Jean 16 - Nyanmien nde Ufle

¹ N ken i so kléé amun nan amun ti nun a satyiman.

² Béh kanh amun bô Nyanmien sua'm bé nun, ye tyen wié bé nga bé kun amun'n, béh buh i ke Nyanmien ye bé su su io.

³ Béh yôh amun so yele ke bé si'a min nin é Si'n.

⁴ N ken i so kléé amun nan se tyen wié bé yô i so sa'n, wa fu'a amun nun. Man kan klé'a amun i bôbôle nun, yele ke min nin amun ye é ô waa.

Dyunman nga Nyanmien Wawe'n di'n

⁵ Sien'n n su ko swran ng'o sunmaan min'n i sin, sannge amun nun wié fi usa'a n ke: ?A su kô nin?

⁶ Ke n ken i so kléé amun'n ti, amun wla'n wa bô dan.

⁷ Sannge i nanwle ye n di klé amuon, se n ko'n, o ti kpa, afin se man oman'n, Swran ng'o wa uka amun'n o su baman, sannge se n ko'n, m man oh bah.

⁸ Se o ba'n, oh fah sa te'n, nin sa kpa'n, nin dyole dile'n klé men nunfue'm bé wéiin.

⁹ Oh kléh bé sa te'n i bô, afin bé lafi'a n su.

¹⁰ Oh kléh bé sa kpa'n, yele ke n lie'n, n su ko é Si'n sin, ye an su wu'an min kun.

¹¹ Oh kléh bé dyole dile'n i bô, afin Nyanmien a bu swran ng'o sié men nga'n i fo.

¹² Nde kpanngban kpa ô n klun bo n waan nh kanh klé amun, sannge amun ti nian kwla so'en i bô ke é sé ye'n.

¹³ Ke Nyanmien Wawe'n b'o ti Nanwlefue'n kô ba'n, oh kléh amun sa kwlaa ng'o ti nanwle'n, afin nde nga oh kanh'n, o su kpe'e i ti nun ye oh kaanh, sannge nde kwlaa ng'o tili'n ye oh kaanh, ye oh bôh sa nga bé wa ba'n su klé amun.

¹⁴ O man n dunman'n fuh, afin min nde'n ye oh kanh klé amuon.

¹⁵ Liké kwlaa ng'o ti n Si lie'n, o ti n lie, i so'n ti ye n séé ke, min nde'n ye oh kanh klé amun nion.

Awlabôe'n wiéh, bé klun dyoh

¹⁶ O tye kan'n an su wu'an n kun, sannge se i sin tyuen nun kan'n, amunh wunh min ékun.

¹⁷ O man i sonnzonfue'm bé nun wié'm bé usa bé wiéngu ke: ?Ke o sé ke, o tye kan'n é su wu'en kun, sannge se i sin tyuen nun kan'n, éh wunh i ékun ye o su ko é Si'n sin'n, i bô yele ônin?

¹⁸ Bé usa ke: ?O tye kan ng'o ken i le'n, i bô yele ônin? Nde kpa ng'o ken i le'n, é wu'en i wle.

¹⁹ Jésus wuun i wle ke bé klô ke béh useh i nun, o usa bé ke: ?Ke n sé amun ke, o tye kan'n an su wu'an n kun, sannge se i sin tyuen nun kan'n, amunh wunh min ékun'n, i ye an wusausa amun wuon?

²⁰ Nanwle, amunh bôh auyé, amunh sunh, sannge men nunfue'm bé klun dyoh, amun wla'n bôh, sannge awlabôe so'n oh katyih aklundyue.

²¹ Ke bla kun kôtô awulie'n, wuun afe'n wa tôé, sannge ke o kô wu ba'n, i wla fi i afe'n, i klun dyo, ba bo wa wui'n ti.

²² Amun kusu, awlabôe'n wô amun su ke é sé ye'n, sannge ke mh bah wun amun wun ékun'n, amun klun dyoh, ye swran fi su kwla bô'a amun wla.

²³ Tyen so'n nun, an su usa'a n sa sa wié su kun. Nanwle, liké kwlaa nga an sre n Si n dunman nun'n, oh fah man amun.

²⁴ Lélé nde, an nian sre'a liké fi n dunman nun. Anh sre, amunh nyenh ye amun klun'n dyoh lélélé

Jésus ye o kwla men'n nun waa

²⁵ N kan nde so'n kwlaa kléé amun nyanndra nun, sannge tyen wié lélé n su ke'en nyanndra nun kun, nh kanh é Si i nde wéiin klé amun.

²⁶ I tyen so'n nun, amunh sreh é Si'n i liké n dunman nun, ye n su sé'a amun ke nh sreh é SI'n i liké man amun,

²⁷ afin é Si'n bobo klô amun. O klô amun yele ke an klô min, ye an lafi su ke Nyanmien ye o sunmaan mion.

²⁸ N fi é Si'n wun lo ye m balio. Sien'n n su dyaô men nga nun nh koh i wun lo ékun.

²⁹ I sonnzonfue'm bé sé i ke: En-heen, ble li ye a su ken wéiion, a ke'en nyanndra nun kun.

³⁰ Sien'n ya wun i wle ke a si sa'n kwlaa, o ti'a bo bé uso o sa kuon. I so'n ti ye é lafi su ke Nyanmien ye o sunmaan o nion.

³¹ Jésus usa bé ke: ?Amuan lafi su sien'n?

³² Tyen wié lélé… tyen so'n wa dyu bobo… bo amun kwlaa amunh sanndih ko bé awlô, amunh yatyih n kunngba, sannge o su ka'a n kunngba, afin min nin é SI'n ye é wôo.

³³ N ken i kwlaa so'n kléé amun nan amun wun dyo amun fouun swran wunmuan bo min nin amun ya katyi'n ti. Amun wa wun amun nyin su kpa, sannge anh tra amun awlen, men nga nun wa'n min ye n kwlaa.