Jean 15 - Nyanmien nde Ufle

Jésus ye o ti waka'n i bô nion

¹ Min ye n ti raisin'n (*f12*) i bô kpa nion, ye n Si ti i tafue.

² N sama kwlaa ng'o suman'n, o kpe, ye ng'o su'n, o kpekpe su nan o yô kpa ye o su tra laa lie'n.

³ Nde nga n kan kléé amun'n ti, amuan yô kpa.

⁴ Ke min nin amun ya yô swran wunmuan'n, man é tran so tititi. Waka sama'n i ngunmin kwla suman, san oh teh i bô'n su, i kunngba'n, amun kusu se amun nin min a yô'a kun'n, an su yô'a liké fi yé.

⁵ Min ye n ti raisin'n i bô nion, an ti i sama. Swran ng'o nin min a yô swran wunmuan bo é tran titi'n, o ti ke waka sama b'o su kpanngban sa, afin se n nu'an nun'n, an kwla yô'a liké fi.

⁶ Swran ng'o nin min a yô kun'n se o nin min a tra'an so titi'n, o ti ke waka sama b'o temen i bô'n su'n sa, bé kpe yi. O wu, bé isa gue sin nun, o yra.

⁷ Se amun nin min yô swran wunmuan bo é tran titi'n, bo an fa min nde'n su'n, liké nga an klôé'n, anh sé Nyanmien, oh fah man amun.

⁸ Se an yô ke waka sama b'o su kpanngban sa'n, b'o man bé wun ke an ti n sonnzonfue'n, i so'n nun ye n Si'n nyanh komion.

⁹ Ke n Si fa klô min'n, ye n kusu n fa klô amuon. Anh yô sa nga b'o man an si ke n klô amun titi'n.

¹⁰ Se an fa min nde'n su'n, amunh sih ke n klô amun tititi. Ke n fa n Si nde'n su soo, o man n si ke o klô min tititi.

¹¹ N ken i so kléé amun nan amun klun dyo ke n lie'n sa, ye amun klun dyo lélélé…

¹² Nde nga nh kanh klé amun'n ye, anh klô amun wiéngu ke n fa klô amun'n sa.

¹³ Swran klôle ng'o ti dan tre i ngba'n, yele swran bo i dyanvue'n ti, o fe i wun man'n.

¹⁴ Se an fa min nde'n su'n, an ti n dyanvue.

¹⁵ N fle'a amun n swran kun, afin kanga'n si'a liké nga i min'n yô'n. Sa ti bo n fle amun n dyanvue'n yele ke liké kwlaa nga n sueen n Si sa nun'n, n kléli amun.

¹⁶ Nanh amun ye an faa mion, sannge min ye n faa amuon. N faa amun ke an wo, an kô yô ke waka sama b'o su'n sa, ye mma nga an sui so'n oh kah le titi, nan liké kwlaa nga an fa n dunman sre é Si'n, o man amun.

¹⁷ Nde nga nh kanh klé amun'n yele ke anh klô amun wiéngu.

Men nunfue'm bé kpo Jésus nin i sonnzonfue mun

¹⁸ Se men nunfue'm bé kpo amun'n, man an si ke min ye bé dun mmua kpoo mion.

¹⁹ Se an ti men nga nunfue wié'n, wuun bé klô amun yele ke an ti béfue. Sannge n faa amun, n yi amun men nunfue'm bé nun, i ti ye man bé kpo amuon.

²⁰ Anh bu nde nga n kan kléé amun ke: «Swran b'o su swran'n ti'a kpa tre'e i min'n» i akunndan. Se bé kléé n yale'n béh kléh amun yale wié, se bé fa min nde'n su'n, béh fah amun lie'n su wié.

²¹ N ti ye béh yôh amun sa so'n kwlaaa, afin bé si'a swran b'o sunmaan min'n.

²² Se man baman man kan klé'a bé'n, wuun bé su bu'a bé sa te yôfue. Sannge sien'n, bé kwla yi'a bé ti bé sa te'n bô kun.

²³ Swran ng'o kpo min'n, wuun o kpo n Si kusu.

²⁴ Se man yô'a liké nga swran fi nian yô'e lé bé nyrun ba wunmen'n, wuun bé su bu'a bé sa te yôfue.

²⁵ Sannge sa so'n yô so nan nde nga bé klee bé mmla fluwa'n nun ke: «Kpole nga bé kpo min'n le'a bô'n» o kpen su.

²⁶ Swran ng'o wa uka amun'n oh bah, yele Nyanmien Wawe'n b'o ti Nanwlefue b'o fin é Si Nyanmien wun lo'n. Nh feh ble amun é Si dunman nun. Ke o kô ba'n, oh kanh min nde klé amun.

²⁷ Amun kusu, amunh kanh n nde wié, afin ke o fin i bôbôle nun'n min nin amun ye é wôo.