Jean 18 - Nyanmien nde Ufle

Jésus i trale

¹ Ke Jésus kaan so bo i nuan toli'n, o nin i sonnzonfue'm bé fité oo Cédron nzué ba kan'n i sin lo. Fié kaan kun ô le, o nin i sonnzonfue'm bé oo lo.

² Judas b'o fe maan swran mun'n, o si lika so'n nun, afin Jésus nin i sonnzonfue'm bé ta lo yia.

³ O man Judas faa sôndya nin Nyanmien sua dan'n nun sôndya nga Nyanmien nyrun dyranfue dandan nin Pharisifue'm (*f4*) bé yii bé'n bé oo lo. Kannin, nin te, nin kaka, nin klonman ô bé sa nun.

⁴ Jésus b'o si sa kwlaa nga bé su wa yôé'n, o wunngé bé wun le o usaa bé ke: ?An su kunnde wan?

⁵ Ye bé waan: Jésus b'o fin Nazareth nion. O sé bé ke: Min ye. Judas b'o fe maan swran mun'n, o nin bé ye bé ô leo.

⁶ Ke Jésus séli bé ke: Min ye'n, bé tyuen oo sien kaan, kpekuun ba fin asé.

⁷ Jésus usa bé ékun ke: ?An su kunnde wan? Bé sé ke: Jésus b'o fin Nazareth nion.

⁸ Ye Jésus sé bé ke: N sé amun ke: Min ye. Se min ye an kunnde min'n, anh yatyi bé nga'm bé nun man bé wo.

⁹ O ken i so nan o kpen nde ng'o keen i ke: «Bé nga a fa bé maan min'n, bé wié fi a mlinman'n» su.

¹⁰ Kaka kun ô Simon Pierre sa nun, o tyuen fa fiin Nyanmien nyrun dyranfue dan'n i swran bo bé flee Malchus'n, o kpe i su fama'n.

¹¹ Jésus sé Pierre ke: Wlo o kaka'n i bua'n nun. ?A bu i ke nyrennen nga é Si waan n wuin'n, n su wunmen?

Jésus i Anne dyasu fa kole

¹² Sôndya'm bé nin bé sukpen'n nin Juif'm bé sôndya mun bé tra Jésus ye bé tyii io.

¹³ Ke bé trelii'n, bé dun mmua fe oo Anne awlô lo, afin Anne so'n ti Caïphe b'o ti Nyanmien nyrun dyranfue dan afue so'n nun'n i sia.

¹⁴ Caïphe so'n ye o séé Juif'm bé ke: «Se swran'm bé ti swran kun wu'n, o ti kpa tra ke nvlé wunmuan'n satyi nion.»

Pierre séé ke o si'a Jésus

¹⁵ Ke oh yôh so'n, Simon Pierre nin Jésus i sonnzonfue kun ékun bé su i su. Nyanmien nyrun dyranfue dan'n si i sonnzonfue so'n, o nin Jésus bé wluu Nyanmien nyrun dyranfue dan'n i awlô lo.

¹⁶ Sannge Pierre kaa anuan'n nun le. Jésus i sonnzonfue kun nga Nyanmien nyrun dyranfue dan'n sii'n, o wa kan kléé bla ng'o nian anuan'n su'n, nan o man Pierre a wlu awlô lo.

¹⁷ Afannien so'n b'o nian anuan'n su'n o usaa Pierre ke: ?Nanh bian so'n i sonnzonfue'n wié yele o? Ye o sé ke: Nenh i wié yele min.

¹⁸ Ayre ô nun, i so'n ti, kanga'm bé nin sôndya mun bé troo sin bé su ton. Pierre kusu dyin bé wun le, o ton wié.

Nyanmien nyrun dyranfue dan'n usaa Jésus sa

¹⁹ Nyanmien nyrun dyranfue dan'n usaa Jésus i sonnzonfue'm bé wun nde, o nin liké ng'o klé'n i su nde.

²⁰ Jésus sé i ke: N kan kléé swran'n kwlaa nzra nun, ye tyen'n kwlaa ke Juif'm bé yia Nyanmien sua'm bé nun nin Nyanmien sua dan'n nun'n, n klé bé liké. Man ka'an nde fi nvialie nun.

