Jean 12 - Nyanmien nde Ufle

Marie guaa Jésus dya'n su blofue nzué

¹ Ke o ka lé nsien nan Pâque'n (*f17*) wa dyu'n, Jésus oo Béthanie, lo ye Lazare b'o tyenniin'n wôo.

² Ke o ô lo'n, bé ton liké menniin. Marthe ye o isa liké so'n man béo. Lazare kusu ô bé nga bé nin Jésus di liké'n bé nun.

³ Marie faa nard (*f20*) ngô muen litre sin bo i gua ti kéklé kpa'n guaa Jésus dya'n su, o fe i timuen'n nunnunnin. Blofue nzué so'n i fannin'n déé sua'n.

⁴ I sonnzonfue'm bé nun kun bo bé flee Judas Iscariot'n bo i ye o wa fe man swran mun'n, o sé ke:

⁵ ?Nzu ti ye ba yô'a blofue nzué so'n i ate denier (*f10*) ya nsan ba fa ma'an yalefue muon?

⁶ Nanh ke yalefue'm bé nde mien ti ye o sé soo, sannge o ti awiéfue, ye i ye o sié bé bole nion, ye sika nga bé gue i nun'n, o fa wié.

⁷ Sannge Jésus sé i ke: Yatyii le! Mon o sié lélé fa dyu tyen nga béh siéh min'n.

⁸ Amun nin yalefue mun ye amunh kah wa titio, sannge n lie'n, min nin amun su tra'an wa titi.

Lazare wun nde tyityile

⁹ Ke Juif kpanngban kpa bé tii ke Jésus ô Béthanie le'n, bé oo lo, nanh ke Jésus ngunmin tio, sannge ke béh wunh Lazare b'o tyenniin'n.

¹⁰ Nyanmien nyrun dyranfue dandan'm bé bu Lazare i kunle akunndan wié,

¹¹ afin i ti Juif kpanngban bé su'a bé su kun, Jésus su ye bé lafio.

Jésus i Jérusalem klo'n nun wlule

¹² Ke alie tyennin'n, swran kpanngban bo bé baa Pâque (*f17*) dile'n, bé tii ke Jésus su ba Jérusalem le.

¹³ Bé fa mmé nnya traa nun fité oo i atin kpale, bé kpan sé ke: Hosanna! Swran ng'o ba é Min Nyanmien dunman nun'n, Nyanmien mon o nyan nguan. Nyanmien man Israël famien'n nyan nguan.

¹⁴ Jésus kunnde aflunmun gbanflen kun fuu su, afin bé klee ke:

¹⁵ «Sion wa bla, nanh sre kun o, Nian, o famien'n su ba, O fu aflunmun gbanflen kun su.»

¹⁶ Ke oh yôh so'n, i sonnzonfue'm bé wu'an sa so'n i wle, sannge ke Nyanmien yii Jésus i swran wafa ng'o ti'n i nglô'n, o kpeen bé klun ke bé klee i wun nde'n nun ke béh yôh i so, o man ke bé yôô i so'n, o kpeen su.

¹⁷ Swran kpanngban bo lé kun nga ke Jésus fleh Lazare ke o fin ndia'n nun fité'n, b'o tyenniin'n, bé nin i ô le'n, bé kan sa so'n b'o yôli'n.

¹⁸ I so'n ti, swran kpanngban bé bee i atin kpale, afin bé tii atre ng'o yili'n.

¹⁹ O man Pharisifue'm (*f4*) bé sé bé wiéngu ke: ?An wunmen? An kwla yô'a liké fi, swran'n kwlaa bé su wié i sin ko.

Grec'm bé baa Jésus wun wunle

²⁰ Bé nga bé baa Jérusalem Nyanmien sole tyen dile'n nun'n, bé nun wié'm bé ti Grec.

²¹ Bé wa tôô Philippe b'o fin Bethsaïda Galilée men'n nun'n, bé sé i ke: Ndya, é waan éh wunh Jésus wun.

²² Philippe kô kan kléé André, ye André nin Philippe bé kô kan klé Jésus-o.

²³ Jésus sé bé ke: M bo n katyii Swran'n n swran wafa nga n ti'n i nglô yile tyen'n wa dyu.

²⁴ Nanwle, se awié mma kun wa to'a asie wun wa satyiman'n, o ke i kunngba, sannge se o satyi'n, oh wloh oh yôh kpanngban.

²⁵ Swran nga i waan oh seseh i wun'n, oh kpeh i nguan'n sin, sannge swran ng'o bu'e i wié'n liké fi men nga nun'n, oh tyeh lélé oh nyanh anannganman nguan.

²⁶ Swran nga i waan oh suh min'n, mon o su n su, ye lika nga n wô nun'n, n swran so'n oh tranh lo wié. N Si buh swran ng'o su min'n i swran.

