Jean 14 - Nyanmien nde Ufle

Jésus ye o ti atin b'o ko Nyanmien wun loo

¹ Nanh amun wla bô. Anh lafi Nyanmien su, ye anh lafi n su wié.

² N Si i awlô lo tranwle'n sonnin, n su kô siésié lika man amun. Se o ti'a so'n, wuun man kan klé'a amun.

³ Se n ko nan n wié i siésié'n, mh bah m ma fa amun nan lika nga n tran lo'n, an tran lo wié.

⁴ An si lika nga n ko lo'n i atin'n.

⁵ Thomas sé i ke: Nannan, é si'a lika nga a ko'n. ?O yô se ye é si i atin nion?

⁶ Jésus sé i ke: Min ye n ti atin nin nanwle nin nguan nion. Swran nga wa si'an min nun'n, o dyu'a é Si wun lo.

⁷ Se an si min'n, wuun amuan si n Si'n. Ke o fin nde'n, amuan wuin, amuan sii.

⁸ Philippe sé i ke: Nannan, se a klé é é Si'n, é su kunnde'a liké ufle kun.

⁹ Jésus sé i ke: ?Philippe, lalaa bo min nin amun ô wa'n, a nian si'a min? Swran ng'o wun min'n, wuun wa wun é Si'n. ?O yô se ye a sé n ke n klé amun é Si nion?

¹⁰ ?A lafi'a su ke min nin é Si'n é ti swran wunmuan? Nde nga n kan klé amun'n, n kpe'a n ti nun ye n kaan. É Si b'o nin min ti kun titi'n, i bobo ye o di i dyunman nion.

¹¹ Ke n sé ke min nin é Si'n é ti kun'n, anh lafi su. Se an lafi'e i so'n su'n, anh lafi su liké nga n yô bé'n bé ti.

¹² Nanwle, swran ng'o lafi n su'n, liké nga n yô bé'n, oh yôh wié, i lie'n trah n lie'n bobo, afin n su ko é Si'n sin.

¹³ Liké kwlaa nga an fa n dunman sre'n, nh yôh nan m bo n ti é Si i Wa'n m men i komin su.

¹⁴ Se an fa n dunman sre liké wié'n, nh yôh.

Nyanmien Wawe'n i bale'n i su bôle

¹⁵ Se an klô min'n amunh fah min nde'n su.

^16-17 Nh kôh sre é Si'n, oh bleh amun swran ufle b'o uka amun, yele Nyanmien Wawe'n b'o ti nanwlefue'n, o nin amunh tranh titi. Men nunfue'm bé kwla nyenmen, yele ke bé wunmen ye bé simen, sannge amun lie'n, an sii, afin o nin amun ye o traan, ye o wa tran amun awlen'n nun.

¹⁸ N yatyi'a amun aika, mh bah amun wun wa ékun.

¹⁹ O tye kan'n, men nunfue'm bé su wu'an n kun, sannge amun lie'n, amunh wunh min. N wunman, o man amun kusu amunh kah le tititi.

²⁰ I tyen so'n nun, amunh wunh i wle ke min nin n Si é ti swran wunmuan, ye min nin amun kusu ya katyi swran wunmuan.

²¹ Swran ng'o ti min nde'n b'o fa su'n, swran so'n ye o klô mion. Swran ng'o klô min'n, n Si wa klôé, n kusu m ma klôé, ye nh yih min wun kléé.

²² Jude use i ke: ?Nannan, oh yôh se ye ah yih o wun klé é bo men nunfue'm bé lie su tra'an nuon? Nanh Judas Iscariotfue'n ye o séé soo.

²³ Jésus sé i ke: Swran ng'o klô min'n, oh fah min nde'n su, ye n Si wa klôé, éh beh i wun, é nin i éh tranh.

²⁴ Swran ng'o klô'a min'n, o fa'a min nde'n su. Nde nga amun ti'n, n kpe'a n ti nun ye n kaan, sannge n Si b'o sunmaan min'n, ye man n kaan.

²⁵ Ke n te ô wa'n, man n kan nde so'n klé amun.

²⁶ Sannge swran ng'o wa uka amun'n yele é Si i Wawe'n b'o wa sunmen n dunman nun'n, i ye o wa klé sa'n kwla, ye oh kpenh amun wla nde kwlaa nga n kan kléé amun'n suo.

²⁷ M man amun wun dyoh amun fouun, ye amunh dih aladyé ke min sa. Aladyé nga men nunfue'm bé yra bé nuan ke swran di'n, o nin n lie'n ti'a kun. Nanh amun wla bô, nanh sre kun amun.

²⁸ An tii i ke n séli amun ke: N su ko, sannge mh bah amun wun wa ékun. Se an klô min'n, wuun ke n su ko é Si si'n, amun klun dyoh, afin é Si'n le nyrun tra min.

²⁹ Ke sa so'm bé nian yôman'n, man m bô su klé amun biki sa, nan se bé yô'n, amuan lafi su.

³⁰ Min nin amun é su idyo'a kpanngban kun, afin swran ng'o sié men nga'n o su ba. O kwla yô'a n liké fi mlonmlon,

³¹ sannge man men nunfue'm bé si ke n klô é SI'n, ye liké ng'o klé n ke n yô'n, ye o n yôo. Anh dyaô man é o.