Jean 7 - Nyanmien nde Ufle

Jésus niaan'm bo bé lafi'e i su'n

¹ Ke o yôô so'n, i sin Jésus wlanwlan Galilée men'n nun, o klô'a ke o wlanwlan Judée men'n nun kun, afin Juif'm bé kunnde ke béh kuinh lo.

² Ke oh yôh so'n, wuun Juif'm bé akpa'n (*f47*) i tyen dile'n wa mantan.

³ I niaan'm bé sé i ke: Dyaô wa ko Judée mon o sonnzonfue'm bé wun sa nga a yô bé'n bé wié.

⁴ Se swran kun klô ke bé si i sa ng'o yô bé'n, o yô'a bé nvialie nun, o yô bé nzra nun. Se o waan a yô ninngé so'm bé sakpa'n, yô bé nzra nun.

⁵ I niaan'm bé bobo bé lafi'e i su.

⁶ Jésus sé bé ke: N tyen lie'n nian dyuman, sannge amun lie'n, tyen'n kwlaa ti amun tyen kpa.

⁷ Swran'm bé kpo'a amun, sannge n lie'n bé kpo min, afin n séé bé ke bé nyôlie'n ti tete.

⁸ Amun bobo anh wo tyen'n i dile. N lie'n, n su ko'a tyen so'n i bô wié, afin n tyen lie'n nian dyuman.

⁹ Ke o séé bé so'n, o kaa Galilée le.

Sa nga Jésus yôô bé akpa'n i tyen dile nun'n

¹⁰ Ke i niaan'm bé oo tyen so'n i dile'n, i sin i kusu o wa kpuu bé, sannge wa yi'e i wun nglô, o oo nvialie nun.

¹¹ Ke béh dih tyen'n, Juif'm bé kunndee, bé sé ke: ?O ô nin?

¹² Swran kpanngban bé tu i wun aswré, wié'm bé waan: Swran kpaa. Wié'm bé kusu bé waan: Nanh swran kpaa, o ti swran satyifue.

¹³ Sannge Juif'm bé nyrun sre ti, swran fi wa kwla ke'en i nde wéinwéin.

¹⁴ Ke bé bô tyen dile'n bô b'o dyuu i afien'n, Jésus oo Nyanmien sua dan'n nun swran'm bé liké kléle.

¹⁵ O bô Juif'm bé nuan, bé sé ke: ?Bian nga wa sua'an liké'n, o yô se ye o si fluwaa?

¹⁶ Jésus sé bé ke: N liké nga n klé'n, o fi'an m bobo, o fin swran ng'o sunmaan min'n.

¹⁷ Swran ng'o klô ke oh yôh i klun sa'n, oh sih ke liké nga n klé'n o fin i, annze m bobo n kpe n klun ye n kléo.

¹⁸ Swran ng'o kpe i bobo klun ké liké'n, o kunnde i bobo dunman. Sannge swran ng'o kunnde ke swran ng'o sunmenniin'n nyan dunman'n, o ti swran kpa, sa te kaan sa bo'en i wun.

¹⁹ ?Moïse ye o fa mmla'n maan amuon, nenh io? Sannge amun nun wié fi fa'a su. ?Nzu ti ye an klô ke amunh kunh mion?

²⁰ Swran'm bé sé i ke: O kpa'n, liké wié su o su. ?Wan ye o klô ke oh kunh woo?

²¹ Jésus sé bé ke: N yôô sa kun o bô amun kwlaa amun nuan.

²² Moïse ye o kléé amun ke an wla yasua'm bé kleon, sannge nenh i ye o kpee i baa, amun nannan mun ye bé kpelio. Ye an wla swran'm bé klen sabbat b'o ti amun tyen te'n.

²³ ?Se an wla bé klen sabbat tyen nan amuan satyi'a Moïse mmla'n, nzu ti ye swran ti blé wunmuan kun bo n yôé dyuédyué sabbat tyen'n ti, an fa min wun yaa?

²⁴ Nanh an nian swran i wafa ng'o ti'n an fa di nde'n, sannge anh di nde nanwle su.

?Jésus ye o ti Christ nion?

²⁵ Jérusalemfue wié'm bé sé ke: ?Nenh i ye bé waan béh kuinh nion?

²⁶ Nian, i ye o su idyo nzra'n nun ye'n, sannge bé sé'e sa fi! ?É si'm bé wuun i wle kpa ke i ye o ti Christ (*f1*) nion?

²⁷ Bian nga lie'n, é si i finwle, sannge Christ lie'n, se o ba'n, swran fi su si'e i finwle.

