Jean 13 - Nyanmien nde Ufle

Jésus i sonnzonfue'm bé dya wunnzinle

¹ Jésus si ke i men'n nun wa tule'n nin i Si sin kole'n wa dyu, i sin nan ba bô Pâque (*f17*) dile'n i bô. Ke o fin i bôbôle nun'n, Jésus klô ifue nga bé ô men'n nun'n, o klô bé lélé gue i ti nin i bô.

² Ke béh dih liké'n, wuun mmusu'm bé si Satan'n wa dun mmua di a wla Judas Iscariot, Simon wa'n, ke o fa Jésus man swran mun.

³ Jésus bobo si wéiin ke i Si faa liké'n kwlaa wle i sa nun, o si ke o fin i Si Nyanmien wun lo, ye o su wa ko lo ékun.

⁴ O dyaôô alie'n su, o yi i trale dan'n, o fan wunnzinnun kun tyi i afien.

⁵ I sin o guaa nzué kpôngbô kun nun, ye o to i sonnzonfue'm bé dya wunnzinle suo. O fa wunnzinnun'n b'o tyi i afien'n o fa nunnun.

⁶ Ke o tôô Simon Pierre'n, o sé i ke: ?Nannan, wo ye a wa wunnzin n dyaa?

⁷ Jésus sé i ke: Liké nga n yôé ye'n, a nian wu'en i wle, sannge tyen wié lélé ah wunh i wle.

⁸ Pierre sé i ke: N lie'n, a su wunnzi'an n dya lie'n wié mlonmlon! Ye Jésus sé i ke: Se man wunnzinmon'n, n lie nu'an o lie nun kun.

⁹ Simon Pierre sé i ke: Nannan, se o ti so'n, nanh wunnzin n dya'n ngunmin, sannge wunnzin n sa'n nin n ti'n.

¹⁰ Jésus sé i ke: Swran nga wa dun mmua wunnzin'n, sen i dya ye o wunnzion, afin i wun ti yeiin. Amun lie'n, an ti yeiin, sannge nanh amun ngbaa.

¹¹ Jésus si swran ng'oh feh man swran mun'n ti ye o séé ke bé ngba bé ti'a yeiin nion.

¹² Ke o wié bé dya wunnzin b'o wlee i trale'n, o tran asé alie'n su ékun ye o usa bé ke: ?An wun liké nga n yôô amun'n i wle?

¹³ An sé ke n ti amun liké kléfue nin amun min. Ke an sé so'n, o ti nanwle, afin ke n ti soo.

¹⁴ Se m bo n ti amun liké kléfue nin amun min'n, n wunnziin amun dya'n, amun kusu anh wunnzin amun wiéngu dya.

¹⁵ N yô i so kléé amun nan amun kusu an nian nga n yôô amun'n su yô.

¹⁶ Nanwle, swran ng'o su swran'n ti'a kpa tre'e i min'n, ye swran nga bé sunmen'n ti'a kpa tra'a swran ng'o sunmen'n.

¹⁷ Se an si sa so'n nan an fa su'n, amun lie su ti yé.

¹⁸ Nanh amun ngba nde ye n kaan, n si bé nga n fali bé'n. Sannge san Nyanmien Nde nga bé klelii ke: «Swran ng'o nin min di liké'n, wa katyi n kpofue'n» oh kpenh su.

¹⁹ Ke sa so'n nian dyuman'n, nh kanh klé amun biki sa nan se bé dyu'n, an lafi swran wafa nga n ti'n su.

²⁰ Nanwle, swran ng'o kô so swran nga n sunmen'n nun'n, wuun wa so min nun, ye swran ng'o so min nun'n, wuun wa so swran ng'o sunmaan min'n nun.

Jésus bôô su ke Judas wa fe man swran mun

²¹ Ke Jésus nuan toli'n, i wla'n bôli, nan wa sé ke: Nanwle, amun nun kun wa fa min man swran mun.

²² I sonnzonfue'm bé niannian bé wiéngu nyrun, bé si'a swran ng'o ken i nde'n.

²³ Bé nun kun bo Jésus klô i sa kpa'n o menten i wun le.

²⁴ Simon Pierre bu i nyinma klé i ke o use i swran ng'o ken i nde'n.

²⁵ Jésus sonnzonfue so'n kise i wué nun, o use i ke: ?Nannan, waan?

²⁶ Jésus sé i ke: Swran nga m bô kpaun sin trô'n nun n fa men'n, wuun io. Ye o bôé trô'n nun fa maan Judas, Simon Iscariot wa nion.

²⁷ Ke Judas soo kpaun sin so'n nun tye'n, ye Satan fuli io. Jésus sé i ke: Liké nga o waan ah yôh'n, yôé ndende.

²⁸ Sannge bé nga bé nin i ô alie'n sin'n, bé nun wié fi a wu'an sa nga ti ye o séé i so'n.

²⁹ Ke bo Judas ye o sié bé bole'n ti, bé wié'm bé bu i ke o séé i ke o kô tô liké nga bé fa di tyen'n, annze o tye yalefue'm bé liké wié.

³⁰ Kpekuun, Judas fa kpaun sin'n fitéli. Ke oh yôh so'n, wuun lika'n wa dun.

Mmla kun ékun

³¹ Ke Judas fitéli'n, Jésus sé ke: Sien'n m bo n katyii Swran'n, n swran wafa nga n ti'n i nglô yile'n wa dyu, ye n ti Nyanmien a yi i wun nglô.

³² Ye se n ti Nyanmien yi i wun nglô'n Nyanmien bobo o wa yi n swran wafa nga n ti'n i nglô wié, oh yôh i so ityra'n.

³³ M mma mun, n te ô amun wun wa kan. Amun wa kunnde min. N séé Juif'm bé ke, «Lika nga nh koh lo'n, bé su kwla ko'a lo wié.» Nde kunngba'n ye n kan klé amun ye'n.

³⁴ Mh manh amun mmla kun ékun, anh klô amun wiéngu. Klôle nga n fa klôli amun'n, amun kusu anh fa klô amun wiéngu so.

³⁵ Se an klô amun wiéngu'n, i so'n nun ye swran'n kwlaa béh sih ke an ti n sonnzonfueo.

Jésus bôô su ke Pierre wa sé ke o simen

³⁶ Simon Pierre use i ke: ?Nannan, nin ye a koo? Jésus sé i ke: Lika nga nh koh lo'n, a kwla su'a n su ityra'n, sannge tyen wié lélé ah suh n su.

³⁷ Pierre use i ke: ?Nannan, nzu ti ye n kwla su'o o su ke é sé ye nion?

³⁸ Jésus use i ke: ?N ti, an foh o wun man sakpa? Nanwle, a wa sé ke a si'a min so kpe nsan nan ako nyinman'n wa bô.