Jean 19 - Nyanmien nde Ufle

¹ Ye Pilate man bé fa Jésus bé kô bôô io.

² Sôndya'm bé woo ôwié ke sika klé sa, bé fa wle i ti, ye bé wle i wun trale dan kun bo i nyin'n ti ke ba wle kôndrô bui nun sa.

³ I sin bé wunngé i wun le bé sé ke: Juif'm bé famien, Nyanmien man a tye ô! Ye bé kpatyii i nyin nuon.

⁴ Pilate fité ékun o wa sé Juif'm bé ke: Anh nian, m ma fe ble amun guasu wa nan an wun ke man wu'en i wun nde kun bo n dyran su fa bu i foo.

⁵ O man ke Jésus fitéh'n, ôwié klé b'o ti ke sika klé sa'n wô i ti, ye trale dan bo i nyin'n ti ke ba wle kôndrô bui nun sa'n, o wle i wun. Ye Pilate sé bé ke: Anh nian, amun swran'n ye!

⁶ Ke Nyanmien nyrun dyranfue dandan nin sôndya'm bé wunniin'n, bé kpan sé ke: Bôbôé waka'n su! Bôbôé waka'n su! Pilate sé bé ke: An bobo anh fe kô bôbôé, afin n lie'n, n wu'en i wun nde kun nga n dyran su fa bu i fo'n,

⁷ Juif'm bé sé i ke: É le mmla kun bo bé klee ke, swran ng'o yô soo, bé kuin, afin o yô i wun ke o ti Nyanmien Wa.

⁸ Ke Pilate tii nde so'n sre kunniin tra su.

⁹ O wlu i awlô lo ékun, o usa Jésus ke: ?A fin é se? Sannge wa te'e i su.

¹⁰ O man Pilate sé i ke: ?Min ye n wuso o saa a te'a n su nion? ?A si'a ke m man bé kwla yatyi o nun, ye m man bé kwla kun wo?

¹¹ Jésus sé i ke: Se Nyanmien a ma'an o atin'n, a kwla yô'a n sa fi. I so'n ti, swran ng'o fa min maan wo'n, i fo'n b'o dili'n i dan tro o lie'n.

¹² Ke o fin i le'n, Pilate kunnde ke oh yatyih i nun, sannge Juif'm bé kpan sé ke: Se a yatyi bian nga nun'n, wuun nanh César dyanvue yele o. Swran kwlaa ng'o yô i wun famien'n, wuun wa dyaô César wun.

¹³ Ke Pilate tii nde so'n, o fa Jésus fité guasu lo, nan wa tran asé dyole diwle lo lika'n bo bé flee Yebue Wama'n bo hébreu nun bé flee Gabbatha'n su.

¹⁴ Tyen so'n ti tyen bo Juif'm bé buabua bé wun ke bé di Pâque'n (*f17*), wuun wia'n su wa dyran. O sé Juif'm bé ke: Amun famien'n ye!

¹⁵ Sannge bé kpan sé ke: Bé kuin! Bôbôé waka'n su! Pilate usa bé ke: ?M bôbô amun famien'n? Nyanmien nyrun dyranfue dandan'm bé sé ke: É le'a famien ufle fi san César kunngba tye.

¹⁶ Nan wa fe i a man bé ke bé kô bôbôé, ye bé nin i olio.

Jésus i waka'n su bôbôle

¹⁷ Jésus sue i waka'n klo'n nun le o fa oo lika bo bé flee Ti Kônglôman'n nun lo, lika so'n hébreu nun bé flee Golgotha.

¹⁸ Le ye bé bôbôli Jésus nin swran nnyon nion, kun ô wa, kun ô wa, o ô bé afien.

¹⁹ Pilate kle nde wié siéé waka'n su, o kle i ke: Jésus Nazarethfue'n b'o ti Juif'm bé famien'n ye.

²⁰ Juif kpanngban kpa bé kanngan nde so'n, afin lika nga bé bôbôô Jésus'n o mantan klo'n. Bé klee nde so'n hébreu, nin latin, nin grec nun.

²¹ Juif'm bé Nyanmien nyrun dyranfue dandan'm bé wa sé Pilate ke: Nanh kle ke, o ti Juif'm bé famien, sannge kle ke, i bobo waan, o ti Juif'm bé famien.

²² Ye Pilate sé bé ke: Nga bo man kle'n wuun man kle.

