Jean 6 - Nyanmien nde Ufle

Swran akpi-nnun bo Jésus maan bé liké bé dili'n

¹ Ke o yôô so'n, Jésus oo Galilée fete'n bo bé flee Tibériade fete'n i bué kun lo.

² Swran kpanngban kpa bé suu i su, yele ke bé wun tukpatyefue'm b'o yôô bé dyuédyué atre nun'n.

³ Jésus fuu kpole kun su nan o nin i sonnzonfue'm ba tran asé le.

⁴ Ke oh yôh so'n, wuun Pâque (*f17*) b'o ti Juif'm bé tyen'n wa mantan.

⁵ Jésus meen i ti su, o wuun swran kpanngban kpa bé su bé i wun le, ye o usa Philippe ke: ?Nin ye éh nyanh liké é tô man minnien nga mun bé dio?

⁶ O ken i so ke o fa ken nian, atin i bobo si liké ng'o wa yô'n.

⁷ Philippe sé i ke: Se é fa denier (*f10*) ya nnyon tô kpaun é kpekpe nun bo kannganngan'n, o su dyu'a bé ngba.

⁸ André, Simon Pierre i niaan bian b'o ti i sonnzonfue kun'n, o sé i ke:

⁹ Gbanflen kaan kun ô wa, o le orge (*f28*) kpaun nnun nin dyué nnyon. ?Sannge swran wlawla nga, o dyu bé nin?

¹⁰ Jésus sé ke: Anh sé bé man bé kwlaa bé gua asé. Idyré kpanngban ô lika so'n nun le, nan ba gua asé. Bé nun yasua kaklaakla'm bé dyu akpi-nnun.

¹¹ Jésus faa kpaun'n, ke o laa Nyanmien asé'n, o fa tyetyee bé. O fa dyué ng'o dyu bé'n tyetyee bé so ékun.

¹² Ke bé ku yili'n, o sé i sonnzonfue'm bé ke, bé ise i sinsin b'o ka le'n nan i wié fi a mlinman.

¹³ Bé isaa orge kpaun nnun bo bé dili'n i ônga'n gbôgbô blu-nin-nnyon.

¹⁴ Ke swran'm bé wuun atre so'n bo Jésus yili'n, bé sé ke: Nanwle, bian nga ye o ti Nyanmien nuan idyofue bo bé keen i nde ke oh bah men'n nun wa nion.

¹⁵ Ke Jésus wuun ke bé su wa tre siéé famien'n, i ngunmin se i sin oo kpole'n su lo ékun.

Jésus i nzué'n su nantile

¹⁶ Ke alie dyoli'n, i sonnzonfue'm bé oo fete'n nuan lo,

¹⁷ bé fuu alié kun nun bé klé bé ti Capernaüm bué lie'n su fete'n bué kun lo. Ke oh yôh so'n, wuun lika'n wa dun, Jésus kusu nian tô'a bé lo.

¹⁸ Aunngban'n kpee kéklé kpa, o man nzué'n kédyé dan.

¹⁹ Ke bé oli bé dyuu kilo nnun annze nsien, bo bé wun ke Jésus su nanti nzué'n su ba alié'n wun le'n, sre kuun bé.

²⁰ Ye Jésus sé bé ke: Mion, nanh sre kun amun!

²¹ O man bé klun dyoli nan ba fe, kpekuun alié'n wa si, ba dyu kan bé ko'n.

Swran'm bé kunndee Jésus

²² Ke alie tyennin'n, swran wlawla nga bé kaa nzué'n sin lo'n, bé wla kpen su ke alié kunngba tye ye o ô nzué'n nuan leo. Jésus kusu wa fu'e i sonnzonfue'm bé sin, bé ngunmin ye bé olio.

²³ Sannge alié wié'm bé fin Tibériade bé dyuu kan é Min'n la Nyanmien asé bo bé dii kpaun le'n.

²⁴ Ke swran so'm bé wuun ke Jésus nin i sonnzonfue'm bé nu'an le'n, bé fu alié so'm bé nun bé oo Capernaüm Jésus kunndele.

