Jean 21 - Nyanmien nde Ufle

Jésus yi i wun kléé i sonnzonfue nsô

¹ Ke o yôô so'n, i sin Jésus fe i wun kléé i sonnzonfue mun ékun Tibériade fete'n nuan lo. Anh nian i wun wafa ng'o yi kléé bé'n ye.

² Simon Pierre, nin Thomas bo bé flee Nda'n, nin Nathanaël b'o fin Cana Galilée men'n nun'n, nin Zébédée mma mun ye Jésus sonnzonfue nnyon ékun bé ô lika kun.

³ Simon Pierre sé bé ke, o su ko lala guale. Bé sé i ke: É nin o éh koh. Bé fité bé kô fuu alie'n nun oli, sannge ba nya'an liké fi kongue so'n.

⁴ Ke alie'n wa tyen'n, Jésus ô nzué'n i nuan'n su le, sannge i sonnzonfue'm bé si'a ke io.

⁵ Jésus usaa bé ke: ?Gbanflen mun amuan nya'an dyué'n wié? Bé waan, Een.

⁶ O sé bé ke: Anh gua lala'n alié'n i fama su, amunh nyanh wié. Bé guali, kpekuun dyué'n i kpanngban'n ti bé kwle'e i tyuen kun.

⁷ Ye sonnzonfue nga Jésus klôé'n o sé Pierre ke: É Min nion! Ke Simon Pierre tii ke é Min'n, o fe i trale'n bleblee i bô, afin i wun ti kplen, nan wa to nzué'n nun.

⁸ I sonnzonfue nga'm bé nin alié'n ye bé baa. Bé tyuen lala'n, dyué son nun kpa ye bé baa, afin bé nin tyéndyé'n mantan, o dyu mètre ya.

⁹ Ke bé dyrali'n, béh niaanh… sin ye, dyué ô su ye kpaun ô le.

¹⁰ Jésus sé bé ke: Anh fa dyué'n bo an fin i trale'n wié bla.

¹¹ Simon Pierre fuu alié'n nun, o yi lala'n gue i asé, dyué dandan ya-ablénun-nin-nsan ô nun, o nin i sonle so'n ngba, lala'n wa timan.

¹² Jésus sé bé ke: Anh bla'a di liké. Sannge i sonnzonfue'm bé nun kun sa a tre'e i awlen a use'e i ke: ?O waan? afin bé ngba bé si ke bé Min nion.

¹³ Jésus wunngé le o fa kpaun'n nin dyué'n maan.

¹⁴ Ke Jésus tyennin'n, i kpe nsan su b'o fe i wun klé i sonnzonfue mun'n ye.

Jésus nin Pierre

¹⁵ Ke bé wiéé liké'n di'n, Jésus usa Simon Pierre ke: ?Jean wa Simon, a klô min tra bé nga mun? O sé i ke: Een. Nannan, a si ke n klô o. Ye Jésus sé i ke: Nian m bua mma'm bé lika!

¹⁶ O use i ékun ke: ?Jean wa Simon, a klô min? Pierre sé i ke: Een. Nannan, a si ke n klô o. Jésus sé i ke: Nian m bua'm bé lika.

¹⁷ O use i kpe kun ékun ke: ?Jean wa Simon, a klô min? I kpe nsan su lie'n b'o uselii'n, o yôli Pierre ya ye o sé ke: Nannan, a si sa'n kwlaa, a si ke n klô o. Jésus sé i ke: Nian m bua'm bé lika.

¹⁸ Nanwle, ke a te yô gbanflen'n, o bobo a fo o kplô'n tyi o bô, a ko lika nga a klô'n, sannge ke a kô yô kpenngben'n, ah tinngeh o sa'n swran wié ye oh foh o kplô'n tyi o bôo, oh foh o ko lika nga a klôman'n.

¹⁹ O keen i so ke o fa klé wule nga Pierre wa wu b'o man Nyanmien nyanh komin'n. Ke i nuan toli'n, o sé i ke: Su n su.

Jésus nin i sonnzonfue ng'o klôé kpa'n

²⁰ Pierre kpe i nyin o wuun Jésus sonnzonfue ng'o klôé kpa'n bo ke béh dih liké'n o kisa Jésus wué nun, o usee i ke: ?Nannan, wan ye oh foh o man swran mun'n?

²¹ Ke Pierre wunniin'n, o use Jésus ke: ?Nannan, ye nga li?

²² Ye Jésus sé i ke: ?Se n klô ke o tran le lélé mon o fa dyu m bale'n, o nde ô nun? O li, su n su.

²³ O man nde so'n truu é niaan'm bé nun ke i waan i sonnzonfue so'n su wuman. Sannge Jésus a sé'a Pierre ke o su wuman, i waan, se o klô ke o tran le mon o fa dyu i bale'n, i nde nu'an nun.

²⁴ I sonnzonfue kunngba so'n ye o kan liké so'm bé nde ye o klee béo. O man é si ke nde ng'o kannin'n ti nanwle.

²⁵ Jésus yôô liké wié mun ékun kpanngban kpa, bo m bu i ke, se bé waan béh kleh bé kunngunngun'n, i so fluwa'm bé su so'an men'n nun.