Jésus i wule wafa ng'o wa wu'n

²⁷ Sien'n min akunndan'n wa sanngan. ?N sé se? ?N sé ke: N Si, dé min sa ng'o wa dyu ye'n nun? Sa so'n ti ye m bali lélé ye wa fa dyu ke é sé ye'n.

²⁸ N Si, yô mon o dunman'n fu. Ke o yôô so'n, bé ti swran kun nen nyanmien su lo, o sé ke: Man dun mmua yô man n dunman'n wa fu, ye m man o wa fu ékun.

²⁹ Swran nga bé dyin le bo bé tili'n bé waan, nyanmien ye o su kplaa. Wié'm bé sé ke: Ange wié ye o kan nde kléli io.

³⁰ Sannge Jésus sé bé ke: Nanh n ti ye an tii nen so nion, amun tio.

³¹ Sien'n wa dyu men nga nunfue'm bé dyole difue'n i dyasu fa kole, sien'n bé wa kan swran ng'o sié men nga'n i bô.

³² Ye n kusu, se bé man n su'n, m man swran'n kwlaa béh bah n sin.

³³ O keen i so fa klé i wule wafa ng'o wa wu'n.

³⁴ Swran'm bé use i ke: É kenngen mmla'n nun ke: Christ (*f1*) su wu'a mlonmlon. ?Se o ti so'n, o yô se ye man a sé ke, san béh manh i b'o katyii Swran'n i su nion? ?Swran b'o katyii so'n yele wan?

³⁵ Jésus sé bé ke: Lika'n te kpadya amun wun wa kan. Ke an te wun asé'n, anh nanti nan lika'n wa du'an amun. Swran ng'o nanti aôsin nun'n, o wu'en i bô.

³⁶ Ke lika'n te kpadya amun wun wa'n, anh lafi kpadyale so'n su nan an katyi swran bo bé wun asé. Ke i nuan toli'n, o oo mmua lo kô fia bé nyrun.

Jésus su bo Juif'm bé lafiman'n

³⁷ O yii atre kpanngban kpa bé nyrun, sannge o nin i so'n ngba, bé lafi'e i su.

³⁸ O yôô so nan nde nga Nyanmien nuan idyofue Ésaïe kannin'n o kpen su, o sé ke: «?Nannan, nde nga é kan kléé bé'n, wan ye o fa suo? ?Wan ye é Min Nyanmien'n yi i liké ng'o yô'n i nglô kléé io?»

³⁹ Bé kwla fa'a su yele ke Ésaïe keen ékun ke:

⁴⁰ «Nyanmien katyii bé anyansifue, O man bé kétéli Nan bé nyinma a wunmen, Ba wu'en i wle, ye ba sa'a bé sin min wun, Nan man yô'a bé dyuédyué.»

⁴¹ Ésaïe kaan so yele ke o wuun nyrun nga Jésus le'n, ye man o ken i nde nion.

⁴² Kannze o ti so'n, Juif kpenngben'm bé nun kpanngban bé lafii Jésus su, sannge Pharisifue'm (*f4*) bé ti, bé yi'a bé wun nglô. Se bé yô so'n, béh kanh bé bô Nyanmien sua'n nun.

⁴³ Afin bé klô dunman nga swran'm bé bô bé'n tra nga Nyanmien bô bé'n.

Nde nga Jésus fa bu swran'm bé fo'n

⁴⁴ Jésus kpan séé ke: Swran ng'o lafi n su'n, nanh n su ye o lafio, sannge swran ng'o sunmaan min'n, i su ye o lafio.

⁴⁵ Swran ng'o wun min'n, wuun wa wun swran ng'o sunmaan min'n.

⁴⁶ Min ye m baa men'n nun ke nh kpadyah lika nion, nan swran kwlaa ng'o lafi n su'n wa tra'an aôsin nun.

⁴⁷ Swran ng'o ti min nde'n b'o fa'a su'n, nanh min ye nh kaanh, afin man ba'a ke m ma kan menfue'm bé nde, sannge m baa bé ti déle.

⁴⁸ Swran ng'o so'a min nun b'o fa'a min nde'n su'n, swran ng'o nin i béh dih'n wo le. Nde nga n kannin'n su ye bé wa dyran bu i fo men'n i awiélieo.

⁴⁹ Afin nde nga n kan'n, n kpe'a n ti nun ye n kaan, sannge n Si b'o sunmaan min'n, i bobo ye o kléé min nde nga n kan'n nin ninngé wafa nga n klé nion.

⁵⁰ Ye n si ke nde ng'o sé n ke n kan'n, o man swran nyan anannganman nguan. I so'n ti, nde nga n kan'n, nga n Si sé n ke n kan'n, ye n kaan.