Jésus ti alie b'o man nguan

²⁵ Bé kô tôé fete'n bué kun lo, bé use i ke: ?Baba, tyen ônin ye a baa waa?

²⁶ Jésus sé bé ke: Nanwle, sa ti bo an kunnde min'n, nanh atre bo an wunnin bé'n tio, sannge liké bo an dili bo amun ku yili'n tio.

²⁷ Nanh an di dyunman alie b'o satyi'n ti, sannge anh di dyunman alie ng'o satyiman b'o man swran nyan anannganman nguan'n ti. Alie so'n, m bo n katyii Swran'n min ye nh fah man amuon, afin min ye n ti swran bo é Si Nyanmien klé wéiin ke o dyin n sion.

²⁸ Bé use i ke: ?Nzu ye é yô nan ya kwla yô liké ng'o ti Nyanmien klun suo?

²⁹ Jésus sé bé ke: Liké nga Nyanmien klô ke an yô'n, i waan anh lafi swran b'o sunmenniin'n su.

³⁰ O man bé usee i ékun ke: ?Atre ônin ye ah yih klé é bo éh wuinh nan ya lafi o suo? ?Nzu liké ye a wa yôo?

³¹ É nannan'm bé dii manne (*f29*) blô lo, afin bé klee ke: «O maan bé nyanmien su lo kpaun ke bé di.»

³² Jésus sé bé ke: Nanwle, nanh Moïse ye o fa nyanmien su lo kpaun'n maan amuon, sannge n Si ye o fa kpaun kpa b'o fin nyanmien su lo'n man amuon.

³³ Afin Nyanmien kpaun'n yele swran ng'o fin nyanmien su lo b'o man menfue'm bé nyan nguan'n.

³⁴ Bé sé i ke: Nannan, man é kpaun so'n tititi.

³⁵ Jésus sé bé ke: M bobo n ti kpaun b'o man nguan. Swran ng'o ba n sin'n, awé su ku'en lé, ye swran ng'o lafi n su'n, nzué wé su ku'en kun.

³⁶ N kan kléé amun ke, an wunnin min, sannge o nin i so'n ngba, an lafi'a n su.

³⁷ Swran kwlaa nga n Si fa bé man min'n béh bah n sin, o man swran ng'o ba n sin'n, n su fuenmen,

³⁸ afin n fin nyanmien su lo bali, man ba'a m bobo n klun sa yôle, sannge swran ng'o sunmaan min'n, i klun sa ye n yôo.

³⁹ Anh nian, swran ng'o sunmaan min'n, i liké nga i waan n yô'n ye, i waan swran kwlaa ng'o fa bé maan min'n, nanh m mlin bé nun kun sa, sannge n tyen bé men'n i awiélie.

⁴⁰ Anh nian, liké nga n Si waan swran'm bé yô'n ye, swran kwlaa ng'o wun i Wa'n b'o lafi i su'n, oh nyanh anannganman nguan, ye nh tyeenh men'n i awiélie.

⁴¹ Ke o sé bé ke o ti kpaun b'o fin nyanmien su lo dyrali'n ti, Juif'm bé keen i wun nde

⁴² sé ke: ?Nanh Jésus bo é si i si Joseph nin i nin nion? ?O yô se ye i waan o fin nyanmien su ye o balio?

⁴³ Jésus sé bé ke: Anh yatyi amun kônviabô idyole'n.

⁴⁴ Swran fi kwla ba'a n sin, san bé nga n Si b'o sunmaan min'n o man bé ba n sin'n, bé ye nh tyenh bé men'n i awiélieo.

⁴⁵ Nyanmien nuan idyofue'm bé klee ke: «Nyanmien wa klé bé kwlaa bé liké.» Swran kwla ng'o ti n Si nde'n b'o fa su'n, oh bah n sin.

⁴⁶ Nanh ke swran wié a wun n Si lé tio, san swran nga Nyanmien sunmenniin'n, i ye wa wun i léo.

⁴⁷ Nanwle, swran ng'o lafi n su'n, o le anannganman nguan.

