Jean 3 - Nyanmien nde Ufle

Jésus nin Nicodème bé yale kôkôle

^1-2 Bian kun ô le lé kun kongue o oo Jésus wun lo. Bé fle bian so'n Nicodème, o ti Pharisifue'm (*f4*) bé nun kun, Juif'm bé kpenngben'n kuon. O sé Jésus ke: Baba, é si ke a ti ninngé kléfue kun bo Nyanmien ye o sunmaan woo, afin swran nga Nyanmien dyi'en i sin'n, o kwla yi'a atre nga a yi bé'n bé wié.

³ Jésus sé i ke: Nanwle, swran nga ba wu'e ékun'n, o su kwla yô'a men nga Nyanmien sié'n i nunfue mlonmlon.

⁴ Nicodème kusu sé i ke: ?Se swran kun yô kpenngben'n oh yôh se ye béh kwlah wui ékuon? ?O kwla se i sin i nin klun nan ba wui ékun?

⁵ Ye Jésus sé i ke: Nanwle, se swran i awulie'n fi'an nzué nin Nyanmien Wawe'n, o su kwla yô'a men nga Nyanmien sié'n i nunfue.

⁶ Swran nga klo swran wui'n, o ti klo swran, ye nga Nyanmien Wawe'n wui'n, o ti i lie.

⁷ Ke n séé o ke: San béh wuh amun ékun'n, nenh i so'n bô o nuan.

⁸ Aunngban'n fita kan o klô'n, a ti i ngan, sannge a si'e i finwle nin i kowle. Swran kwlaa nga Nyanmien Wawe'n wui'n, ke o ti soo.

⁹ Ye Nicodème use i ke: ?Oh yôh se ye sa so'n kwlah yôo?

¹⁰ Jésus sé i ke: ?O bo a ti Israëlfue'm bé ninngé kléfue dan'n, a wu'an sa nga wle?

¹¹ Nanwle, sa nga é sii'n nin nga é wunniin'n, ye é ken i nde klé amuon, sannge an fa'a é nde'n su.

¹² ?Ke bo n kan sa ng'o yô asie'n su wa'n bé nde klé amun bo an lafi'a su'n, se n kan sa ng'o yô nyanmien su lo'n bé nde klé amun'n, oh yôh se ye amunh lafih suo?

¹³ Swran fi nian wo'a nyanmien su lo lé, san m bo n katyii Swran'n bo n fin lo bali'n.

¹⁴ Ke Moïse siéé wuô kun nglô blô le'n, i kunngba'n, san béh man m bo n katyii Swran'n n su so

¹⁵ nan swran kwlaa ng'o lafi n su'n, oh nyanh anannganman nguan.

¹⁶ Afin Nyanmien klôô men'n lélé o fe i Wa kunngba tye'n mannin nan swran kwlaa ng'o lafi i su'n, wa mlinman, sannge o nyan anannganman nguan.

¹⁷ Afin Nyanmien wa sunme'en i Wa'n men'n nun ke o wa di dyole, sannge o sunmeen ke o bla nan menfue'm bé nyan bé ti.

¹⁸ Swran ng'o lafi i su'n bé bu'e i fo, sannge swran nga wa lafi'e i su'n, Nyanmien a dun mmua bu i fo, afin wa lafi'e i a kunngba tye'n su.

¹⁹ Anh nian sa ti ye o bu bé fo so'n ye, i b'o ti ke wia'n sa'n, o baa men'n nun, sannge swran'm bé klô aôsin'n tra wia'n bé nzuen tete'n ti.

²⁰ Swran kwlaa ng'o ti sa te yôfue'n, o klô'a a wia'n mlonmlon, o fité'a wéiin nun, afin o klô'a ke bé wun i nyôlie tete'n.

²¹ Sannge swran ng'o yô sa kpa'n, o fité wéiin nun nan bé wun ke sa ng'o yô'n ti Nyanmien klun su.

Jean baptême yôfue'n i Jésus nde kanle ékun

²² Ke o yôô so'n, Jésus nin i sonnzonfue'm bé oo Judée men'n nun, bé traan lo, o yô swran'm bé baptême.

²³ Jean kusu yô swran'm bé baptême lika bo bé fle i Énon b'o mantan Salim lo'n nun, afin nzué'n soon le. Swran'm bé be i wun le ke o yô bé baptême.

²⁴ Ke oh yôh so'n, wuun bé nian wla'a Jean bisua.

²⁵ Akplôwa kun too Jean sonnzonfue'm bé nun wié bé nin Juif'm kun bé afien wunnzinle wafa nga swran'm bé wunnzin'n su.

²⁶ Bé oo Jean wun lo bé kô sé i ke: Baba, nian bian'n b'o nin wo ô Jourdain'n sin lo'n, bo a ken i nde'n, o su yô swran'm bé baptême, bé kwlaa ba wié i sin ko.

²⁷ Jean sé bé ke: Liké nga Nyanmien a ma'an swran kun'n, o nyenmen.

²⁸ Se amun waan amunh dih i nanwle'n, amunh dih, n séli amun ke, nanh min ye n ti Christ (*f1*) nion, sannge Nyanmien sunmaan n ke n dun mmua i nyrun.

²⁹ Atonvle bla'n ti bian b'o su fa atonvle'n i lie, sannge bian'n i dyanvue'n b'o dyin le o tié nde ng'o kan'n, ke o ti i nen'n, i klun dyo dan, n kusu ke n klun lie'n wa dyo dan soo.

³⁰ Man i dunman lie'n fu, man n lie'n kan asé.

Swran ng'o fin nyanmien su lo'n

³¹ Swran ng'o fin nglô lo'n, ye o sié liké'n kwlaaa, swran ng'o fin asie'n su wa'n, o ti asie'n su wafue, ye o kan asie'n su wa ninngé'm bé nde. Swran ng'o fin nyanmien su lo'n, ye o sié liké'n kwlaaa,

³² o kan liké ng'o wunniin b'o tili'n bé nde, sannge swran fi fe'e i nde'n su.

³³ Swran ng'o fe i nde'n su'n, o si wéiin ke Nyanmien ti nanwlefue,

³⁴ afin swran nga Nyanmien sunmenniin'n, Nyanmien nde'n ye o kaan, i Wawe'n b'o fa men b'o nie'en i sin'n ti.

³⁵ É Si Nyanmien klô i Wa'n, ye o fa liké'n kwlaa wlee i sa nun.

³⁶ Swran ng'o lafi i Wa'n su'n, o le anannganman nguan, sannge swran nga i nyin yimen'n o nya'an nguan lé, sannge i wun ya ô Nyanmien klun.