Jean 11 - Nyanmien nde Ufle

Lazare i wule

¹ Bian kun bé flee Lazare o too tukpatye. O fin Béthanie bo Marie nin i niaan bla Marthe bé fin lo'n.

² Marie so'n ye o fa blofue nzué guaa é Min'n wun ye o fe i timuen nunnun i dya wun nion. Lazare so'n b'o too tukpatye'n o ti i niaan.

³ I niaan bla nnyon so'n bé sunmaan swran ke o kô sé bé Min Jésus ke, i swran kpa'n wa to tukpatye.

⁴ Ke Jésus tii i so'n, o sé ke: Tukpatye so'n ti'e i wié lie, sannge o too tukpatye so'n nan Nyanmien dunman'n fu ye i ti Nyanmien man i Wa'n nyan nyrun.

⁵ Jésus klô Marthe nin i niaan bla ye Lazare bé sa.

⁶ Ke o tii i ke Lazare a to tukpatye'n, o dii lé nnyon lika ng'o ô lo bo bé sé i ke wa to tukpatye'n nun le.

⁷ I sin, o sé i sonnzonfue'm bé ke: Man é wo Judée lo.

⁸ I sonnzonfue bé sé i ke: Baba, ke Juif'm bé kunnde ke béh finh o yebue béh kunh wo'n, o nian tyeman. ?Ye ah koh lo ékuon?

⁹ Jésus sé bé ke: ?Tyen ba kun nun do'n ti'a blu-nin-nnyon? Se swran kun nanti wia'n nun'n, i dya kplaman, afin o wun lika'n wéiin.

¹⁰ Sannge se swran kun nanti kongue'n, i dya kpla, afin o wu'an asé.

¹¹ Ke i nuan toli'n, o sé bé ke: É dyanvue Lazare a lafi, sannge nh koh i tinngéle.

¹² I sonnzonfue'm bé sé i ke: Nannan, se o su lafi'n, wuun oh yôh dyuédyué.

¹³ I wié nde ye Jésus kaan, sannge bé bu ke lafile kpakpa nde ye o kaan.

¹⁴ O man Jésus séé bé wéiin ke: Lazare a wu.

¹⁵ Amun ti, ke n nu'an lo'n o yô n fe, i so'n nun ye amunh lafih n suo. Sannge man é wo i wun lo.

¹⁶ I so'n ti, Thomas bo bé flee Nda'n, o séé i wiéngu sonnzonfue nga'm bé ke: Man é kusu é wo wié nan bé kun é ngba.

Jésus tyen swran, bé flee nguan

¹⁷ Ke Jésus dyuu lo'n, o wun ke bé siéé Lazare wa di lé nnan.

¹⁸ Béthanie nin Jérusalem bé afien ti kilo nsan.

¹⁹ Juif kpanngban kpa bé baa Marthe nin Marie bé yakô yôle, bé niaan'n i wié'n ti.

²⁰ Ke Marthe tii i ke Jésus su ba'n, o oo i atin kpale, sannge Marie ti awlô lo.

²¹ Marthe séé Jésus ke: Nannan, se a ô wa'n, wuun n niaan'n wa wuman.

²² Sannge ke é ô ye'n bobo, n si ke liké nga a sé Nyanmien ke o yô man wo'n, oh yôh.

²³ Jésus sé i ke: O niaan'n o wa tyen.

²⁴ Ye Marthe sé ke: N si ke men'n i awiélie bo swran'm béh tyenh'n, oh tyenh.

²⁵ Jésus sé i ke: Min ye n tyen swran muon, m bobo min ye bé fle min nguan nion. Swran kwlaa ng'o lafi n su'n, se o wu'n, oh nyanh nguan ékun.

²⁶ Ye swran nga i nyin ô su b'o lafi n su'n, o su wu'a lé. ?A lafi nde so'n su?

²⁷ Ye o sé i ke: Een. Nannan, n si ke wo ye a ti Christ Nyanmien Wa bo bé waan oh bah men'n nun nion.

Jésus sunnin

²⁸ Ke i nuan toli'n, o oli kô fle i niaan bla Marie blelele, o sé i ke: Ndya a ba, i waan, a bla.

²⁹ Ke Marie tii i so'n, o dyaô waka oo Jésus wun lo.

³⁰ Ke oh yôh so'n, wuun Jésus nian wlu'a klo'n nun, o te ô kan Marthe nin i yiaa le'n.

³¹ Ke Juif'm bo bé ô Marie wun le bé luelue'n, bé wuun ke wa dyaô waka a fité'n, bé suu i su. Bé bu i ke o su ko asiélie su lo kô sun.