⁴⁸ M bobo n ti kpaun b'o man nguan.

⁴⁹ Amun nannan'm bé dii manne (*f29*) blô lo, bé wuli.

⁵⁰ Sannge kpaun ng'o fin nyanmien su lo'n, se swran di'n, o su wuman.

⁵¹ M bobo n ti kpaun b'o man nguan, n fin nyanmien su lo ye m balio. Swran ng'o di kpaun so'n wié'n, o su wu'a mlonmlon, min nnen'n ye o ti kpaun so'n bo nh fah man nion. Nh fah man so nan menmenfue'm béh nyanh nguan.

⁵² I so'n ti, akplôwa too Juif'm bé afien, bé sé ke: ?O yô se ye i li waan o kwla fe i wun man é bo é dio?

⁵³ Jésus sé bé ke: Nanwle, se amun di'a m bo n katyii Swran'n min nnen'n, ye se an no'an min mmôdya'n, an su nya'an nguan.

⁵⁴ Swran ng'o di min nnen'n b'o non min mmôdya'n, o le anannganman nguan, ye nh tyeenh men'n i awiélie,

⁵⁵ afin min nnen'n ti alie kpa ye min mmôdya'n ti liké kpa bo bé non.

⁵⁶ Swran ng'o di min nnen'n b'o non min mmôdya'n, min nin i ya katyi swran wunmuan, é su ti'a nun.

⁵⁷ Ke n Si b'o ti anannganman'n sunmaan min'n, bo i ti ye n wô le'n, swran nga kusu b'o di min nnen'n, n ti oh tranh le.

⁵⁸ Kpaun ng'o fin nyanmien su lo'n ye, o ti'a ke nga amun nannan'm bé dili bo bé wuli'n sa. Swran ng'o di kpaun so'n, o su wu'a mlonmlon.

⁵⁹ Nde nga ke Jésus kléh liké Capernaüm lo Nyanmien sua'n nun'n o kannin'n ye.

Anannganman nguan'n i nde

⁶⁰ Ke bé tii nde so'n, i sonnzonfue'm bé nun kpanngban bé sé ke: Nde nga ti kéklé. ?Wan ye o kwla fa suo?

⁶¹ Ke Jésus si ke nde so'n ti i sonnzonfue'm bé su idyo bé kônviabô'n, o usaa bé ke: ?Nde so'n bô amun wla?

⁶² ?Se an wun ke m bo n katyii Swran'n n su fu kan n wô lo laa'n, amunh yôh amun wun se?

⁶³ Nyanmien Wawe'n ye o man nguan nion, bé wunnen'n kwla yô'a liké fi. Nde nga n kan kléé amun'n ti Nyanmien Wawe'n lie, bé man nguan.

⁶⁴ Sannge swran wié'm bé ô amun nun bo bé lafi'a su. Afin ke o fin i bôbôle nun'n, Jésus si bé nga bé su lafi'e i su'n nin swran ng'oh feh man swran mun'n.

⁶⁵ Ye o sé ke: I so'n ti ye n séé amun ke, swran nga n Si a me'en i atin ke o bla n sin'n, o kwlaa baman nion.

⁶⁶ Ke o fin le'n, i sonnzonfue'm bé nun kpanngban bé tii bé wun ba su'e i su kun.

⁶⁷ I so'n ti, Jésus usee i sonnzonfue blu-nin-nnyon'n bé ke: ?Amun li, an ko'a wié?

⁶⁸ Ye Simon Pierre sé i ke: ?Wan sin ye é koo? O nde'n ye man é nyan anannganman nguaan.

⁶⁹ É lafi su ye é si ke a ti Nyanmien i Swran.

⁷⁰ Jésus usa bé ke: ?Amun swran blu-nin-nnyon'n, nanh min ye n faa amuon? Sannge o nin i so'n ngba, ke min ye n faa amun'n, amun nun kun ti mmusu'm bé si Satan'n i swran.

⁷¹ Simon Iscariot i wa Judas b'o ti i sonnzonfue blu-nin-nnyon'n bé nun kun b'oh feh man swran mun'n i nde ye o kaan.