²⁸ I so'n ti, ke Jésus kléh liké Nyanmien sua dan'n nun'n, o kpan séé ke: ?An si min, an si min finwle? Nanh m bobo n tiaun ye m balio, sannge swran ng'o sunmaan min'n ti nanwlefue, an simen.

²⁹ M bobo n sii, i wun lo ye n fion, i ye o sunmaan mion.

³⁰ O man bé waan béh treeh, sannge i trale tyen nian dyuman ti, swran fi sa a kenmen.

³¹ Swran so'm bé nun louun kpa bé lafii i su, bé sé ke: ?Se Christ (*f1*) ba'n, oh yih atre tra bian nga lie'n?

Bé sunmaan sôndya mun ke bé kô tra Jésus

³² Pharisifue'm (*f4*) bé ti i wun aswré nga swran'm bé tu'n. O man Nyanmien nyrun dyranfue dandan nin Pharisifue'm bé yii sôndya mun ke bé kô tree.

³³ Jésus sé ke: N te ô amun wun wa kan, o yô kan'n, nh koh swran ng'o sunmaan min'n i sin.

³⁴ An wa kunnde min, an su wu'an min, afin lika nga nh koh lo'n, an su kwla ko'a lo.

³⁵ Juif'm bé usa bé wun ke: ?Nin ye o wa ko bo é su wunmen nion? ?O wa ko Juif'm bo ba sanndi ba kô tran Grec'm bé nun'n bé sin, nan oh kléh Grec'm bé liké?

³⁶ ?Ke o sé ke, é wa kunndee, é su wunmen, ye lika nga oh koh lo'n, é su kwla ko'a lo wié'n, i bô yele ônin?

Nzué ba bo bé nun nzué'n man nguan'n

³⁷ Bé tyen dile'n i tyen kasien b'o ti bé tyen'n i dan'n, Jésus dyin bé afien le, o kpan séé ke: Swran kwlaa nga nzué wé kuin'n, o bla n sin o wa non.

³⁸ Swran ng'o lafi n su'n i awlen'n wa katyi ke nzué ti sa, i nun ye nzué ba bo bé nun nzué'n man nguan'n, béh fionh. Afin é kenngen i so Nyanmien Nde nga bé kleli'n nun.

³⁹ Sa ti b'o séé so'n yele Nyanmien Wawe'n bo bé nga bé wa lafi i su'n béh nyenh'n. Ke oh yôh so'n, wuun Nyanmien nian fe'e i Wawe'n nian manman, afin o nian yi'a Jésus i wafa ng'o ti'n i nglô.

Jésus ti swran'm bé buu bé wun nun

⁴⁰ Ke swran so'm bé nun wié'm bé tii nde so'n, bé sé ke: Bian nga ye o ti Nyanmien nuan idyofue sakpa nion.

⁴¹ Wié'm bé kusu bé waan: Bian nga ye o ti Christ (*f1*) nion. Ye wié'm bé usa ke: ?Ai, Galilée ye Christ'n fion?

⁴² ?Ba kle'e Nyanmien Nde nga bé kleli'n nun ke, Christ'n fin David ôsu'n nun Bethléhem David klo lo?

⁴³ I so'n ti, swran'm bé bubuu bé wun nun.

⁴⁴ Bé wié'm bé waan béh treh, sannge swran fi sa a kenmen.

Juif kpenngben'm bo bé lafi'a Jésus su'n

⁴⁵ Ke sôndya'm bé saa bé sin Nyanmien nyrun dyranfue dandan nin Pharisifue'm bé wun lo'n, bé usa bé ke: ?O yô se ye amuan tre'e i a bamaan?

⁴⁶ Ye sôndya'm bé sé ke: Swran fi nian ka'an nde ke bian nga sa lé.

⁴⁷ Pharisifue'm bé usa bé ke: ?Amun kusu, amun man wa laka amun wié?

⁴⁸ ?É kpenngben nin Pharisifue'm bé nun wié a lafi i su?

⁴⁹ Swran nga'm bé lie'n, bé si'a mmla'n, o man Nyanmien a bô bé sannzan!

⁵⁰ Nicodème b'o lé kun o oo Jésus wun lo'n, o ti Pharisifue so'm bé nun kun, o sé bé ke:

⁵¹ É mmla'n nun swran nga bé nian ti'e i nuan nun nde bo bé nian wu'an sa ng'o yôli'n, bé bu'e i fo.

⁵² Bé sé i ke: ?O kusu, a ti Galiléefue? Kanngan Nyanmien Nde nga bé kleli'n nian, ah wunh ke Nyanmien nuan idyofue fi fi'an Galilée.

⁵³ [Ke o yôô so'n, nga dyaô ko i awlô, nga dyaô ko i awlô.