ Se Nyanmien Wa'n kpo amun ti'n, amunh nyanh amun ti mlonmlon.

³⁷ N si ke an ti Abraham anunman, sannge an klô ke amunh kunh min, afin an fa'a nde nga n kan'n su.

³⁸ Liké nga n wuin n Si wun lo'n, i nde ye n kaan, ye amun kusu, liké nga amun si lie'n kléé amun'n, ye an yôo.

Amun si yele Satan

³⁹ Bé sé i ke: É si'n yele Abraham Jésus sé bé ke: Se Abraham wa yele amun'n, wuun sa nga Abraham yôô bé'n, amunh yôh wié.

⁴⁰ N kan nde nanwle nga Nyanmien kan kléé min'n klé amun, sannge an klô ke amunh kunh min. Abraham a yô'a sa nga lé.

⁴¹ Liké nga amun si'n yô'n, i wié ye an yôo. Bé sé i ke: Nanh téklé ba yele é. É si ti kunngba tye, é si so'n yele Nyanmien.

⁴² Jésus sé bé ke: Se Nyanmien ti amun Si sakpa'n, wuun amunh klôh n sa, afin n fin Nyanmien wun lo, i dunman nun ye n wô waa. Nanh n tiaun ye m balio, i ye o sunmaan mion.

⁴³ ?Nzu ti ye an wu'an nde nga n kan klé amun'n i wleo? Afin an klô'a ke an tié.

⁴⁴ Amun si'n yele mmusu'm bé si Satan'n, ye an klô ke amunh yôh amun si so'n i klun sa. Ke o fin i bôbôle nun'n, o ti swran kunfue, o di'a nanwle mlonmlon, afin o si'a nanwle'n. O bua atô, afin atô'n ti i nzuen, atô'n ti i dyunman, i ye o ti atô buafue'm bé si nion.

⁴⁵ N lie'n, ke n di nanwle klé amun'n ti, an lafi'a n su.

⁴⁶ ?Amun nun ônin ye o kwla si i wué nun sé ke n yôô sa teo? ?Se n di nanwle'n, nzu ti ye an lafi'a n suo?

⁴⁷ Swran ng'o ti Nyanmien lie'n, o tié nde ng'o kan'n. Ke bo an ti'e i lie'n ti ye nde ng'o kan'n an timan nion.

Jésus nin Abraham

⁴⁸ Juif'm bé sé i ke: ?Ke é sé o ke a ti Samariefue ye liké wié su o su'n, é nde'n ti'a nanwle?

⁴⁹ Jésus sé bé ke: Liké su'a n su, swran ye m bu n Sio, sannge an bu'a n swran.

⁵⁰ N lie'n, m bobo n kunnde'a n dunman, swran kun ye man n nyan dunmaan, i ye oh kpeh é nuon.

⁵¹ Nanwle, swran ng'o fa min nde'n su'n, o wu wa'a mlonmlon.

⁵² Juif'm bé sé i ke: Sien'n, ya wun i wle kpa ke liké wié su o su. Abraham wuli, Nyanmien nuan idyofue'm bé wuli, sannge o li o waan, swran ng'o fo o nde'n su'n, o su wu'a mlonmlon.

⁵³ ?A ti kpa tra é nannan Abraham b'o wuli'n? Nyanmien nuan idyofue'm bé kusu bé wuli. ?O kpa'n, a bu o wun se?

⁵⁴ Jésus sé ke: Se m bobo n dunman ye n kunnde'n, n su nyenmen. N Si bo amun waan o ti amun Nyanmien'n, i ye man n nyan dunmaan.

⁵⁵ Sannge an simen, n lie'n, n sii. Se n sé ke n simen'n, wuun n ti atô buafue ke amun sa. Sannge n sii, ye n fe i nde'n su.

⁵⁶ Ke amun nannan Abraham bu ke oh wunh min tyen'n, o yô i fe dan, o wuun tyen so'n ye i klun dyoli.

⁵⁷ Ye Juif'm bé sé i ke: ?O bo a nian di'a afue ablénun'n, a wuun Abraham?

⁵⁸ Jésus sé bé ke: Nanwle, ke béh wuh Abraham'n, wuun n wô le.

⁵⁹ I so'n ti, bé isaa yebue ke béh fah fiin, sannge o fin Nyanmien sua dan'n nun le fitéé blelele.