²¹ ?Nzu ti ye a usa min ékuon? Usa bé nga n kan klé bé bo bé tili'n. Bé bobo bé si nde nga n kan kléé bé'n.

²² Ke Jésus séé so'n, sôndya kun menten le, o kpatyii i nyin nun, o sé i ke: ?Nde nga a kan klé Nyanmien nyrun dyranfue dan'n ye?

²³ Jésus sé i ke: Se nde te ye n kannin'n, kan klé min. ?Se kusu nde kpa ye n kannin'n, nzu ti ye a bô mion?

²⁴ Ye Anne fe i nin i sa nyanmien'n kô maan Caïphe, Nyanmien nyrun dyranfue dan nion.

Pierre séé ékun ke o si'a Jésus

²⁵ Simon Pierre dyin le o su ton sin. Bé use i ke: ?O kusu, nanh bian so'n i sonnzonfue'n wié yele o? Sannge o sali, o sé ke: Nenh i wié yele min.

²⁶ Nyanmien nyrun dyranfue dan'n i swran kun b'o ti bian nga Pierre kpee i su'n i niaan'n, o use i ke: ?Man wu'an o nin bian so'n fié kaan'n su lo?

²⁷ Pierre sé ékun ke o simen. Kpekuun ye ako nyinman'n bôlio.

Jésus i Pilate dyasu fa kole

²⁸ Ke bé nin i fin Caïphe awlô lo'n, bé fe oo Pilate awlô lo, ke oh yôh so'n, lika'n nian wié'a tyen. Ke o yô nan Juif'm ba ka'an fien nan ba kwla di Pâque'n (*f17*) wié'n, bé bobo ba wlu'a lo.

²⁹ O man Pilate fité baa bé wun le, o usa bé ke: ?Nzu nde su ye an sanmaan bian ngaa?

³⁰ Bé sé i ke: Se wa yô'a sa te'n, wuun ya fe'e i a blemon.

³¹ O man Pilate sé bé ke: An bobo anh fe kô yôé ng'o ti amun mmla'n su'n. Juif'm bé sé i ke: É bobo é le'a atin ke é kun swran.

³² Bé ken i so nan Jésus i wule wafa ng'o kan kléé bé ke oh wuh'n, o kpen su.

³³ Pilate see i sin i awlô lo, o fle Jésus use i ke: ?A ti Juif'm bé famien?

³⁴ Jésus use i ke: ?O bobo ye a kpe o ti nun ken i soo, annze swran wié ye o ken i so kléé woo?

³⁵ Pilate sé i ke: ?Bé waan Juif yele min? O bobo o nvléfue nin Nyanmien nyrun dyranfue dandan mun ye bé fa o blee mion. ?Nzu sa ye a yôlio?

³⁶ Jésus sé i ke: Nanh men nga nunfue mun ye bé siéé n famieon. Se bé ye bé siéé min'n, wuun béh dyranh n sin kun n ti ale, bé su fa'a min ma'an Juif mun. Sannge o ti'a so, nanh men nga nunfue mun ye bé siéé mion.

³⁷ O man Pilate use i ke: ?O man a ti famien? Jésus sé i ke: Ye o nuan ô su leo, n ti famien. Nian sa ti bo bé wu min'n, nian sa ti bo m baa men nun'n ye, m baa ke n kan nde ng'o ti nanwle'n klé swran mun. Swran kwlaa ng'o si nanwle'n, o ti nde nga n kan'n.

³⁸ Pilate use i ke: Nanwle'n yele nzu? Ke i nuan toli'n, o fité oo Juif'm bé wun lo ékun, o sé bé ke: N wu'en i wun nde kun bo n dyran su fa bu i foo.

Bé séé ke bé kun Jésus

³⁹ ?Sannge ke o ti amun nzuen ke Pâque (*f17*) dile nun n yatyi bisuafue kun nun man amun'n, an klô ke n yatyi Juif'm bé famien'n i nun man amun?

⁴⁰ Ye bé to kpanle su ékuon, bé sé ke: Tyetye, nenh io. Barabbas ye é waan a yatyi i nun man yéo. Sannge Barabbas so'n ti kakadyéfue.