Jean 20 - Nyanmien nde Ufle

Jésus i tyenle

¹ Monnen'n b'o ti lé motyue'n i tyen ba klikli'n, Marie b'o fin Magdala'n woo ndia'n su lo nglemun nde kpa ke lika'n nian titiman'n, o wuun ke ba yi yebue'n b'o ô ndia'n i anuan'n nun'n.

² O wanndi kô tôô Simon Pierre nin Jésus sonnzonfue nga Jésus klôé kpa'n, o sé bé ke: Ba yi é Min'n i fuen'n ndia'n nun, é si'a lika nga bé yilii'n.

³ Ke Pierre nin Jésus sonnzonfue so'n béh fitéh ko ndia'n su lo'n, bé nnyon'n bé wanndi,

⁴ sannge kun'n wanndi kpa tra Pierre, o dun mmua dyuu ndia'n su lo.

⁵ O kpe i nyin asé o wuun tannin tanmué'm bo bé gua le'n, sannge wa wlu'a lo.

⁶ Simon Pierre b'o ka sien'n o dyu le, o wlu ndia'n nun, o wuun tanmué'm bo bé gua le'n,

⁷ nin tannin nga bé fa kataa Jésus ti'n, ba bubu nun o gue i ngunmin.

⁸ Ye Jésus sonnzonfue ng'o dun mmua dyuu ndia'n su le'n, i kusu wluu loo. Ke o wunniin'n, o lafi su ke Jésus a tyen,

⁹ afin bé nian wu'an Nyanmien Nde nga bé klelii ke, san Jésus tyenh'n i wle.

¹⁰ Ye bé saa bé sin bé oo bé awlôo.

Jésus yi i wun kléé Marie b'o fin Magdala'n

¹¹ Sannge Marie dyin ndia'n i anuan'n nun le, o sun. Ke oh sunh'n, o kpe i nyin asé niaan ndia'n nun lo.

¹² Oh niaanh… ange nnyon ye, tannin ufué ô bé wun! Bé ti kan Jésus fuen'n laa le'n, kun ti i ti lika lo ye kun ti i dya ngua lo.

¹³ Ye bé usee i ke: ?Mmô, nzu ti ye a suon? O sé bé ke: Ba fa min Min'n i fuen'n, n si'a lika nga bé yilii'n.

¹⁴ Ke o kaan so b'oh kpeh i nyin'n, oh niaanh… swran ye o dyin'n, sannge wa wu'en i wle ke Jésus-o.

¹⁵ Ye Jésus use i ke: ?Mmô, nzu ti ye a suon? ?A kunnde wan? O bu i ke fiéfue nion, o sé i ke: Ndya, se wo ye a lafi'n, klé min lika nga a kô yilii'n man n kô fa.

¹⁶ Jésus sé i ke: Marie! O kpee i nyin o sé i hébreu nun ke: Rabbouni. Rabbouni'n ti dunman bo bé fa fle bé ninngé kléfue mun.

¹⁷ Ye Jésus sé i ke: Nanh kan min, afin n nian fu'a n Si wun lo ka. Sannge ko n niaan'm bé sin kô sé bé ke, nh fuh ko min nin amun é Si'n b'o ti min nin amun é Nyanmien'n i wun lo.

¹⁸ Marie b'o fin Magdala'n o wa kan klé Jésus sonnzonfue'm bé ke o wuun é Min'n, ye o kan nde ng'o kan klélii'n kléé béo.

Jésus yi i wun kléé i sonnzonfue mun

¹⁹ Lé kunngba so'n i nnosua nun, Juif'm bé wun sre ti i sonnzonfue'm bé nyiin bé sin anuan. Sa so'n yôli monnen'n b'o ti lé motyue'n i tyen ba klikli'n. Jésus wluu lo o dyran bé afien le, o sé bé ke: Anh gua amun wla asé!

²⁰ Ke o kaan so'n, o fe i sa'n nin i nven nun'n kléé bé. Ke é Min'n i sonnzonfue'm bé wunniin'n, bé klun dyoli.

²¹ Ye o sé bé ékun ke: Anh gua amun wla asé! Ke n Si fa sunmaan min'n, n kusu nh fah sunman amun so.

²² Ke o kaan nde so'n, o fitaa bé su nan wa sé bé ke: Anh so Nyanmien Wawe'n nun.

²³ Bé nga an yatyi bé wun sa'n tye bé'n, Nyanmien yatyih tye bé, ye bé nga an yatyi'a bé wun sa'n tye'a bé'n, bé wun sa lie'n kah bé wun.

Jésus nin Thomas

²⁴ Ke Jésus beh i sonnzonfue'm bé wun le'n, wuun Thomas bo bé flee Nda'n b'o ti bé blu-nin-nnyon'n bé nun kun'n, o nu'an le wié.

²⁵ I so'n ti, bé nga'm bé séé i ke: Ya wun é Min'n. Sannge o sé bé ke: Se man wu'en i sa klun kpengbe ôsu'n, se man fa'a n sama a wla'a kpengbe ôsu so'n nun'n, ye se man fa'a n sa a wle'e i nven nun lie'n i ôsu nun'n, n fe'e mlonmlon.

²⁶ Ke o dii lé motyue'n, Jésus sonnzonfue'm bé ô sua lo ékun, Thomas nin bé ye bé ô leo, ba nyin bé sin anuan, sannge Jésus wluu lo o dyran bé afien le, o sé bé ke: Anh gua amun wla asé!

²⁷ Ye o sé Thomas ke: Fo o sama'n bla, nian n sa'n, fo o sa'n bla wa ékun fa wla n nven nun lie'n i ôsu'n nun, nanh yô swran b'o lafi'a sa suo, sannge lafi su!

²⁸ Ye Thomas sé i ke: Min Min Nyanmien Kpli!

²⁹ Ye Jésus sé i ke: A wun min'n ti ye a lafi suo, sannge bé nga ba wu'an min bo bé lafii su'n, bé lie su ti yé!

Sa nga ti ye bé klee fluwa nga'n

³⁰ Jésus yii atre kpanngban kpa ékun i sonnzonfue'm bé nyrun bo ba kle'a bé fluwa nga nun.

³¹ Sannge ke o yô nan amuan lafi su ke Jésus ti Christ Nyanmien Wa'n, i ti ye bé kleli ngaa, ye se an lafi su'n, i ti amunh nyanh nguan.