²³ Ke sôndya'm bé bôbôli Jésus'n, bé fe i trale mun, bé swran nnan bé tye fali. Bé fe i trale dan'n b'o fin i nglô lo dyra kli'n b'o le'a ngbalie'n kusu.

²⁴ Bé sé bé wiéngu ke: Nanh man é titi nun, sannge man é tu foto nan é wun swran ng'o yô i lie'n. Bé yôli i so nan Nyanmien Nde nga bé kleli'n o kpen su. Bé klee ke: «Bé tye n trale mun fali, Ye bé tuu n trale dan'n i wun foto.» I so ye sôndya'm bé yôlio.

²⁵ Jésus nin'n, o nin Clopas yi'n b'o ti Jésus nin'n i niaan'n, o nin Marie b'o fin Magdala'n bé dyin waka nga bé bôbôô Jésus su'n i bô le.

²⁶ Ke Jésus wuun i nin'n o nin i sonnzonfue ng'o klôé kpa'n ke bé dyin le'n, o sé i nin ke: Mmô, o wa'n ye o ô leo.

²⁷ Ye o sé i sonnzonfue'n kusu ke: O nin'n ye o ô leo. Ke o fin tyen so'n nun'n, i sonnzonfue'n fe i nin'n woo i awlô.

Jésus i wule

²⁸ Ke o yôô so'n, Jésus si ke liké kwlaa ng'o bee i yôle'n wa wié yô, sannge ke o yô nan Nyanmien Nde nga bé kleli'n wa kpen su'n ti, o sé ke: «Nzué wé kun min.»

²⁹ Du vin nyanwa se kun dyin le. Bé fa mlan bôô du vin nyanwa so'n nun, bé fa bleblee hysope b'o ti ke ndema sa'n su, bé fa wo i nuan.

³⁰ Ke Jésus tafii su'n, o sé ke: Wa wié. Kpekuun o ken i ti asé, ye o kaa nuon.

Bé woo Jésus nven nun tyua

³¹ Juif'm bé kô sree Pilate ke o man bé bubu bé nga bé bôbôô bé'n bé dya'n nan bé yi bé waka'n su, afin o ti ya'n bo Juif'm bé fa buabua bé wun'n, ye bé klô'a ke bé yatyi bé le man sabbat'n b'o ti bé tyen te'n tô bé le, yele ke sabbat kun so'n ti bé tyen dan.

³² Ye sôndya'm bé ba bé nga bé bôbôô bé'n bé dya'm bé bubuleo. Bé bu nga lie'n, bé bu nga lie'n.

³³ Ke bé tôô Jésus bo bé wun ke wa wu'n, o man ba bubu'e i lie'n wié,

³⁴ sannge sôndya'm bé nun kun woo i nven nun tyua, kpekuun nzué nin mmôdya bé su fité.

³⁵ Swran ng'o wuun nun'n ye o kannion, ye i nde ng'o kan'n ti nanwle. I bobo si ke nde ng'o kan'n ti nanwle, o man amun kusu anh lafi su wié.

³⁶ Ke o kô yô nan Nyanmien Nde nga bé kleli'n wa kpen su'n ti ye o yôli soo. Bé klee ke: «Bé su bu'e i ôwié'n wié fi.»

³⁷ Ye bé ken Nyanmien Nde'n nun lika ufle ékun ke: «Swran nga bé wolii tyua'n béh nienh.»

Jésus i siéle

³⁸ Ke o yôô so'n, i sin Joseph b'o fin Arimathée'n b'o ti Jésus sonnzonfue kun sannge Juif'm bé wun sre ti o yi'e i wun nglô'n, o wa sree Pilate ke o fa Jésus fuen'n men. Pilate kpliin su, ye o kô fe i fuen'n wolio.

³⁹ Nicodème b'o lé kun kongue o oo Jésus wun lo'n, i kusu faa myrrhe bo bé senngen nin aloès (*f30*) b'o wa dé dyu kilo ablénun'n bali.

⁴⁰ O man bé fa Jésus fuen'n, ke béh tyityiih'n, wuun béh fah ayré fannin'n guagua tannin tanmué bo bé fa tyitii'n nun, afin ke Juif'm bé sié bé swran soo.

⁴¹ Kan bé bôbôô Jésus le'n, fié kun ô le. Bé kpee ndia ufle kun yebue nun ke sua ba sa fié so'n su, bé nian sié'a swran nun lé.

⁴² Ndia so'n mantan kôkô le ti, le ye bé siéé Jésus-o, afin o ti Juif'm bé wun buabuale tyen.