³² Ke Marie dyuu kan Jésus ô le'n b'o wunniin'n, o kôtôô i bô, o sé i ke: Nannan, se a ô wa'n, wuun n niaan'n wa wuman.

³³ Ke Jésus wuun ke o su sun, bo Juif nga bé nin i bali'n bé sun wié'n, i awlen'n kpe i klun, i wun yô i nyeiin.

³⁴ O usa bé ke: ?An siéé nin? Bé sé i ke: Nannan, bla'a nian.

³⁵ Jésus sunnin.

³⁶ O man Juif'm bé sé ke: Nien i klôle b'o klô io.

³⁷ Bé wié'm bé sé ke: ?I b'o tikéli anyansifue'n i nyinma'n, o yô se ye o yatyii bian nga le o wulio?

Lazare i tyenle

³⁸ I awlen'n kpe i klun ékun, o oo ndia'n su lo. Ndia'n ti yebue bue ye bé fa yebue kun nyiin i anuan.

³⁹ Jésus sé ke: Anh yi yebue'n. B'owulie'n i niaan bla Marthe sé ke: Nannan, ke bé siélii'n, i lé nnan ye, o su kpe.

⁴⁰ Jésus sé i ke: ?Man sé'a o ke, se a lafi n su'n, ah wunh ke Nyanmien'n ti kpli?

⁴¹ O man bé yii yebue'n. O meen i nyin su nian nyanmien su lo, o sé ke: N Si, kwla ô, afin nde nga n kannin'n, a tili.

⁴² N si ke a ti min nde'n titi, sannge sa nga ti ye n sé so'n, n sé so nan swran nga bé sin yia min ye'n, bé lafi su ke wo ye a sunmaan mion.

⁴³ Ke i nuan toli'n, o kpaan kéklé kpa ke: Lazare, fité!

⁴⁴ B'owulie'n fitéli, tannin tanmué'm bé tyityi i sa nin i dya, ye tannin kun kete i ti. Jésus sé bé ke: Anh nyanndyii mon o o.

Dyole difue dandan'm bé bô yôô kun ke bé kun Jésus

⁴⁵ Juif'm bo bé baa Marie wun le'n bo bé wuun sa nga Jésus yôli'n, bé nun kpanngban bé lafii i su.

⁴⁶ Sannge bé nun wié'm bé kô tôô Pharisifue (*f4*) mun bé kan sa nga Jésus yôli'n kléli bé.

⁴⁷ Ye Nyanmien nyrun dyranfue dandan nin Pharisifue'm bé nin dyole difue dandan mun, bé sé bé ke: ?É yô bian nga se? Afin o yi atre kpanngban.

⁴⁸ Se é yatyii le mon o yô so'n, swran'n kwlaa béh lafih i su, ye Romefue'm bé wa satyi é lika ye'n nin é nvlé'n.

⁴⁹ Bé nun kun bo bé flee Caïphe'n b'o ti Nyanmien nyrun dyranfue dan afue so'n nun'n, o sé bé ke: An wu'an sa fi wle.

⁵⁰ ?An bu'e i akunndan ke, se swran'm bé ti swran kun wu'n, o ti kpa tra ke nvlé wunmuan'n satyi'n?

⁵¹ Nanh ke i bobo kpe i ti nun kannion, sannge ke i ye afue so'n nun o ti Nyanmien nyrun dyranfue dan'n, ye man Nyanmien fa wlee i nuan nan wa sé ke, san Jésus wuh man nvlé'n.

⁵² Nanh ke nvlé so'n ngunmin tio, sannge oh yôh so nan Nyanmien ken i mma'm bo bé sanndili'n bé kwlaa bô nun.

⁵³ O man ke o fin tyen so'n nun'n, i kunle akunndan ye bé buo.

⁵⁴ I so'n ti, Jésus wlanwla'an nzra'n nun Juif'm bé afien kun, sannge o tu i bô le oo aawle'n i bué lie'n su klo kaan bo bé fle i Éphraïm'n su, o nin i sonnzonfue'm bé traan lo.

⁵⁵ Ke Juif'm bé tyen bo bé flee Pâque'n (*f17*) o wa dyu'n, swran kpanngban bé fin kloklo'm bé su bé dun mmua ko Jérusalem bé kô bô bé wun asô nan Pâque'n wa dyu.

⁵⁶ Bé kunnde Jésus, ke bé ô Nyanmien sua dan'n nun le'n, bé usa bé wiéngu ke: ?An bu i se? ?O su ba'a tyen'n bô wié?

⁵⁷ Ke oh yôh so'n, wuun Nyanmien nyrun dyranfue dandan nin Pharisifue mun ba di a wla swran mun ke, se swran wié si kan Jésus wô'n, o kan man bé kô tre.